Sarmur 9

Allah Fyes eren kuker Nuh i

1Allah Vye vok Nuh i ma romawa vyesi ma Ikofen, “Mkokapar isof mkoryewen, insa up mkovesi sfamok supswan ine kasiper.1 2Man vebor ro farsyos ma in sya ma aiwan vesesya kam nari simkak ma siraryof faro au. Au veve knam si ma vewaren si. 3Fafisu bepon iyafa yavuk rokaker ram berumekna kwar fa nve nanan vemko. Fafis ine Yavuk kako aiwansya syoso ve syoso ma mansya sve nanan ve mko. 4Imbape rik ro man rova aiwan mko karuksya, mkan awer veri snar rikya vyadir kenem Yavuk kwar faro snonkaku ma aiwansya.2 5Snonkaku orova aiwan vemun snonkakuyo fa imar nari Yamunsu i. 6Yafrur snonkakuya fa imnis farari Mankundaya; inja mundiri vemun snonkakuyo fa imar, sonkakuyo nari myun i fa imar kako.3

7Inja, mkokapar fa mkoryewen, insa mkokenem, mkofamakmok supswan ine kasiper.”4

8Allah Ikofen faro Nuh i ma romawa vyesi, 9“Ras ine Yafes eren kuker au ma kpu besi, 10ma roi vebor vekenem, isoine mansya ma aiwan vero sapropya bori, vesasyar so au ro wai veba aniya. 11Ine irya fes eren Ayedi kuker au: Randak ro ras ine nari roi vebor vekenem ro supswan ine favruvo myun na werva. Ma nari favruvo myun supswan ine werva. 12Avyair Yafrur fa vekain fyoro-fyoro, fandu Aya kuker mko ma kuker roi vebor vekenem nakam isoine, 13avyair sasevi ro mandif infa fyasnai vadir fes eren Ayedi kuker supswan ine. 14Ro fyor Yarir mandif na fa nakawef mandepya, ma fyor sasevi vyadir ido, 15nari Yaswarepen fes eren Ayedi faro mko ma roi vebor vekenem, isoine favruvya nari isyawerva. 16Rofyor sasevi vyadir ro mandep, nari Yamam i ma yaswarepen fes eren vekain fyoro-fyoro fandu Aya kuker roi vebor vekenem ro supswan ine. 17Irya avyair fes eren Ayedi Yavuk faro roi vebor vekenem ro supswan.”

Nuh ma romawa vyesi

18Nuh romawa vyesi vesasyar ro wai veba anya sisoine Sem, Yafet ma Ham. Ham irya Kanaan kmari. 19Romawa Nuh vyansine sirya up ro snonkaku vebor ro supswan ine.

20Nuh irya manamom, iso vefrur randak yaf anggur. 21Ras oso dinem war anggur sya ra imser. Pyer sansun vyena kam ma denef vaver ro soyai vyedi. 22Fafisu Ham, isoine Kanaan kmari, myam ma kmar vyaver, mura isasyar fa ikofen vadir ve naek vyansuya. 23Inja Sem i kuker Yafet i suyun kruvenya fa susawer ro erdai suvena. Insape sumbran sususu ve varpur fa susun ro avdares anya ma sukawef kma suvanya kuker kruven anya. Suknenef sasyar insa sumam awer sinan suvedi vevaver ani. 24Ro fafisu Nuh iknon ro marsarserya ma ifawi rosai romawa kasun vyanya ifrur yov i nya, 25mura ikofen,

“Fras faro Kanaan!

Nari vye women faro naek vyesi.

26Sanandik Faro Manseren Allah, Sem isyomya!

Kanaan nari vye women faro Sem i.

27Ivyekada Allah fyanfon Vok faro Yafet i5 ma vyuk mov kankain vemkei ve i.

Ivye up vyesya nari sikenem so Sem up vyesya.

Kanaan nari vye women ve Yafet i.”

28Posa ro Favruv anya, Nuh ikenem kaker pasivarek usin di kyor samfur di rim wer. 29Nuh imar fafisu ras kenem vyedi vye pasivarek usin di siw samfur di rim.