Sarmur 7

Favruv

1Insape Manseren Ikofen faro Nuh i, “Swun ve wai veba aniya dori, au ma kina besyakam, snar werer monda snonkaku vekenem pyum raris marisen Ayena ro fandu snonkaku vero fafisu inensya. 2-3Wun kako ro man sya snoman ma vin sya farkyam ri fik ma kako ro aiwan venapessya snoman sya fik ma vin sya fik, imboi aiwan venapesva sya snoman oser ma vin oser monda. Wafrur ra dirya insa aiwan ansya simarkam awer, insa sikapar ma siryewen ro supswan ine bori. 4Ras ri fik wer nari Yasabu mekemya ma nari imyun pdef ras samfur di fyak ma rov samfur di fyak, insa snonkaku ma roi vebor Yafrur kwar anna nro ra nadawer.” 5Mura Nuh ifrur nakam raris mov Manseren Allah ikofen kwar ve i raya.

6Ras kenem Nuh vyedi pasivarek usin di wonem fafisu favruv veba anya myun supswan ine. 7Nuh i ma swari, ma romawa kuker swa sesya ssun ve wai veba anya dori insa favruvya myun awersi.1 8Ro aiwan venapes ma venapesva sya, man sya ma aiwan vesyaves ro sapropya bori syoso ve syoso, 9saksun kako ro wai veba anya fnovek Nuh i, raris mov Allah ikofen faro i raya. 10Ras ri fik nawas ido favruv veba anya myun supswan ine.

11Ras kenem Nuh vyedi pasivarek usin di wonem, ro ras eve samfur seser ri fik ro paek eve suruya, war vebor vero sapropya dori narvaren. War vebor vero mandepi nakam nasbawer,2 12ma mekemya imyun ras samfur di fyak rov samfur di fyak. 13Ro ras anya kako Nuh i ma swari susun ve wai veba anya fnovek romawa suvesi, isoine Sem, Yafet ma Ham ma swa skovesi. 14Rarirya kako man vebor ma aiwan vesesya, vefafir ma verafdi, aiwan vero vonde ma vesyaves ro sapropya bori veba ma kasun. 15Snoman oser ma vin oser ro aiwan vebor ansya saksun kako ro wai veba anya fnovek Nuh i, 16raris ananun Allah vyena faro i. Ssun kam kwar ra posa, Manseren Allah isisen kedwai vero wai veba anya bamya ni.

17Favruv anya myun ras samfur ri fyak, inja warya dek ra ikaki isof ikanow wai veba anya ra ipyare. 18Warya dek ra ikaki syadi wer, isof wai veba anya ipyar ro warya bori. 19War anya dek syadi kaku wer isof ikawef bon vekaki syadi kaku na. 20Warya dek pdef isof isyadi bon pum vekaki syadi kaku na kav ri fik. 21-23Manseren Allah ipyos roi vebor vekenem ro supswan ine bori: Snonkaku, man ma aiwan vero sapropya bo kasun ma veba. Veyakmar va sisoine Nuh i ma vefnovek i ro wai veba anya dorinsya. 24War anya imyomek fasaw va ras usin oser samfur di rim.