Sarmur 6

Varvor snonkaku

1Fafisu snonkaku sikapar rao sibor siryewen kaku ma sfamakmok ro supswan ine bori, ma sikapar inaisya kako, 2romawa manserensya1 smam inkbor ansya sidoser mura sun ro fandu inkbor ansya min simarisen sya fa sna ve swa. 3Inja Manseren Allah ikofen, “Nari Yavuk fa snonkakusya sikenem fyoro-fyorova; snar si oref saprop monda nari vemar. Randak ro fafis ine ras kenem sena pasivarek usin oser samfur di suru monda.” 4Ro fafisu anya ma ras varpurya wer, snonkaku veba kakusya sisya ro supswan ine. Sinido vinkbor snonkaku vefarvuk kuker romawa manseren ansya romawa sikapar sirya. Snonkaku veba ansine sirya mambri eve sno ro awar madero.2

5Manseren Allah myam snonkaku vero supswan ine sivarvor kaku; swaruser sena kam nafo kuker varvor.3 6Inja Fyafko snar Ifrur snonkaku ansya kwar ramnai Vyesifa sikenem ro supswan ine. Sneri fyafardun kaku, 7muraido Ikofen, “Nari Yapyos snonkaku Yafrur kwar ansine bur supswan ine, kako man vero farsyos ma aiwan veborsyakam, Yafafko snar Yafrur sikwar.” 8Imbape Nuh i ma ifrur marisen Manseren Allah I.

Nuh

9-10Ine irya fawar vekur Nuh i. Nuh ikapar romawa snon ri kyor, sisoine Sem, Yafet ma Ham. Nuh ima dakfrur sasarva, ma derer monda snonkaku kenem venapes ro fafis anya. Ikenem ma vye manivov Allah I.4 11Imbape snonkaku vesesya kam sivarvor kaku ro varpon mamam Allah vyedi, ma varvorna naisya ro mov nakam. 12Allah Myam supswan anya ma imkok fafayava, snar varvor snonkakusya kam sifrurna.

13Inja Allah Ikofen faro Nuh i, “Yun wos vemuk kwar fa Yapyos snonkaku ma roi veborkam vekenem. Nari Yapyos si kam fnovek supswan ine, snar supswan ine ifo kuker frur vevyeva sena. 14Wafrur wai vebayo ve au ro ai farfir vemku kaku ma vesrawen kaku; wafrur simno ro dori, ma won i ro do ma vandiri kuker akem5. 15Wai veba anya kawanwanya kav6 usin oser samfur di kyor seser di kyor, avavamya kav samfur di suru seser di suru, ma kakakiya kav samfur eser seser ri kyor. 16Rwares epen bori, ma buk manak ro epen7 anya ve wai veba anya bamya vrapur8 oser. Wafrur wai veba anya fa vye syos ri kyor, ma wafrur kedwai osero ro bamya kako. 17Wamnaf navye kaku! Snar nari Yave favruv vebayo fa myun pres roi vebor bekenem ro supswan ine. Roi vebor vero supswan ine nakam nari nro ra nadawer. 18Imbape nari Yafesepen eren kuker au, swun ve wai veba anya dori kuker swambri, ma romawa bansya kuker swa sesi. 19-20Wun kako ve wai veba anya dori man ma aiwan vesesya snoman ma vin, aiwan ansine nari sramuma ve au fa ssun ve wai veba anya dori insa simar kam awer. 21Wun kako fasasos nanan nabor kaku faro au ma aiwan ansyakam.” 22Nuh ifrur nakam raris mov Allah dawos ve i raya. 9