Sarmur 20

Abraham ma Abimelekh

1Abraham isasyar bur Mamre ve sup Negeb ro Kanaan var wamiresya ma vyarek ro swaf Kades ma Syur. Insape rya vyarek kako ro Gerar ve mandaman. 2Ro mov anya Abraham ikofen be kawasasya vo dove, Sara inido srar vyediri. Mura wairek Abimelekh iwan mamfyan vyeja fa rya dun Sara i fa ive nya ve swa.1 3Rov oso Allah fyasnai mankundi faro wairek Abimelekh ro mafafu ma ikofen, “Nari wamar, snar vin wun aniya; fyarvuk kwar.”

4Imbape Abimelekh pyan ro Sara i vaim, mura wairek ani ikofen, “Manseren Allah, yasasar va! Inja nari mun aya ma kawasa ayesineke? 5Abraham mankundi monda dove srar kasun vyediri ma vin anya kako dakawos radirya. Ayaine yafrur mnuk anya kuker snewar venapes ma vesren inja yave sasar va.”

6Muraido Allah kyarem be i ro mafafu radine, “Imbo Yafawi wafrur mnuk anya kuker snewar vesren. Yadwarek au kwar insa wafrur sasar awer ve Aya, inja Yamam monda au fa pan ro vin anya va. 7Kur ine veri, kwavri ve swari. Snar swari nabi rirya, ma nari vye nadi kuker au insa wamar awer. Imboi kwavri va ido, waswar epen, au ma kawasa besine kasiper nari mkomar!”

8Meser fyas ido, ro arwo baboya, Abimelekh dor faker vyesyakame, ma vye vadir roi vebor myam ro mafafu vyannakame. Sikame simkak fafayava. 9Raimnaido Abimelekh dor Abraham i ma ifuken i, “Rosai wafrur kwar faro nkonine? Sasar risaiso yafrur faro auya, evedar fa buk marindi ine faro aya, ma kawasa ayesine? Kaku veri roi wafrur maro aya anine imnis va. 10Wafrur rarirya kukro?” 11Abraham kyarem, “Yakara ro sneri radine, snonkaku vero dinensya simkak Allah i va, inja snonkaku eve snar vin yavuk anyansya nari smun aya fa yamar. 12Raimnai, inido srar ayediri. Nuna kam kma oser, imboi sna nuvesya vesisye, inja favye muma ido nuvuk nu. 13Fafisu Allah iwan aya fa yabur kamam rumya, yambran ro sup ve sup, yakofen faro vin yavuk anya, ‘Fasnai saswar ma vave syowi bena ve aya, isoine ve vadir faro snonkaku manseirya wer, ayaido srar bedi.’ ”

14Posa rodiya Abimelekh kyaver Sara i faro Abraham i, ma fafisu anya vyuk manfamyansya kuker domba ma sapi sya kako. 15Wairek anya ikofen faro Abraham i, “Ine sup ayedirya kasiper; kwain pdef ro mov risai wamarisenya.” 16Raimnaido dawos faro Sara i, “Yavuk kwar ve srar bani kumpan sarak syaran oser fa sve avyair faro snonkakusya kam fyasnai vadir wasren ma kaku veri swasarva.”

17-18Snar Abimelekh dun Sara i, evedar Manseren Allah ifrur fa vin vebor vero istana vyeja sya kam spasnasem. Posa Abraham vye nadi faro Allah I, ma Allah vyuk pararei faro Abimelekh, swari ma kako infamyan-infamyan vyesya, rarirya var vin ansya nari sikapar wer.