जकरयाह 8

यरुसलेम के फेरै बनामै के टीमा

1फेर सिपाही के यहोबा कर हइ बचन मोर लिघ्घो पहुंचिस, 2“सिपाही कर यहोबा हइ कथै, सिय्योन के निता मोके बडी जलन हुइस, पय बोहत गुस्सा मोर हे पइदा होय हबै। 3यहोबा हइ कथै, मै सिय्योन हे लउट आय हव, अउ यरुसलेम के बीच हे वास करिहों, अउ यरुसलेम सच्चाई के सहर कहाही, अउ सिपाही के यहोबा के डोंगर पवितर डोंगर कहाही। 4सिपाही के यहोबा हइ कथै, यरुसलेम के चउराहा हे फेरै डोकरा अउ डोकरी बोहत साल के होमै के कारन, अपन-अपन हाथ हे डन्डा लइके बइठे करहीं।1 5सहर के चउराहा हे टोरवा अउ टोरियन लग भर जइहिन, ऊ उहां खेलहिन-कुदहिन। 6सिपाही के यहोबा हइ कथै, अगर हइ रोज हे हइ बात हइ परजा के बचे हर के नजर हे अदभुत हबै, ता का हइ मोर नजर हे अदभुत होही? सिपाही के यहोबा के इहै बचन हबै? 7सिपाही के यहोबा हइ कथै, देखा, मै अपन परजा के बचाहूं अउ उनही पूरब लग लइके अउ पस्चिम तक लइ आनहुं। 8अउ मै उनही लइ आयके यरुसलेम के बीच हे बसाहूं, अउ उन मोर परजा ठहरहिन अउ मै उनखर भगवान ठहरिहों, हइ तो सच्चाई अउ के संग होही।” 9सिपाही के यहोबा हइ कथै, “तुम इन रोज हे बचन उन अक्किल बाले के मुंह लग सुने हबा, जउन सिपाही के यहोबा के भवन कर नीह डालै के टेम तुम्हर हाथ मजबूत होय, जेखर लग मंदिर बन सकै। 10उन रोजन के पहिले, न तो मनसे के मजदूरी मिलथै, अउ न पसु के भाडा। पय सतामै बालेन के कारन न तो आमै बाले के सान्ति मिलथै, अउ न जायबाले के, काखे मै सगलू मनसेन लग अक दूसर हे चढाई कराथों। 11पय अब मै हइ परजा के बचे हर लग असना बरताव नेहको करिहों, जसना कि पहिले के रोज हे करथै, सिपाही के यहोबा कर इहै बचन हबै। 12उन पूर सान्ति के संग खेती-किसानी करहिन, अउ सम्पन्न हुइहीं। अंगूर कर बगिया हे फडुहा लगी। भुंइ हे जादा मातरा हे फसल होही अउ आकास लग ओस के बरसा होही। मै अपन हइ मनसे के बच हर के हइ चीजन के साहब कर देहुं। 13हे यहूदा के परवार, अउ इस्राएल के परवार, जउन मेर तुम राज-राज के बीच बदनाम के कारन रथै, उहै मेर मै तुम्हर मुकति करिहों, अउ तुम आसीस के कारन हुइहा। इहैनिता तुम झइ डरइहा, अउ न तुम्हर हाथ ढील पडै पाबै।”2 14काखे सिपाही कर यहोबा हइ कथै, “जउन मेर जब तुम्हर पुरखा मोके गुस्सा देवाय रथै, तब मै उनखर नुकसान करै के ठान लय रथो, अउ फेर नेहको पछतायों, 15उहै मेर मै इन रोजन हे यरुसलेम कर अउ यहूदा के परवार के भलाई करै के ठान लय हव, इहैनिता तुम झइ डरइहा। 16जउन-जउन काम तुमके करै चाही, उन हइ हबै, अक दूसर के संग सही बात करबे, अपन अदालत हे सच्‍चाई कर अउ मेल-मिलाप के नीति के नियाव करबे, 17अउ अपन-अपन हिरदय हे अक दूसर के नुकसान के झइ सोचा, अउ झूठ किरिया लग माया झइ रखबे, काखे इन सगलू कामन लग मै नफरत करथो, यहोबा कर इहै बचन हबै।” 18फेर सिपाही के यहोबा कर हइ बचन मोर लिघ्घो पहुंचिस, 19“सिपाही के यहोबा हइ कथै, चउथा, पचमा, सतमा अउ दसमा महिना हे जउन-जउन उपास के रोज होथै, उन यहूदा के परवार के निता खुसी अउ मगन अउ खुसी के तेउहार के रोज हुइ जही, इहैनिता अब तुम सच्चाई अउ मेल-मिलाप लग माया रखा।”3 20“सिपाही के यहोबा हइ कथै, असना टेम आमै बाले हबै, कि देस-देस के मनसे अउ बोहत सहरन के रहै बाले आही। 21अउ अक्ठी सहर के रहै बाले दूसर सहर के रहै बालेन के लिघ्घो जायके कइहिन, यहोबा लग बिनती करै अउ सिपाही के यहोबा के खोजै के निता चला, मै तो जथो। 22बोहत देसन के अउ सक्ति-साली देस के मनसे यरुसलेम हे सिपाही के यहोबा के खोजै, अउ यहोबा लग बिनती करै के निता आही। 23सिपाही के यहोबा हइ कथै, उन रोज हे अलगे-अलगे कर भासा बोलै-बाले सगलू देस हे दस मनसे अक्ठी यहूदी डउका के कपडा के छोर के हइ कहिके पकड लइहिन, हम तुम्हर संग चलब, काखे हम सुने हबन, कि भगवान तुम्हर संग हबै।”