जकरयाह 10

मुकति कर टीमा

1बरसात के आखरी हे यहोबा लग बरसा मंगिहा, यहोबा लग जउन बिजली चमकत हबै, अउ ऊ उनके बरसा देही अउ हर अक्ठी के खेतवा हे फसल पइदा करही। 2काखे बेकार बिचार के बात करथै अउ भभिस्य कहैबाले झूठ दरसन देखथै अउ झूठ सपना सुनथै, अउ बेकार सान्ति देथै। हइ कारन मनसे गेडरा छेडिन के जसना भटक गइन अउ बरेदी नेहको होमै के कारन संकट हे पडे हबै। 3जउन मोर मनसेन हे सासन करथै , मै उनके सजा देहुं। काखे सिपाही के यहोबा अपन झुंड, मतलब यहूदा के परवार के दसा देखै के निता आही, अउ लडाई हे उनखर अपन हट्ठा कट्ठा घोडवा जसना बनइहे। 4यहूदा मसे खुटान के पथरा, उहै मसे खूंटी, उहै मसे लडाई कर धनही, उहै मसे सगलू परधान परगट हुइही। 5उन असना बीरन के जसना होही जउन लडाई हे अपन बैरिन के गली के चिखला के मेर कचरथै, उन लडहीं, काखे यहोबा उनखर संग रही, इहै कारन उन हिम्मत लग लडहीं अउ घोडसवारिन के आसरा टूटही। 6“मै यहूदा के परवार के बडा ताकतबर करिहों, अउ यूसुफ के परवार के मुकति करिहों। मोके उनखर हे दया आइस, हइ कारन मै उनके लउटाय लायके उनखरै देस हे बसइहों, अउ उन असना होही, मानो मै उनखर मन लग नेहको उतारिस, मै उनखर भगवान यहोबा हव, मै उनखर बिनती सुन लेहुं।” 7एप्रैम मनसे योध्धा के जसना होही, अउ उनखर मन असना खुसी होही जसना अंगूर के रस लग होथै। हइ देखके उनखर लरका खुसी मनइहीं अउ उनखर मन यहोबा के कारन खुस होही। 8“मै सीटी बजायके उनही अकजिघा करिहों, काखे मै उनके छंडाय बाले हव, अउ उन असना बढहीं जसना, पहिले बढे रथै। 9अगर मै उनके राज-राज के मनसेन के बीच बिथराय देहुं, तउमा उन दुरिहां-दुरिहां देसन हे मोके सुरता करइहीं, अउ अपन लरकन के संग जिन्दा लउट अइहीं। 10मै उनही मिस्र देस लग लउटाय लइहो अउ अस्सूर लग अक-जिघा करिहों, अउ गिलाद अउ लबानोन के देसन हे लइ आयके एतका बढइहों कि उहां उन समाय नेहको सकहिन। 11ऊ उस परेसान समुन्दर मसे हुइके ओखर लहरा के चीरत जही, अउ नील नदिया के सगलू गहिरा पानी सुखाय जही। अस्सूर कर घमंड टोरे जही, अउ मिस्र के राजदंड जात रही। 12मै उनही यहोबा दवारा बडा ताकत-बर करिहों, अउ उन ओखर नाम लग चलै फिरै,” यहोबा कर इहै बचन हबै।