Bhumiya
भजन 86
मदत के निता बिनती
हे यहोबा मोर बात हे कान लगा अउ मोके उत्तर दे,
काखे मै गरीब अउ जरूरत मंद हबो।
मोर परान के रक्छा कर, काखे मै तोर पुजारी हबो, तै मोर भगवान हबस,
इहैनिता अपन हरवाह के बचाय ले, मै तोर हे यकीन करथों।
हे मालिक, मोके किरपा कर,
काखे मै रात दिन तोके गोहराय हव।
हे मालिक, अपन सेबक के परान के खुसी कर,
काखे मै तोके धियान करथो।
हे मालिक, तय अच्छा अउ दयालु हबै,
तोर दुहाई देयबाले के निता तय करुना सागर हबै।
हे परभु,मोर बिनती पय धियान दे,
मोर बिनती के गोहार के सुन।
मै अपन संकट के रोज तोके गोहराथो,
काखे तय मोके जबाब देथस।
हे मालिक, देउतन हे तोर जसना कउनो हबै,
अउ तोर जसना काम अउ कउनो के हबै।
हे परभु सगलू देस के तहिन बनाय हबस,
सब आयके तोर आगू परनाम करहीं,
अउ तोर नाम के महिमा करहीं।1
काखे तहिन महान हबस, अउ अदभुत काम करे हबै,
केबल तहिन भगवान हबस।
हे परभु, मोके अपन गली दिखा,
कि मै तोर सच्चाई हे चलो,
मोके अक चित कर कि मै तोर नाम लग डरों।
हे मोर मालिक, मोर भगवान, मै पुरा हरदय लग गुनगान करिहों,
मै तोर नाम के महिमा सदा करत रइहों।
तय मोके जादा करुना करे हबै,
तय मिरतू के दुनिया के डुबोय लग बचाय करे हबै।
हे भगवान, मोके अभिमान बार करे हबै,
कुडकुडा मनसे के दल मोके मार डारे के परयास करथै
अउ ऊ मनसे तोर आदर नेहको करे हबै।
पय तय हे मालिक, दयालु, किरपालु, देर लग गुस्सा करैबाले,
करुना अउ सच्चाई लग भरपूर भगवान हबै।
हे भगवान, देख दे कि तय मोर सुने हबै,
अउ मोके किरपालु बना। मै तोर हरवाह हबो।
तय मोके बल दे। मै तोर सेबक हबो, मोर रक्छा कर।
अपन अच्छाई के निसान परगट कर,
मोर बैरी उके देख के लजाय जाय हे परभु,
तय मोर सहायता करे हबै, मोके धीरज भेंट करे हबै।
Source notes (1)
- Cross-reference परकासितवाक्य 15:4
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.