भजन 75

भगवान कर नियाव

परधान बजामै बाले कर निता, अलतसहेत राग हे आसाप कर भजन गाना

1हे भगवान, हम तोर धन्यबाद करथै,

हम तोर नाम कर धन्यबाद करथै काखे तोर नाम परगट हबै,

तोर चकितकामन वरनन होथै।

2तै कथस जब ठीक टेम आही

तब मै खुद निक्खा-निक्खा नियाव करिहों।

3जब भुंइ अपन सगलू रहैबालेन समेत डोलथै,

तब मै ओखर खम्भन कर स्थिर करथो।

4मै घमंडिन लग कथो, घमंड झइ करा, अउ दुस्टन, सींग ऊंच झइ करा।

5अपन सींग बोहत ऊंच झइ करा, मूंड उठाय के ढीठ कर बात बोला।

6काखे बढथै न तो पूरब लग पस्चिम लग,

अउ न पतेरा कर पल्ला लग आथै।

7पय भगवान न्यायी हबै,

ऊ अक्ठी के घटाथै अउ दूसर के बढाथै।

8यहोबा कर हाथ हे अक्ठी खोरिया हबै,

जेहमा अंगूर कर रस उफनत हबै,

ओहमा मसाला मिलाय हबै, अउ ऊ मसे उडेलथै,

निस्चय ओखर तलछट तक भुंइ के सगलू दुस्ट मनसे पी जही।

9पय मै हरमेसा परचार करत रइहों,

मै याकूब के भगवान कर भजन गइहों।

10दुस्टन के सगलू सींगन के मै काट डरिहों,

पय धरमी के सींग ऊंच करे जही।