Bhumiya
भजन 66
धन्यबाद अउ महिमा कर गाना
परधान बजामै बाले कर निता गाना भजन
हे सगलू भुंइ कर मनसे, भगवान कर निता जयजयकार करा,
ओखर नाम कर महिमा कर भजन गाबा,
ओखर स्तुति करत, ओखर महिमा करा।
भगवान लग कह, तोर काम भयांकर हबै,
तोर महासक्ति के कारन
बैरी तोर मीठ-मीठ बात करहिन।
सगलू भुंइ कर मनसे तोके परनाम करहिन
अउ तोर भजन गइहिन,
ऊ तोर नाम कर भजन गइहिन।
आबा भगवान कर कामन के देखा,
ऊ अपन कामन के कारन मनसे के भययोग देख पडथै।
ऊ समुंदर के सुखाय हर भुंइ कर डालिस,
ऊ महानदिया मसे पइदल-पइदल पार करके उतरिस।
उहां हम ओखर कारन खुसी हुइन,
जउन अपन सक्ति लग हरमेसा राज करथै,
अउ जेखर आंखी लग राज-राज के मनसे हे लगे रथै,
ढीठ मनसे अपन मूंड झइ उठामै।।
हे देस-देस कर मनसे, हमर भगवान के धन्य कहा,
अउ ओखर स्तुति हे सुर उठाबा,
जउन हमके जिन्दा रखथै,
अउ हमर गोड के फिसलै नेहको देथै।
काखे हे भगवान,
तै हमके जांच, तै हमके चांदी कर जसना सुध्द करे।
तै हमके जाला हे फंदाय
अउ हमर कनिहा हे भारी बोझ बांधे रथस।
तै घुडसवार के हमर मूंड कर उप्पर लग चलाय,
हम आगी अउ पानी लग हुइके गयन,
पय तै हमके बचायके सुख लग भर दय हबस।
मै आगीबलि लइके तोर भवन हे अइहों,
मै उन टीमा के तोर निता पूर करिहों,
जउन मै मुंह खोलके मांगो
अउ समस्या कर टेम कहे रथस।
मै तोके मोट पसुन के आगीबलि,
गेडरा कर चरबी के घाम सहित चढइहों,
मै बोकडा सहित गोरू चढइहों।
हे भगवान के सगलू डरै बाले आबा अउ सुना,
मै गुठेहूं कि ऊ मोर निता काहिन-काहिन करे हबै।
मै ओही गोहरायों,
अउ उहै के गुडनवाद मोर लग हुइस।
अगर मै मन हे बेकार कर बात सोचथों,
ता परभु मोर नेहको सुनथै।
पय भगवान तो सुने हबै,
ऊ मोर बिनती के पल्ला धियान दय हबै।
धन्य हबै भगवान,
जउन मोर बिनती अनसुनी नेहको करिस
अउ न मोर लग अपन करुना दुरिहां करिस।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.