भजन 54

बैरिन लग रक्छा कर निता बिनती

परधान बजामै बाले कर निता, दाऊद कर मस्कील तारबाले बाजन कर संग, जब जीपियन आयके साऊल लग कथै, का दाऊद हमर बीच हे लुकोय नेहको रथै?

1हे भगवान अपन नाम के दवारा मोर मुकति कर,

अउ अपन सक्ति लग मोर नियाव कर।

2हे भगवान, मोर बिनती सुन ले,

मोर मुंह के वचन के पल्ला कान लगा।

3काखे परदेसी मोर बिरुध्द उठे हबै,

अउ कुकरमी मोर परान के लेय बाले हबै,

उन भगवान के अपन आगू नेहको देखथै। (सेलाह)

4देखा, भगवान मोर मदतगार हबै,

परभु मोर परान के सम्हारै बालेन के संग हबै।

5ऊ मोर बैरिन के बुराई के उनके लउटाय देही,

हे भगवान, अपन सच्चाई के कारन उनखर बिनास कर।

6मै तोके खुद के इक्छा लग चढाहुं, हे यहोबा,

मै तोर नाम के धन्यबाद करिहों,

काखे हइ बढिहा हबै।

7काखे तै मोके सगलू दुखन लग छंडाय हबै,

अउ मै अपन बैरिन हे नजर करके संतुस्ट होय हबो।