Bhumiya
भजन 25
अगुवाई अउ रक्छा के निता बिनती
दाऊद कर भजन
हे यहोबा मै अपन मन के तोर पल्ला उठाथों।
हे मोर भगवान, मै तोर हे भरोसा रखे हबो,
मोके लज्जित झइ होय दे,
मोर बैरी मोर हे जयजयकार करै झइ पामै।
पय जेतका तोर बाट जोहथै, उन मसे कउनो लज्जित नेहको हुइही,
पय जउन बिना कारन बिस्वासघात करथै उन लज्जित हुइही।
हे यहोबा अपन रास्ता मोके दिखा,
अपन रस्ता मोके गुठे दे।
मोके अपन सत्य हे चला अउ सिक्छा दे,
काखे तै मोर मुकति करै बाले भगवान हबै,
मै दिन भर तोरै इन्तजार करथों।
हे यहोबा अपन दया अउ करुना के कामन के सुरता कर,
काखे उन तो अनंतकाल लग होउत आय हबै।
हे यहोबा, अपन भलाई के कारन मोर जबानी के पाप
अउ मोर अपराधन के सुरता झइ कर,
अपन करुना के जसना तै मोके सुरता कर।
यहोबा भला अउ सच्चा हबै,
इहैनिता ऊ पापिन के अपन रास्ता दिखाही।
ऊ दीन मनसेन के नियाय कर सिक्छा दइ, हव,
ऊ दीन मनसेन के अपन रस्ता दिखाही।
जउन यहोबा के टीमा अउ नियम के मानथै,
उनखर निता ओखर सगलू रस्ता करुना अउ सच्चाई हबै।
हे यहोबा अपन नाम कर खातिर
मोर अधरम के जउन बोहत हबै छमा कर।
जउन मनसे यहोबा के भय मानथै,
यहोबा उके उहै रस्ता हे जेखर लग ऊ मगन होथै चलाही।
ऊ कुसल लग बने रही,
अउ ओखर वंस ऊ देस कर साहब हुइहीं।
यहोबा कर भेद के उहै जानथै, जउन ओखर लग डरथै,
अउ ऊ अपन टीमा उनखर हे परगट करी।
मोर आंखी हरमेसा यहोबा हे टकटकी लगाय रथै,
काखे उहै मोर गोडन कर जाला मसे छंडाही।
हे यहोबा मोर पल्ला फिरके मोर हे अनुगरह कर,
काखे मै अकेल्ले अउ दुख हे हव।
मोर हिरदय कर पीरा बढ गय हबै,
तै मोके मोर दुख लग छंडाय ले।
तै मोर दुख अउ कस्ट हे नजर डाल,
अउ मोर सगलू पापन के छमा कर।
मोर बैरिन के देख कि उन कसना बढ गय हबै,
अउ मोर लग बडा बैर रखथै।
मोर परान के रक्छा कर अउ मोके छंडा मोके लज्जित झइ होय दे,
काखे मै तोर सरन हे आय हबो।
इमानदार अउ सच्चाई लग मोके सुरक्छित रख,
काखे मोके तोर आसरा हबै।
हे भगवान इस्राएल के
ओखर सगलू संकट लग छंडाय ले।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.