भजन 24

महिमामय राजा

दाऊद कर भजन

1भुंइ अउ जउन कुछु ओहमा हबै यहोबा कर हबै,

दुनिया अउ ओहमा निबास करै बाले भी।

2काखे उहै ओखर नीह समुन्दर के उप्पर मजबूत करके रखिस,

अउ बडी नदी के उप्पर स्थिर करे हबै।

3यहोबा के डोंगर हे कोनहर चढ सकथै?

अउ ओखर पवितर ठहुंड हे कोनहर ठाड हुइ सकथै?

4ऊ जेखर हाथ के काम निरदोस अउ हिरदय सुध्द हबै,

जउन अपन मन के बेकार बात के पल्ला नेहको लगाइस,

अउ न कपट लग किरिया खाय हबै।1

5ऊ यहोबा के पल्ला लग आसीस पाही,

अउ अपन मुकति करैबाले भगवान के पल्ला लग धरमी ठहरही।

6असनै मनसे ओखर खोजइया हबै,

ऊ तोर दरसन के खोजइया याकूबवंसी हबै।

7हे फेरका, अपन मूंड ऊंच उठावा,

हे सनातन के दवारा, ऊंच हुइ जा,

काखे महिमा कर राजा परवेस करही।

8हइ महिमा कर राजा कोनहर हबै?

परभु बल अउ बडा राजा परभु,

युध्द हे बडा राजा हबै।

9हे फेरका, अपन मूंड ऊंच करा,

हे सनातन कर दूरा, तुमो उघर जा,

काखे बडा राजा परवेस करी।

10ऊ महिमा कर राजा कोनहर हबै?

सर्वसक्तिमान यहोबा उहै बडा राजा हबै।