भजन 2

परभु कर अभिसिक्त राजा कर घोसना

1काखे राज साजिस करथै?

काखे अलग-अलग देस बेकार जाल फइलाथै?

2परभु अउ ओखर अभिसिक्त राजा के बिरोध हे,

संसार के राजा बिचार करे हबै,

सासक एक संग साजिस करे हबै।

3उन कथै, “आबा हम उनखर बेडी टोर डारी,

अपन उप्पर लग उनखर बन्धन के डोरा उतार फटकी।”

4मालिक जउन स्वरग हे बिराजमान हबै, हंसही,

ऊ उनखर ठट्ठा मजाक उडाही।

5तब ऊ अपन गुस्सा लग उनके बात करी,

ऊ गुस्सा हे उनखर लग हइ कही।

6“मै अपन पवितर डोंगर सिय्योन के सिहांसन हे

अपन राजा के सम्मानित करे हबै।”

7मै ऊ बचन कर परचार करिहों, जउन यहोबा भगवान मोर लग गुठेय हबै,

“तै मोर टोरवा हबस,

आज लग मै तोर बाफ बन गय हबो।

8मोर लग मांग मै राज-राज कर मनसेन के तोर धन डेरा होय के निता,

अउ दुरिहां-दुरिहां कर देस के तोर खास भुंइ बनै के निता दइ दइहों।

9तै उनही लोह कर सरिया लग खन्डा-खन्डा करहे,

तै कुम्हरा कर बरतन के जसना उनही चकनाचूर कर डरिहे।”

10हे दुनिया कर राजा हइ चेतावनी सुना,

हे दुनिया कर सासक, हइ सबक सीखा।

11डेरात यहोबा कर सेबा करा,

अउ कांपत हर खुस हुइहा।

12पूर सच्चाई लग टोरवा कर इज्जत करा,

असना झइ होय कि ऊ गुस्सा करै,

अउ तुम गली हे नस्ट हुइ जा, काखे ओखर गुस्सा हरबी भडकै बाले हबै

धन्य हबै, उन सगलू जउन परभु कर सरन लेथै।