भजन 17

निरदोस मनसे कर बिनती

दाऊद कर बिनती

1हे यहोबा भगवान सच्चाई कर बचन सुन,

मोर आरो के तरफ धियान दे। मोर बिनती के तरफ

जउन निसपाप मुंह लग निकडथै, कान लगा।

2मोर मुकदमा के फइसला तोर आगू होय,

तोर आंख नियाव हे लगे रहै।

3तै मोर हिरदय के जांचे हबस,

तै रात के मोके देखे हबस,

तै मोके परखे पय कुछु गलती नेहको पाय,

मै ठान लय हव, कि मोर मुंह लग

पाप कर बात नेहको निकलही।

4जिहा तक मोर मनसे के काम के संबंध हबै,

तोर मुंह के सब्द के दवारा मै लडाई के गली लग खुद के बचाय हव।

5मोर गोड तोर गली हे मजबूत रहै,

गोड झइ खसलै।

6मै तोके गोहराथो, काखे हे भगवान, तै मोके उत्तर दइहे,

अपन कान मोर तरफ कर, मोर सब्दन के सुन।

7तै जउन अपन दहिना हाथ कर दवारा अपन सरनगतन के उनके बैरिन लग बचाउत हबै,

अपन अदभुत करुना देखा।

8अपन आंखी के पुतली कर जसना संभार,

अपन पोखडी के तरी मोके लुकाय रख।

9उन दुस्टन लग, जउन मोके हमला करथै,

मोर परान के बैरिन लग जउन मोके घेरथै।

10उन अपन हरदय के पथरा बनाय लय हबै,

उन अपन मुंह लग घमंड के बचन निकाडथै।

11उन कदम-कदम हे हमही घेरे हबै,

उन हमही भुंइ हे पटक देय के निता घात लगाय हबै।

12उन ऊ बघवा के जसना हबै, जउन अपन सिकार के लालच करथै,

उन सग्यान बघवा के जसना घात लगामै के जिघा हे बइठे रथै।

13हे भगवान उठ, उनखर लग सामना कर अउ उके पटक दे,

अपन तलबार के बल लग मोर परान के दुस्ट लग बचा ले।

14अपन हाथन बढाय के हे यहोबा,

मोके बैरिन लग बचा, भुंइ के उन डउकन लग जिनखर भाग इहै जीवन हे हबै,

मोर परान के मुक्त कर उनखर पेट तोर सजा भंडार लग भर जाय,

उनखर टोरवन के जादा लग जादा सजा मिले,

उन अपन लरकन के निता भरपूर सजा छांड जाय।

15पय मै तो धरमी हुइके तोर मुंह के दरसन करिहों,

जब मै जगिहों तब तोर रूप लग सन्तुस्ट हुइहों।