भजन 141

संझा कर बिनती

दाऊद कर गाना

1हे यहोबा, मै तोके गोहराय हबै, मोर निता हरबी कर

जब मै तोके गोहरइहों, तब मोर पल्ला कान लगा

2मोर बिनती तोर आगू सुगंध घाम,

अउ मोर हाथ पसार के, सांझ के टेम दानाबलि ठहराय।

3हे यहोबा, मोर मुंह हे चउकीदार बइठा,

मोर बिबरा कर दूरा के रखबाली कर।

4मोर मन कसना बेकार बात कर पल्ला फिरै नेहको देय,

मै बेकार काम करै डउकन के संग,

दुस्ट कामन हे नेहको लगइहों,

अउ मै उनखर निक्खा खाना चीजन मसे कुछु नेहको खइहों।

5धरमी मोके के मारै तउन हइ किरपा माने जही,

अउ ऊ मोके डांट देय, हइ मेर मूंड हे तेल ठहराही,

मोर मूंड उनखर लग मना नेहको करही। मनसेन के बुरा काम करै हे मै बिनती हे लगे रइहो।

6जब उनखर नियाव पटपर के लिघ्घो गिराय गइस,

तब उनही मोर बचन सुनै के निता, काखे ऊ मधुर हबै।

7उन कइहिन, जसना कउनो नागर चलायके भुंइ के चीरथै,

ओसनेन हमर हाडा मरघटी के मुंह हे बगरे पडे हबै।

8पय हे यहोबा परभु, मोर आंखी तोर पल्ला लगे हबै,

मै तोर सरन हव,

तै मोर परान जाने नेहको दइस।

9मोके उहै फांदा लग जउन उन मोर निता लगाय हबै,

अउ बेकार मनसे के जाला लग मोर रक्छा कर।

10दुस्ट मनसे अपन जालन हे तहिच फंसिहे,

अउ मै बच निकरो ।