भगवान कर नियम
आलेफ
धन्य हबै ऊ जिनखर जीवन निरदोस हबै,
अउ यहोबा कर नियम हे चलथै।
का धन्य हबै ऊ जउन ओखर आदेसन के मानथै,
अउ भरपूर मन लग उके खोजथै।
फेर उन बेकार काम नेहको करथै,
उन ओखर गली हे चलथै।
हे परभु तै अपन नियम इहैनिता दय हबस,
कि उन यतन लग माने जाय।
निक्खा होतिस कि तोर नियम के मानै कर निता
मोर चालचलन मजबूत हुइ जाय।
तब मै तोर सगलू आदेसन के पल्ला धियान लगाय रइहों,
अउ मै लज्जित नेहको हुइहों।
जब मै तोर धरम कर नियमन के सिखहों,
तब तोर धन्यबाद सीधा मन लग करिहों।
मै तोर नियमन के मनिहों,
मोके पूर रीति लग झइ छांड।
भगवान कर नियम के मानैके
बेथ
सग्यान अपन चाल के कउन उपाय लग सुध्द रखै?
तोर बचन कर जसना सावधान रहै लग।
मै पूर मन लग तोर खोज हे लगे हव,
मोके अपन आदेसन के उलंघन करै लग रोक।
मै तोर बचन के अपन हिरदय हे रख छांडे हव,
कि तोर बिरुद्ध पाप झइ करों।
हे यहोबा, तै धन्य हबस,
मोके अपन नियमन के सिखा।
तोर सगलू गुठे हर नियमन के वरनन,
मै अपन मुंह लग करे हबो।
मै तोर नियम के पालन करै हे ओसनेन मगन होत हबो,
जसना कउनो मनसे बोहत जादा धन डेरा लग मगन होत हबो।
मै तोर सिक्छन हे धियान करिहों,
अउ तोर रास्ता के पल्ला नजर रखिहों।
मै तोर नियमन लग सुख पइहों,
अउ तोर बचन के नेहको बिसरिहों।
भगवान कर नियम हे खुसी
गिमेल
अपन हरवाह के उपकार कर कि मै जिंदा रहों,
अउ तोर बचन हे चलत रइहों।
मोर आंखी खोल दे, कि मै
तोर नियम कर अदभुत बात देख सकों।
मै तउन भुंइ हे परदेसी हबो,
अपन आदेसन के मोर लग झइ लुकाय रख।
मोर मन तोर नियमन कर
इक्छा के कारन हर टेम दुखी रथै।
तै घमंडिन के, जउन सरापित हबै,
डांटे हबस, उन तोर आदेसन लग भटके हर हबै।
मोर नाम धराई अउ बेज्जति दुरिहां कर,
काखे मै तोर आदेसन के पकडे रहों।
इहैनिता साहब बइठे हर खुदय हे मोर बुराई करथै,
तोर हरवाह तोर नियमन कर पालन करत रही।
तोर नियम मोके मगन करथै,
ऊ मोर सलाहकार हबै।
भगवान कर नियम के मानै के सोच
दाल्थ
मै कुदरा हे पडे हबो,
तै अपन बचन कर जसना मोके जिया।
मै अपन चालचलन के तोर लग बिस्तार करे हबै,
अउ तै मोर बात मान लय हबस, तै मोके अपन नियमन के सिखा।
मोके अपन नियमन के समझै हे मदत कर,
ता मै तोर चकित कामन हे धियान करिहों।
मोर मन दुख लग थके हर हबै,
तै अपन बचन के जसना मोके ताकत दे।।
मोके झूठ कर गली लग दुरिहां कर,
अउ करुना करके अपन नियम मोके सिखाय दे।
मै सच्चाई के गली चुन लय हबै,
मै तोर फइसला हे धियान दय हबै।
हे यहोबा, मै तोर बिधिन लग मगन हबो,
मोके लज्जित झइ होय दे।
जब तै मोर समझ के बढाय हबै,
तब मै तोर आदेसन कर गली हे दउरिहों।
समझ कर निता बिनती
हे
हे यहोबा, मोके अपन नियम के गली दिखाय दे,
ता मै उके आखरी तक पकरे रइहों।
मोके समझ दे, तब मै तोर नियम के पकरे रइहों,
अउ पूर मन लग ओहमा चलिहों।
अपन आदेसन के गली हे मोके चला,
काखे मै उहै लग मगन हबो।
मोर मन के अपन नियमन के पल्ला फेर दे,
मोर मन के लालच के पल्ला नेहको।
मोर आंखी के बेकार चीजन के पल्ला लग फेर दे,
तै मोके अपन गली हे जिन्दा रख।
तोर बचन जउन भय मानै बालेन कर निता हबै,
उके अपन हरवाह के खातिर पूर कर।
मोके बेज्जति लग बचा मै डरथों,
उके दुरिहां कर, काखे तोर नियम बढिहा हबै।
मै तोर आदेसन के पालन करै चाहथों,
मोके नबा जीवन दे, काखे तै नेक हबस।
भगवान के नियम हे यकीन
वाव
हे यहोबा, तोर करुना अउ तोर करे हर मुकति,
तोर बचन के जसना, मोके मिलै।
ता मै अपन नामधराई करै बालेन के कुछ जबाब दइ सकिहों,
काखे मोर यकीन, तोर बचन हे हबै।
मोके अपन सही बचन कहै लग झइ रोक,
काखे मोर आसरा तोर नियमन हे हबै।
ता मै तोर नियम हे लगेतार,
हरमेसा-हरमेसा चलत रइहों।
अउ मै चउडा जिघा हे चले फिरे करिहों,
काखे मै तोर संदेसन कर सुरता रखे हबो।
अउ मै तोर चितउनिन कर चरचा राजन कर आगू करिहों,
अउ संकोच नेहको करिहों।
काखे मै तोर आदेसन के कारन सुखी हबो,
अउ मै उनखर लग माया रखथों।
मै तोर आदेसन कर पल्ला जिनखर लग मै माया रखथों, हाथ पसरिहों,
अउ तोर नियम हे धियान करिहों।
भगवान कर नियम हे आसरा
जैन
जउन टीमा तै अपन हरवाह के दय हबस, उके सुरता कर,
काखे तै मोके आसरा दय हबस।
मोर दुख हे सान्ति उहै लग होय हबै,
काखे तोर बचन के दवारा मै जीवन पाय हबो।
घमंडी मोके बोहत मजाक उडाय हबै,
तउभरमा मै तोर नियम लग नेहको हटों।
हे यहोबा, मै तोर पुरान नियम के सुरता
करके सान्ति पाय हव।
जउन दुस्ट नियम के छांडे हर हबै,
उनखर कारन मै दुख लग जलथों।
जिहां मै परदेसी हुइके रथों, उहां तोर नियम,
मोर गाना गामै के बारे हे बने हबै।
हे यहोबा, मै रात के तोर नाम सुरता करेव,
अउ तोर नियम हे चले हबो।
हइ मोर लग हइ कारन हुइस,
कि मै तोर उपदेसन के पकरे हर रथों।
भगवान कर नियम के परति भक्ति
खेथ
यहोबा मोर सब कुछ हबै,
मै तोर बचन के जसना चलै के निस्चय करे हबो।
मै पूर मन लग तोके मनाय हबो,
इहैनिता अपन बचन के जसना मोर हे अनुगरह कर।
मै अपन चालचलन के सोंचो,
अउ तोर चितउनिन के रस्ता लयों।
मै तोर आदेसन के मानै लग देरी नेहको,
पय हरबी करे हबो।
मै दुस्टन कर डोरन लग बन्ध गय हबो,
तउभरमा मै तोर नियम के नेहको बिसरों।
तोर धरम कर नियम के कारन
मै आधी रात के तोर धन्यबाद करै के उठिहों।
जेतका तोर भय मानथै अउ तोर संदेसन हे चलथै,
उनखर मै सखा हबो।
हे यहोबा, तोर करुना माया भुंइ हे भरे हर हबै,
तै मोके अपन नियम के सिखा।
भगवान के नियम कर कीमत
टेथ
हे यहोबा, तै अपन बचन के जसना
अपन हरवाह के संग भलाई करे हबस।
मोके भली सोंच सकति अउ ग्यान दे,
काखे मै तोर आदेसन के बिस्वास करे हबो।
ओखर लग पहिले मै दुखी होंयो,
मै भटकत रथों, पय अब मै तोर बचन के मानथों।
तै भला हबस, अउ भला करथस,
मोके अपन नियमन के सिखा।
घमंडी तो मोर बिरुध्द झूठ बात गढथै,
पय मै तोर सिक्छन के पूर मन लग पकरे रइहों।
ओखर मन मोट हुइ गय हबै,
पय तोर नियम के कारन सुखी हबो।
मोके जउन दुख होय हबै, ऊ मोर निता भला होय हबै,
जेखर लग मै तोर नियम के सीख सकों।
तोर दय हर नियम मोर निता हजार रुपिया
अउ सोन चांदी लग बढिहा हबै।
भगवान के नियम कर नियाव
योध
तोर हाथन लग मै बनाय अउ रचे गय हबो,
मोके समझ दे, कि मै तोर आदेसन के सीखों।
तोर लग डरै बाले मोके देखके मगन हुइहीं,
काखे मै तोर बचन हे आसरा लगाय हबो।
हे यहोबा, मै जान गयों कि तोर नियम निक्खा हबै,
अउ तै अपन सच्चाई के जसना मोके सजा दय हबस।
मोके अपन करुना लग सान्ति दे,
काखे इहैनिता तै अपन हरवाह के असना बचन दय हबस।
तोर दया मोर हे होय, ता मै जिन्दा रइहों,
काखे मै तोर नियम लग सुखी हबो।
घमंडिन के आसरा टूटै, काखे उन मोके झूठ के दवारा गिराय दय हबै,
पय तोर संदेस हे धियान करिहों।
जउन तोर भय मानथै, उन मोर पल्ला फिरै,
ता उन तोर चितउनिन के समझ लइहीं।
मोर मन तोर नियमन के मानै हे सिध्द हुइ जा,
असना झइ होय कि मोके लज्जित होय के पडै।
परभु के नियम हे बिस्वास
काफ
मोर परान तोर मुकति के निता बेचैन हबै,
पय मोके तोर बचन हे आसरा रथै।
मोर आंखी तोर बचन के पूर होय के इंतजार करत-करत धुंधरी पड गय हबै,
अउ मै कथों, कि मोके कब सान्ति दइहे?
काखे मै कुहिरा हे करेव कुप्पी कर जसना हुइ गय हबो,
तउभरमा तोर नियम के नेहको बिसरों।
तोर हरवाह के केतका रोज रहि गय हबै?
तै मोर पाछु पडे हरन के सजा कब दइहे?
घमंडी जउन तोर नियम के जसना नेहको चलथै,
उन मोर निता खोदरा खोदे हबै।
तोर सगलू आदेस बिस्वासओग हबै,
उन मनसे झूठ बोलत मोर पाछु पडे हबै, तै मोर मदत कर।
उन मोके भुंइ लग मिटाय डारे हे रथै,
पय मै तोर संदेसन के नेहको छांडेव।
अपन करुना के जसना मोके जिंदा कर,
ता मै तोर दय हर चितउनी के मनिहों।
भगवान के नियम हे बिस्वास
लामेध
हे यहोबा, तोर बचन आकास हे
हरमेसा स्थिर रथै।
तोर सच्चाई पीढी-पीढी बने रथै, भुंइ के स्थिर करे,
इहैनिता ऊ बने हबै।
उन आज के रोज तोर नियम के जसना ठहरे हबै,
काखे सगलू रचना तोर वस हे हबै।
अगर तोर नियम लग सुखी नेहको होतों,
ता मै दुख के टेम नास हुइ जातों।
मै तोर संदेसन के कबहुन नेहको बिसरिहों,
काखे उनखरै दवारा तै मोके जिंदा करे हबस।
मै तोर हबो, तै मोर मुकति कर,
काखे मै तोर संदेसन के सुरता रखथों।
बैरी मोर नास करै के निता मोर घात हे लगे हबै,
पय मै तोर चितउनिन हे धियान करथों।
जेतका बात पूरा जान पडथै, उन सगलू के तो मै आधा पाय हबो,
पय तोर आदेस के बिस्तार बडा हबै।
परभु के नियम कर परति माया
मीम
ओहो, मै तोर नियम लग कसना माया रखथों,
दिन भर मोर धियान उहै लगे रथै।
तै अपन आदेसन के दवारा मोके अपन बैरिन लग अधिक हुसियार करथै,
काखे उन हरमेसा मोर मन हे रथै।
मै अपन सगलू सिक्छिकन लग बोहत समझ रखथों,
काखे मोर धियान तोर चितउनिन हे लगे हबै।
मै सियानन लग समझदार हबो,
काखे मै तोर संदेसन के पकडे हर हबो।
मै अपन गोडन के हर अक्ठी बेकार रस्ता लग रोक रखे हबै,
जेखर लग मै तोर बचन के जसना चलो।
मै तोर नियम लग नेहको हटेव,
काखे तै मोके सिक्छा दय हबस।
तोर बचन मोके कसना मीठ लगथै,
उन मोर मुंह हे मधुरस लग मीठ हबै।
तोर संदेस के कारन मै समझदार हुइ जथों,
इहैनिता मै सगलू असत्य रस्ता लग बैर रखथों।
भगवान के नियम कर उजियार
नून
तोर बचन मोर गोड कर निता चिमनी,
अउ मोर रस्ता कर निता उजियार हबै।
मै टीमा किरिया खायों, अउ ठान लय हबो,
कि मै तोर धरम कर नियम के जसना चलिहों।
मै जादा दुख हे पडे हबो, हे यहोबा,
अपन बचन के जसना मोके जिया।
हे यहोबा, मोर बचन के सुध्द बलि जानके गरहन कर,
अउ अपन नियम के मोके सिखा।
मोर परान लगेतार मोर हथेली हे रथै,
तउमा मै तोर नियम के नेहको बिसरों।
बैरी मोर निता फन्दा लगाय हबै,
पय मै तोर संदेसन कर रास्ता लग झइ भटका।
मै तोर चितउनिन के हरमेसा के निता अपन निज भाग कर लय हबो,
काखे उन मोर हिरदय के खुसी के कारन हबै।
मै अपन मन के हइ बात हे लगाय हबै,
के आखरी तोर नियम हे हरमेसा चलत रहों।
भगवान के नियम हे सुरक्छा
सामेख
मै दुइचिता लग बैर रखथों,
पय तोर नियम लग माया रखथों।
तै मोर आड अउ ढाल हबस,
मोर आसरा तोर बचन हे हबै।
हे बिरोधी, मोर लग दुरिहां हुइ जा,
कि मै अपन भगवान के आदेसन के पकडे रहों।
हे यहोबा, अपन बचन के जसना मोके सम्हार,
कि मै जिंदा रहों, अउ मोर आसरा के झइ टोर।
मोके थाम रख, तब मै बचे रइहों,
अउ लगेतार तोर नियम के पल्ला धियान लगाय रइहों।
जेतका तोर नियमन के रस्ता लग भटक जथै,
उन सगलू के तै बेकार जानथस, काखे उनखर चतुराई झूठ हबै।
तै भुंइ के सगलू बैरिन के धातु के मइल के जसना दुरिहां करे हबै,
हइ कारन मै तोर चितउनिन लग माया रखथों।
तोर भय मोर देह कांप उठथै,
अउ मै तोर नियम लग डरथों।
भगवान कर नियम के मानैके
ऐन
मै तो नियाव अउ धरम कर काम करे हबै,
तै मोके अंधेर करैबाले के हाथ हे झइ छांड।
अपन दास के भलाई के निता जमानत दे,
ताकि घमंडी मोर हे अंधेर झइ करै पामै।
मोर आंखी तोर लग मुकति पामै,
अउ तोर धरम कर बचन के पूर होय के इंतजार करत-करत अंधिडिया गयों।
अपन हरवाह के संग अपन करुना के जसना बरताव कर,
अउ अपन नियम के मोके सिखा।
मै तोर हरवाह हबो, तै मोके समझ दे,
कि मै तोर चितउनिन के समझो।
ऊ टेम आय हबै, कि यहोबा काम करे,
काखे मनसे तोर नियम के टोर दय हबै।
हइ कारन मै तोर आदेसन के सोन लग,
पय कुन्दन लग जादा पिरिया मानथों।
इहै कारन मै तोर सगलू संदेस के सगलू बारे हे निक्खा जानथों,
अउ सगलू असत्य रास्ता लग बैर रखथों।
भगवान कर नियम हे चलै के इक्छा
पे
तोर चितउनिन अदभुत हबै,
हइ कारन मै उनके अपन जी लग लगाय हर हबो।
तोर बातन के खुलै लग उजियार होथै,
ओखर भोले मनसे समझ पाय करथै।
मै मुंह खोलके हांफे लगों,
काखे मै तोर आदेस के इक्छा करथों।
जसना तोर रीति अपन नाम के माया रखै बालेन लग हबै,
ओसनेन मोर पल्ला फेरके मोर हे अनुगरह कर।
मोर गोड के अपन बचन के रस्ता हे स्थिर कर,
अउ कउनो बेकार बात के मोर हे सासन झइ करै दे।
मोके मनसे के अतियाचार लग छंडाय ले,
ता मै तोर संदेस के मनिहों।
अपन हरवाह हे अपन मुंह के उजियार चमकाय दे,
अउ अपन नियम मोके सिखा।
मोर आंखी लग पानी कर धार बहत रथै,
काखे मनसे तोर नियम के नेहको मानथै।
भगवान कर नियम के नियाव
सादे
हे यहोबा तै नेक हबस,
अउ तोर नियम सीधा हबै।
तै अपन चितउनिन के नेक
अउ पूरा सही लग कथै।
मै तोर धुन हे भसम होथों,
काखे मोर सतामै बाले तोर बचन के बिसर गय हबै।
तोर बचन पूर रीति लग ताय हर हबै,
इहैनिता तोर हरवाह ओखर लग माया रखथै।
मै नान अउ बेकार हबो,
तउमा मै तोर संदेस के नेहको बिसरथों।
तोर नेक हरमेसा हबै,
अउ तोर नियम सही हबै।
मै संकट अउ दुख हे फंसे हबो,
पय मै तोर आदेसन लग सुखी हबो।
तोर चितउनी हरमेसा नेक मनसे के हबै,
तै मोके समझ दे कि जिंदा रहों।
छंडामै कर निता बिनती
काफ
मै सगलू मन लग बिनती करे हबो, हे यहोबा मोर सुन ले,
मै तोर नियम के पकडे रइहों।
मै तोर लग बिनती करेव, तै मोर मुकति कर,
अउ मै तोर चितउनिन के माने करिहों।
मै सुबेन्नेन लग आगू बिनती करेव,
मोर आसरा तोर बचन हे रथै।
मोर आंखी रात के अक पहर लग पहिले खुल गइस,
कि मै तोर बचन हे धियान करों।
अपन करुना माया के जसना मोर सुन ले,
हे यहोबा, अपन रीति कर जसना मोके जिंदा कर।
जउन बैरिन के धुन हे हबै, उन लिघ्घो आय गय हबै,
उन तोर नियम लग दुरिहां हबै।
हे यहोबा, तै लिघ्घो हबस,
अउ तोर सगलू आदेस सही हबै।
बोहत टेम लग मै तोर चितउनिन के जानथों,
कि तै उनखर नीह हरमेसा के निता डाले हबस।
मदत के गुहार
रेस
मोर दुख के देखके मोके छंडाय ले,
काखे मै तोर नियम के बिसर नेहको गयों।
मोर मुकदमा लड, अउ मोके छंडाय ले,
अपन बचन के जसना मोके जिंदा कर।
बैरिन के मुकति मिलै के कठिन हबै,
काखे उन नियमन के सुरता नेहको रखथै।
हे यहोबा, तोर दया तो बडा हबै,
इहैनिता अपन नियमन के जसना मोके जिंदा कर।
मोर पाछु करैबाले अउ मोर सतामै बाले बोहत हबै,
पय मै तोर चितउनिन लग नेहको हटथो।
मै बिस्वासघातिन के देखके उदास होयों,
काखे उन तोर बचन के नेहको मानथै।
देख, मै तोर नियम लग कसना माया रखथों, हे यहोबा,
अपन करुना कर जसना मोके जिंदा कर।
तोर सगलू बचन सही हबै,
अउ तोर अक अक्ठी नेक मनसे कर नियम हरमेसा काल तक मजबूत हबै।
भगवान कर नियम के परति समरपन
सीन
सासक बेकार मोर पाछु पडे हबै,
पय मोर हिरदय तोर बचनन के भय मानथै।
जसना कउनो बडी लूट पायके खुस होथै,
ओसनेन मै तोर बचन के कारन खुस हव।
झूठ लग मै बैर अउ घिरना रखथों,
पय तोर नियम लग माया रखथों।
तोर नेक कर नियमन के कारन
मै रोजदिन सात बेर तोर भजन करथों।
तोर नियम लग माया रखैबाले के बडी सान्ति होथै,
अउ उनके कुछ ठोकर नेहको लगथै।
हे यहोबा, मै तोर लग मुकति पामै के आसरा रखथों,
अउ तोर आदेसन हे चलत आय हबो।
मै तोर चितउनिन के जी लग मानथों,
अउ उनखर लग बोहत माया रखत आय हबो।
मै तोर संदेसन अउ चितउनिन के मानत आय हबो,
काखे मोर सगलू चालचलन के तोर आगू परगट हबै।
मदत कर निता बिनती
ताव
हे यहोबा, मोर बिनती तोर तक पहुंचै,
तै अपन बचन कर जसना मोके समझ दे।
मोर गिडगिडाना तोर तक पहुंचै,
तै अपन बचन के जसना मोके छंडाय ले।
मोर मुंह लग भजन निकरे करै,
काखे तै मोके अपन नियम के सिखाथस।
मै तोर बचन कर गाना गइहों,
काखे तोर सगलू आदेस नेक कर हबै।
तोर हाथ मोर मदत करै के तइयार रथै,
काखे मै तोर संदेस के अपनाय हबो।
हे यहोबा, मै तोर लग मुकति पामै के इक्छा करथों,
मै तोर नियम लग सुखी हबो।
मोके जिंदा कर, अउ मै तोर भजन करिहों,
तोर नियमन लग मोर मदत होय।
मै भुलाय हर गेडरा कर जसना भटकथों,
तै अपन हरवाह के डटे ले,
काखे मै तोर आदेसन के बिसर नेहको गयों।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.