Bhumiya
भजन 118
बिजय कर निता धन्यबाद के बिनती
यहोबा कर धन्यबाद करा, काखे ऊ भला हबै,
अउ ओखर करुना हरमेसा के हबै।
इस्राएल मनसे कथै,
ओखर करुना हरमेसा कर हबै।
हारुन कर घराना कथै,
ओखर करुना हरमेसा के हबै।
यहोबा के भजन करै बाले कथै,
ओखर करुना हरमेसा के हबै।
मै दुख हे भगवान के गोहरायों, भगवान मोर सुनके,
मोके दुख लग अजाद करिस।
यहोबा मोर पल्ला हबै, मै नेहको डरहुं,
मनसे मोर काहिन कर सकथै?
यहोबा मोर पल्ला मोर सहयोग करे हबै,
मै अपन बैरिन कर देखके संतुस्ट हुइहों।
यहोबा कर सरन लइके,
मनसे हे यकीन रखै लग भला हबै।
यहोबा कर सरन लइके,
परधान हे यकीन रखै लग भला हबै।
सगलू देस मोके घेर लय हबै,
पय यहोबा कर नाम लग मै निस्चय उनके नास कर डरिहों।
उन मोके घेर लय हबै, बिगर संकोच करे घेर लय हबै,
पय यहोबा कर नाम लग मै निस्चय उनके नास कर डरिहों
उन भमर माछी के जसना घेर लय हबै,
पय कांटन के आगी के जसना उन बुझाय गइन,
यहोबा कर नाम लग मै निस्चय उनही नास कर डरिहों।
तै मोके ढकेल दय रथस, कि मै गिर पडों,
पय यहोबा मोर मदत करिस।
भगवान मोर बल अउ भजन कर बिसय हबै,
ऊ मोर मुकति करइया ठहरे हबै।
नेक मनसेन कर तम्बुन हे जयजयकार अउ मुकति के आरो होथै,
यहोबा कर दहिना हाथ लग पराकरम के काम होथै।
यहोबा कर दहिना हाथ ऊंच होय हबै,
यहोबा कर दहिना हाथ लग पराकरम कर काम होथै।
मै नेहको मरिहों, पय जिन्दा रइहों,
अउ भगवान कर कामन के वरनन करत रइहों।
भगवान मोर बडी ताडना करे हबै,
पय मोके मिरतू के बस हे नेहको करिस।
मोर निता धरम के दूरा खोला
मै उनखर लग परबेस करके यहोबा कर धन्यबाद करिहों।
यहोबा कर दूरा इहै हबै,
एखर लग नेक मनसे परबेस करै पइहीं।
हे यहोबा, मै तोर धन्यबाद करिहों,
काखे तै सुन लय हबस, अउ मोर मुकति ठहर गय हबस।
राजमिस्तिरी जउन पथरा के बेकार ठहराय रथै,
उहै कोन्टा कर नीह बन गय हबै।
हइ यहोबा कर पल्ला लग होय हबै,
हइ हमर नजर हे अदभुत हबै।
आज ऊ रोज हबै जउन यहोबा बनाय हबै,
हम एहमा मगन अउ खुस हुइ।
हे यहोबा, बिनती सुन, मुकति कर,
हे यहोबा, बिनती सुन, सफल कर।
धन्य हबै ऊ जउन यहोबा के नाम लग आथै,
हमके तुमके यहोबा के घर लग आसिरबाद मिले हबै।
यहोबा भगवान हबै,
अउ ऊ हमके उजियार दय हबै,
बलि पसु1 के बेदी के सींगन के डोरन लग बांधा।
हे यहोबा, तै मोर भगवान हबस, मै तोर धन्यबाद करिहों, तै मोर भगवान हबस,
मै तोर गुडनवाद करिहों।
यहोबा कर धन्यबाद करा, काखे ऊ भला हबै,
अउ ओखर करुना हरमेसा बने रही।
Source notes (1)
- Footnote भगवान कर निता पसु कर बलि चढाथै
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.