Bhumiya
भजन 116
मिरतु लग बचै हे भगवान के धन्यबाद
मै माया धरथों, इहैनिता कि यहोबा
मोर बिनती के सुने हबै।
ऊ जउन मोर पल्ला कान लगाय हबै,
इहैनिता मै जीवन भर ओही पुकारे करिहों।
मिरतू कर डोरा मोर चारो पल्ला रथै,
मै नरक के सकेती हे पडे रथो, मोके समस्या अउ दुख भोगै के पडिस।
तब मै यहोबा लग बिनती करिहों, हे यहोबा,
बिनती सुनके मोर परान के बचा ले,
यहोबा अनुगरहकारी अउ धरमी हबै,
अउ हमर भगवान दया करैबाले हबै।
यहोबा दीन मनसे कर रक्छा करथै,
जब मै कमजोर हुइ गय रथो, ऊ मोके बचाइस।
हे मोर परान, तै अपन आराम जिघा हे लउट आ,
काखे यहोबा तोर अच्छाई करे हबै।
तै तो मोर परान के मिरतु लग,
मोर आंख के आंसू बहामै लग
अउ मोर गोड के ठोकर खाय लग बचाय हबस।
मै जिंदा रहत, अपन के यहोबा कर
आगू जानके रोज चलत रइहों।
मै जउन असना कहे हव, इके बिस्वास कर कसउटी हे कस कर कहे हबै,
मै तो बोहत दुख हव,
मै उतावली लग कथो,
“सगलू मनसे ठगरा हबै।”
यहोबा मोर जेतका उपकार करे हबै,
उनखर बदला मै ओही काहिन दों?
मै मुकति कर खोरिया उठायके,
यहोबा लग बिनती करिहों,
मै यहोबा कर निता अपन इक्छा सगलू कर नजर हे परगट रूप हे
ओखर सगलू परजा कर आगू पूर करिहों।
यहोबा कर हरवाह के मिरतू,
ओखर नजर हे कीमती हबै।
हे यहोबा, सुन, मै तो तोर हरवाह हव,
मै तोर हरवाह अउ तोर हरवाहन कर टोरवा हव,
तै मोर बंधन खोल दय हबस।
मै तोके धन्यबाद कर बलि चढाहूं
अउ यहोबा लग बिनती करिहों।
मै यहोबा कर निता अपन इक्छा,
परगट हे ओखर सगलू परजा कर आगू,
यहोबा भगवान के अंगना हे,
हे यरुसलेम, तोर भित्तर पूर करिहों।
यहोबा कर स्तुति करा।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.