Bhumiya
भजन 115
केबल सही भगवान
हे यहोबा, हमर नेहको, हमर नेहको,
पय अपनै नाम के महिमा,
अपन करुना अउ सच्चाई कर खातिर कर।
राज-राज कर मनसे काखे कहै पाय,
“उनखर भगवान कछो रहिस?”
हमर भगवान तो स्वरग हे हबै,
ऊ जउन चाहै उहै करे हबै।
उनखर के मूरती सोना चांदी के तो हबै,
ऊ मनसे के हाथन के बनाय हर हबै।
उनखर मुंह तो रथै, पय ऊ बोल नेहको सकथै,
उनखर आंख तो रथै, पय ऊ देख नेहको सकथै।
उनखर कान तो रथै, पय ऊ सुन नेहको सकथै,
उनखर नाक तो रथै, पय ऊ सूंघ नेहको सकथै,
उनखर हाथ तो रथै, पय ऊ छि नेहको सकथै,
उनखर गोड तो रथै, पय ऊ चल नेहको सकथै,
अउ अपन नटेरी लग कुछु आरो नेहको निकाल सकथै।
जसना ऊ हबै ओसने उनखर बनामैबाले हबै,
अउ उनखर उप्पर सगलू बिस्वास रखैबाले ओसने हुइ जइहिन।
हे इस्राएल, यहोबा हे बिस्वास धर,
तोर सहायक अउ ढाल उहै हबै।
हे हारुन कर घराना, यहोबा हे बिस्वास धर,
तोर सहायक अउ ढाल उहै हबै।
हे यहोबा कर भक्तो, यहोबा हे भरोसा धरा,
तुम्हर सहायक अउ ढाल उहै हबै।
यहोबा हमके सुरता करे हबै, ऊ आसीस देही,
ऊ इस्राएल के घराना के आसीस देही,
ऊ हारुन के घराना के आसीस देही।
का नान का बडा जेतका यहोबा के भक्तो हबै,
ऊ उनके आसीस देही।
यहोबा तुमके
अउ तुम्हर लरकन के जादा बढाय जाय,
यहोबा जउन बादर अउ भुंइ कर करता हबै,
ओखर पल्ला लग तुम आसीस पाय हबा।
स्वरग तो यहोबा कर हबै,
पय भुंइ ऊ मनसेन के दय हबै।
मरे हर जेतका चुपचाप पडे हबै,
उन यहोबा कर स्तुति नेहको कर सकथै,
पय हम मनसे यहोबा के
अब लग लइके हरमेसा तक धन्य कहत रइहिन।
यहोबा कर स्तुति करा।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.