Bhumiya
भजन 109
परतिसोध कर याचना
हे भगवान, तै जेखर मै दाऊद स्तुति करथो, चुप झइ रह,
काखे बेकार अउ कपटी मनसे मोर बिरुध्द मुंह खोले हबै,
उन मोर बारे हे झूठ बोलथै।
उन बैर कर बचन लग मोके चारो पल्ला घेर लय हबै,
अउ बेकार मोर लग लडथै।
मोर माया के बदले हे उन मोर बिरोध करथै,
पय मै तो बिनती हे लगेतार लगे रथो।
उन भलाई कर बदला हे मोर लग बुराई करिन,
अउ मोर माया कर बदला मोर लग बैर करे हबै।
तै ओही कउनो दुस्ट मनसे कर हक हे धर,
अउ कउनो बिरोधी ओखर दहिना पल्ला ठाढ रहै।
जब नियाव करे जाय, तब ऊ दोसी निकडै,
अउ ओखर बिनती पाप गने जाय।
ओखर दिन चुटु हस होय,
अउ ओखर पद के दूसर झटक ले।
ओखर लरका अनाथ हुइ जाय,
अउ ओखर डउकी बिधवा हुइ जाय।
अउ ओखर लरका गली-गली फिरै अउ भीख मांगै करै,
उनही अपन उजडे हर घर लग दुरिहां जायके खंडा मांगै के पडै।
बनिया फांदा लगायके, ओही सगलू कुछु लइ ले,
अउ परदेसी ओखर कमाई के लूट ले।
कउनो झइ होय जउन ओखर हे करुना करत रहै,
अउ ओखर अनाथ लरकन हे कउनो अनुगरह झइ करै।
ओखर बारिसदार नास हुइ जाय,
दूसर पीढी हे ओखर नाम मिट जाय।
ओखर पुरखा के अधरम यहोबा के सुरता रहै,
अउ ओखर दाय के पाप झइ मिटै।
ऊ लगेतार यहोबा कर लिघ्घो रहै,
कि ऊ उनखर नाम भुंइ लग मिटाय डाले।
काखे ऊ दुस्ट, किरपा करैके बिसर गइस,
पय दीन अउ गरीब के सताय रथै,
अउ मार डाले के इक्छा लग दुख मनबालेन कर पाछू पडे रथै।
ऊ सराप दे लग बिस्वास रखथै, अउ सराप ओखर उप्पर आय पडिस,
ऊ आसीस दे लग खुस नेहको होथै, इहैनिता आसीस ओखर लग दुरिहां रहिस।
ऊ सराप दे कपडा कर जसना पहिरथै,
अउ ऊ ओखर देह हे पानी कर जसना,
अउ हाडा हे तेल कर जसना समाय गइस।
ऊ ओखर निता बन्डी ओढै के काम दे,
अउ मुरेठा कर जसना ओखर कनिहा हे रोज दिन कसे रहै।
यहोबा कर पल्ला लग मोर बिरोधिन के,
अउ मोर बिरोध बुरा कहैबाले के इहै बदला मिलै।
पय मोर लग हे यहोबा परभु, तै अपन नाम कर निमित्त बरताव कर,
तोर करुना तो बडा हबै, इहैनिता तै मोके छुटकारा दे।
काखे मै दीन अउ गरीब हव,
अउ मोर हिरदय घायल होय हबै।
मै ढलत छाय कर जसना जात रहों,
मै चिड्डा किरवा कर जसना उडाय दय गय हव।
उपास करत मोर घुटवा कमजोर हुइ गइस,
अउ मोर हे चरबी नेहको रहै लग सुखाय गय हव।
मोर तो उन मनसेन हे नामधराई होथै,
जब ऊ मोके देखत, तब मूंड हिलाथै।
हे मोर भगवान यहोबा, मोर सहायता कर,
अपन करुना के जसना हमके बचा ले।
जेखर लग ऊ जानै कि हइ तोर काम हबै,
अउ हे यहोबा, तहिन हइ करे हबै।
ऊ कोसत रहै, पय तै आसीस दे,
ऊ तो उठत लज्जित होय,
पय तोर सेबक खुस होय।
मोर बिरोधिन के बेज्जति कपडा पहिनाय जाय,
अउ ऊ अपन लाज के कम्बल कर जसना ओढे।
मै अपन मुंह लग यहोबा के धन्यबाद करिहों,
अउ बोहत लग मनसे कर बीच हे ओखर महिमा करिहों।
काखे ऊ गरीब कर दहिना पल्ला ठाढ रही,
कि ओही परान दंड दिलामै बाले लग बचाय।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.