गलातियों 3

बरदान

1हे मूरुख गलातिन, कोनहर तुमके मोह लय हबै? तुम सही के नेहको माना, यीसु मसीह तुम्हर आंखी के आगू क्रूस हे चढाय गय रहै, 2मै तोर लग सिबाय हइ जानै चाहथो कि तै पवितर आतमा के नियम के कामन लग या बिस्वास के संदेस के दवारा पाय? 3तुम एतका मूरुख कइसन हुइ सकथा, तुम भगवान के पवितर आतमा के रीति लग सुरू करके, का अब देह के रीति हे खतम करै के चाहथा1? 4का तै एतका दुख बेकार उठाय? पय मोके बिलकुन बेकार नेहको हबै। 5जउन तुमके पवितर आतमा देथै अउ तुम्हर हे सक्ति के काम करथै, ऊ का नियम के कामन लग या संदेस हे बिस्वास लग असना करथै? 6जसना कि अब्राहम के बारे हे किताब कथै, “अब्राहम भगवान हे बिस्वास करिस अउ हइ ओखर निता नियाइपन गिनै गइस2।” 7पय हइ जान लेया कि जउन बिस्वास करथै, उहै अब्राहम के टोरवा हबै। 8अउ पवितर किताब पहिले लग हइ जानके कि भगवान गैर यहूदी के बिस्वास लग धरमी मनसे ठहराही, आगू लग अब्राहम के हइ संदेस सुनाय दय गय रहै कि “तोर लग सगलू मनसे आसीस पइहिन3।” 9इहैनिता जउन बिस्वास करै बाले हबै, ऊ बिस्वास करै बाले अब्राहम के संग आसीस पउत हबै।

10इहैनिता जेतना मनसे नियम के कामन हे बिस्वास करथै, ऊ सगलू सरापित के बस हे हबै, काखे लिखवरे हबै, “जउन कउ नियम के किताब हे लिखवरे सगलू बातन के नेहको मानथै, ऊ सरापित हबै4।” 11पय हइ बात परगट हबै कि नियम के दवारा भगवान के इछो कउ धरमी मनसे नेहको ठहरथै, काखे धरमी मनसे बिस्वास लग जिन्दा रइहिन। 12पय नियम के बिस्वास लग कउनो मतलब नेहको हबै, काखे “जउन उनके मनही ऊ उनखर कारन जिन्दा रइहिन।”

13मसीह जउन हमर निता सरापित बनिस, हमके खरीदके नियम के सरापित लग बचाइस, काखे लिखवरे हबै, “जउन कउ क्रूस हे टंगाय जथै ऊ सरापित हबै।” 14हइ इहैनिता होथै कि अब्राहम के आसीस मसीह यीसु हे दूसर जातन तक पहुंचै अउ हम बिस्वास के दवारा ऊ आतमा के पइ जेखर टीमा होय रथै।

नियम अउ टीमा

15हे भाई, मै मनसेन के आदत लग कथो, मनसे के टीमा जउन पक्का हुइ जथै, ता न कउ उके टारथै अउ न ओहमा कुछ जोडथै। 16अब टीमा अब्राहम के बिरादरी के देय गय हबै। ऊ हइ नेहको कथै, “उनखर बिरादरी के” जसना बोहत झन के बारे हे कथै, पय जसना अक्ठी के बारे हे “तोर बिरादरी ऊ मसीह हबै5।” 17पय मै हइ कथो जउन टीमा भगवान आगू लग पक्का करे रथै, ओखर नियम चार सव तीस साल के बाद आयके नेहको टर सकही कि टीमा बेकार ठहरही6। 18काखे अगर मीरास नियम लग मिले हबै ता फेर टीमा लग नेहको, पय भगवान अब्राहम के टीमा के दवारा दय हबै।

19तब फेर मूसा कर नियम काखे दय गय हबै? ऊ ता अपराधन के कारन बाद हे दय गइस कि बिरादरी के आमै तक रहै, जेही टीमा दय गय रथै अउ ऊ स्वरगदूत के दवारा अक्ठी बीचबचाव ठहराय गइस। 20बीचबचाव कम से कम दुइझन के बीच हे करे जथै, पय भगवान अक्ठी हबै।

बेवस्था के मतलब

21ता का नियम भगवान के टीमा के बिरोध हे हबै? कबहुन नेहको। अगर असना नियम दय जथै जउन जीवन दइ सकथै, ता सहीमा नियाइपन नियम लग होथै। 22पय पवितर किताब सगलू के पाप के बस हे कर दय हबै, ताकि ऊ टीमा जेखर अधार यीसु मसीह हे बिस्वास करैके हबै, बिस्वास करै बाले के निता पूर हुइ जही।

23पय बिस्वास के आमै लग पहिले नियम के बस हे हमर रखबाली होथै अउ ऊ बिस्वास के आमै तक जउन परगट होमै बाले रथै, हम उहै के कबजा हे रहन। 24इहैनिता नियम मसीह तक पहुंचामै के निता धरमी ठहरिस।

टोरवा अउ बिरादरी

25पय जब बिस्वास आय चुकिस, ता हम अब गुरू के बस हे नेहको रहिन।

26काखे तुम सब कउ उहै बिस्वास के दवारा जउन मसीह यीसु हे हबै, भगवान कर टोरवा होय। 27अउ तुम मसे जेतना मसीह हे पानी हे बतिस्मा लेय हबा, उन मसीह के ओढ लय हबै। 28अब न कउ यहूदी रहिन अउ न यूनानी, न कउ हरवाह अउ न आजाद, न कउ डउका न डउकी, काखे तुम सब मसीह यीसु हे अक्ठी हबा। 29अउ अगर तुम मसीह के हबा ता अब्राहम के बिरादरी अउ टीमा के जसना हकदार हबा।