Bhilali Bible
वारलु गीत 2
मे सारोन गुलाब छे,
ने बयड़ा घाटीन सोसन फुल छे।
लाडु
जसो सोसन फुल काटाळ्या झाड़कान ईचमां रवे,
तसीत मारी लाटेकली, कुवारली पुरे ईचमां रवे।
लाडी
जसो सेवफळेन झाड़को जंगली झाड़कान ईचमां रवे,
तसुत मारु लाटेकलु जुवान्यान ईचमां छे।
मे तेरा साहळा तळे खुस हय्न बठ गुय,
ने मे तेरो फळ खादी ती मेसेक गुळ्यो लाग्यो।
चु मेसेक तेरा खाणेन घर मां ली गुयु,
ने मार पर तेरु झंडु हालतेलु, चु परम हतलु।
मेसेक सुकला अंगुर खावाड़ीन काठी कर,
ने सेवफळ खावाड़ीन ताकत वाळी बणाव;
काहाकी मे परमेन जुर सी कमजुर छे।
बेसको वारु रवतो, जत्यार तारु डाखर्यु हात, मारा मुणका तळे रवतु,
ने जेवड़्यु हात मेसेक पुमाळतु!
ओ यरुसलेम सहरेन पुरे, मे तुहुंंक हयणान; ने हयणीन सगुन खावाड़ीन कवो,
जत्यार लगुन परम आपसुत नी जागे,
तत्यार लगुन हामु तीनाक नी जागाड़जे।
दुसरो गीत
लाडी
मेसेक परम करन्यान बुल सामळाय रयो!
देखु, पलु बयड़ा पर उछेळतु-उछेळतु आवे,
ने बयड़ा छेकी-छेकीन आवणे बाजी रयु।
मेसेक परम करन्यु आयड़े,
ने, जु जुवान हयणान तसु छे।
देखु, चु हामरा भीतड़ा पछळ उबु हंय रयु,
ने खीड़कीम रय्न भाळ रयु,
ने जाळीम रयन देखणे बाजी रयु।
मेसेक परम करन्यु मेसेक असु कवणे बाजी रयु,
लाडु
ओ मारी लाटेकली,
ओ मारी घाटाळी, उठीन आवती रव।
काहाकी देख, सींग ते जाती रयो, ने पाणी बी पड़ीन जाती रयु।
धरती पर फुल देखाय रया,
चिरलान गावणेन टेम आय लागली छे,
ने हामरा जागा मां पेरवा आयड़ने बाजी रया।
अंजीर पाकणे बाजी गुया,
ने अंगुरेन वेलाम फुल आय रया; ने चे वारु गंदायणे बाजी रया।
ओ मारी लाटेकली,
ओ मारी घाटाळी, उठीन आवती रव।
ओ मारी पेरवी, बयड़ान खुबारामां,
ने गुफा मां सातायला जागा मां मेसेक तारो मुंहडो देखणी दे।
ने मेसेक तारो बुल सामळनी दे,
काहाकी तारो बुल सुवांग भराय छे,
ने तारो मुंहडो बेसको वारु छे।
जी नानली फुंदाळी अंगुरेन वेला रंदळी रय,
तीनी काजे धर ले;
काहाकी अंगुरेन वेलाम फुले आय रया।
लाडी
मेसेक परम करन्यु मारु छे, ने मे तेरी छे।
चु आपसान गाडरा-बुकड़ा सोसन फुलेन ईचमां चारने बाजी रयु।
जत्यार लग दाहड़ु नी ढळे
ने साहळु नांबु नी हवे, तत्यार लग ए मेसेक परम करन्या,
तु जुवान हयणान तसु बण,
जे हयण्या बेतेर1 बयड़ा मां फीर्या करे।
Source notes (1)
- Footnote उबड़ खाबड़ बयड़ा
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.