Bhilali Bible
वारलु गीत 1
जे वारलु-गीत, राजा सुलेमानेन साहरे लिखलो छे।1
पेहलो गीत
लाडी
कतरो वारु रवतो! जत्यार चु मारे गाले गुळा देतु!
काहाकी तेरु मंग ते अंगुरेन रस सी बी बेसको वारु छे।
तारे भाती-भातीन ईत्तरेन गंद बेसको वारु छे,
तारो नाव ते रेचवला ईत्तर बराबर छे;
तेरेमां कुवारली पुरे तार सी परम करे।
मेसेक मनवी ले; हामु तार पछळ दवेड़सुन।
राजु मेसेक आपसा कमरा मां ली आवलु छे।
हामु तारेम खुस ने मजा मां रवसु; हामु अंगुरेन रस सी वदु तार सी परम करसु,
तेरेसी अदु तारा बारामां कवसुन;
ची कुवारली पुरे तार सी परम करे।
ओ यरुसलेम सहरेन पुरे,
मे काळी ते छे, बाकुन बेसकी वारु छे,
मे केदार अवल्यातेन तम्बान तसी ने सुलेमानेन बंगलान पड़दान तसी छे।
मे सावळा रंगेन छे करीन मेसेक एक हेट्यु मां भाळे,
काहाकी मे तपेन सेक मां काळी पड़ गुयली छे।
मारी मायन पुर्या मारे सी खुस नी हतला।
चे मेसेक अंगुरेन वाड़ीन राखवाळी करने मेक देदा;
बाकुन मे मारीत अंगुरेन वाड़ीन राखवाळी नी करी!
ए मारा जीव सी वदु लाटेक्ला, मेसेक देखाड़,
तु तारा गाडरा-बुकड़ा कां चारे,
खराय्न दाहड़े तु गाडरा-बुकड़ान गुठाण कां बठाड़े;
मे तारी सांतीन गाडरा-बुकड़ा धड़्ये
घुमतु पांगरीन काहा फीर्या करो?
लाडु
ओ आखा बायराम सी वदु वारु,
कदी तुसेक मालम नी हय,
ती गाडरा-बुकड़ान पायरे-पायरे जां,
ने गुवाळ्यान तम्बा धड़्ये आपसा गाडरा-बुकड़ान गीदल्या चार।
ओ मारी लाटेकली, मे तुसेक फीरोन राजान,
घुड़ा-गाडी मां जुपली घुल्ली साते बराबर करलु छे।
तारा कान्या गालेन्चां आय रवे ती तारा गाल बेसका वारु देखाये,
ने तारा गळा मां हीरान माळा।
लाडी
हामु तार वाटे चांदीन फुले वाळु,
सनान माळु बणावसु।
जत्यार राजु बठी रवलु,
मारो ईत्तर आखी दुर गंदायणे बाजी रवलो।
मारु लाटेकलु, मार वाटे लुबानेन थयलिन तसु छे।
जी थयलि मारा छातीन ईचमां पड़ी रवतेली।
मारु लाटेकलु, मारे वाटे मेहंदीन फुलेन तसु छे।
जी मेहंदी एनगदीन2 अंगुरेन वाड़ी मां रवे।
लाडु
तु बेसकी वारु छे, ओ मारी लाटेकली, तु बेसकी वारु छे;
तारा डुळा पेरवीन तसा छे।
लाडी
ए मारा लाटेकला,
तु बेसकु वारु ने गमे असु छे।
ने नीळ्ळु चारु हामरो आथेरनु रवसे;
आपणा घरेन धारण देवदारेन छे,
ने आपणा घरेन छतेन डांडा सनोवर झाड़कान छे।
Source notes (2)
- Cross-reference 1 राजा 4:32
- Footnote मरला समुदरेन बुडवणी धड़े
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.