Bhilali Bible
भजन सहीता 132
मंदीर वाटे दुवा
मंदीरेन तीरथ करनेन टेमे गावे चो गीत
ए यहोवा भगवान, दावुद राजु तार वाटे जी हरबड़ कर्यु,
तीनी आखी हरबड़ काजे हेर करीन मार पर दया करजी।
दावुद ते तार अगळ असी सगुन खादु,
ने याकुबेन आखा ताकत वाळा भगवान चु तार अगळ असी मान्ता लेदलु।
तत्यार लक मे नीते मारा घर मां भरायो,
ने नीते खाटली पर आडु पड़ो।
नी आपणा डुळा मां नींद,
ने नी आपणा पापण्या मां झपकी आवणी दम।
जत्यार लक मे यहोवा भगवान वाटे मंदीर बणावणे युजना नी बणाय लम,
मतलब याकुबेन जुरभर्या भगवान वाटे रवणेन जागु नी जड़े।
देखु हामु एप्राता मां बुलीन पेटारान वात सामळ्या,
जु जागु यारीम सहरेन खयड़ा मां जड़लु छे।
आवु, आपणु यहोवा भगवानेन रवणेन जागा मां जाजे,
हामु तेरी पाय मेकणेन पयड़ी अगळ तीनाक पाये पड़ीन वांदजे!
ए यहोवा भगवान, उठीन
तारा आरामेन मंदीरेम,
तारा जुरभर्या बुलीन पेटी भेळु आव।
तारा पुजारा धरमेन पुथल्या पेहेरला रवे,
ने तारा भगत माणसे खुसीन गीत गावता रवे।
तारा चाकर्या दावुदेन साहरे मेसेक बरकत आप,
तारा नेवाड़लान दुवान नीकारु मां करे।1
यहोवा भगवान ते दावुद अगळ खरली सगुन खादलु छे,
हेरेसी तीनीक चु पुरी करसे,
ची सगुन असी छे:
मे तारी अवल्यात काजेत तारी राजगादी पर बठाड़ीस।2
कदी तारी अवल्यात मार साते करली बुली पुरी करसे,
ने मारी हुकुम मानसे,
ती तींद्री अवल्यातेन अवल्यात बी तारी राजगादी पर जलम बस्या करसे।
यहोवा भगवान ते सीयोन बयड़ा काजे नेवाड़ लेदु;
ने चु सीयोन बयड़ाक आपसु रवणे वाटे करीन नेवाड़ लेदु।
जु जागु ते मारा आरामेन जागु छे, मे जांत जलम रया करीस,
काहाकी मे ईनात काजे नेवाड़लु छे।
मे जां खाणेन चीज पर बेसकु संयबरकत आपीस;
ने मे जां आवण्या गरीब काजे खाणो आप्या करीस।
मे जां रवण्या भगवानेन पुजाराक छुटकारान पुथल्या पेहराय्न,
ने जां वाळा भगत माणसे, खुसीन गीत गावसे।
हीनीत जागे मे, दावुदेन अवल्यात वाटे राजगादी जलमकी ठाणीस;
ने मे मारा नेवाड़ला राजा वाटे जलमकु धपण्यु दीवु धपाड़ीस।3
मे, तेरा वेरीक ते नाव-बद्दीन पुथल्या पेहराय्स;
बाकुन तेरे पर तेरीत राज-पागड़ी सींगारीस।
Source notes (3)
- Cross-reference 2 ईतीहास 6:41,42
- Cross-reference 2 समुवेल 7:12-16; 1 ईतीहास 17:11-14; भजन सहीता 89:3,4; नेवताळान काम 2:30
- Cross-reference 1 राजा 11:36
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.