Bhilali Bible
उबजाणनी किताप 5
आदमेन अवल्यातेन कुळी
(1 ईतीहास 1:1-4)
आदमेन कुळी जी छे, तीने दाहड़े भगवान माणसेक बणायु, तीने दाहड़े तीनाक आपसान सीका मां बणायु। सुरु मां चु एक अदमीक ने एक बायर काजे बणायु। तीने दाहड़े भगवान तीनु काजे बणायु, तीने दाहड़े भगवान तीनु काजे संयबरकत आपलु; ने तींद्रो नाव “आदम पाड़लु।”1 जत्यार आदमेन उमर एक सोव तीस साल हय, जत्यार तेरे साहरे तेरी बायरीन एक पुर्यु हयु। ने चु पुर्यु आदमेन सीका मां देखाय तेलु ने आदम तीना पुर्यान नाव सेत पाड़्यु। सेत पयदा हय गुयु, ने अळी आदम आठ सोव साल लग जीवतेलु रह्यु, ने तीनी टेमे तेरे साहरे तेरी बायरीन बेसका पुर्या पारी हया। असु करीन आदम नव सोव तीस साल लग जीवतेलु रह्यु तेरे पछेन चु मर गुयु।
जत्यार सेतेन उमर एक सोव पांच साल हवी, तत्यार तेरे साहरे तेरी बायरीन एक पुर्यु हयु; ने तेरो नाव एनोस पाड़्या। एनोस पयदा हय गुयु, ने अळी सेत आठ सोव सात साल जीवतेलु रह्यु, ने तीनी टेमे तेरे साहरे तीनी बायरीन बेसका पुर्या पारी हया। ने असु सेत नव सोव बारे साल लग जीवतेलु रह्यु, ने तेरे पछेन चु मर गुयु।
जत्यार एनोस दस कम सोव सालेन हयु, तत्यार तेरे साहरे तेरी बायरीन एक पुर्यु हयु, ने चे तेरो नाव केनान पाड़्या। केनान पयदा हयु, ने अळी एनोस आठ सोव पंद्रे साल जीवतेलु रह्यु, ने तीनी टेमे तेरे साहरे तेरी बायरीन दीसरा पुर्या पारी पयदा हया। ने असु करीन एनोस नव सोव पांच साल लग जीवतेलु रह्यु, ने अळी चु मर गुयु।
जत्यार केनान उमर सत्तर साल हतली, तत्यार तेरे साहरे तेरी बायरीन एक पुर्यु हयु, चे तेरो नाव महललेल पाड़्या। महललेल पयदा हय गुयु ने अळी केनान आठ सोव चाळीस साल लग जीवतेलु रह्यु, ने तीनी टेमे तेरे साहरे तेरी बायरीन दीसरा पुर्या पारी हया। ने असु करीन केनान नव सोव दस साल लग जीवतेलु रह्यु, ने अळी चु मर गुयु।
जत्यार महललेल्यान उमर साठ ने पांच साल हतली तत्यार तेरे साहरे बायरीन एक पुर्यु हयु ने चे तेरो नाव येरेद पाड़्या। येरेद पयदा हय गुयु, ने अळी महललेल आठ सोव तीस साल लग जीवतेलु रह्यु, ने तीनी टेमे तेरे साहरे तेरी बायरीन बेसका पुर्या पारी हया। असु महललेल पांच कम नव सोव साल लग जीवतेलु रह्यु, ने पछेन चु मर गुयु।
जत्यार येरेद एक सोव साठ ने दुय साल लग जीवतेलु रह्यु, तत्यार तेरे साहरे तेरी बायरीन एक पुर्यु हयु, ने चे तेरो नाव हनोक पाड़्या। हनोक पयदा हय गुयु ने अळी येरेद आठ सोव साल लग जीवतेलु रह्यु, तीनी टेमे तेरे साहरे तेरी बायरीन बेसका पुर्या पारी हया। ने असु करीन येरेद नव सोव साठ ने दुय साल लग जीवतेलु रह्यु, ने चु मर गुयु।
जत्यार हनोकेन उमर साठ ने पांच साल हय तत्यार तेरे साहरे तेरी बायरीन एक पुर्यु हयु, ने चे तेरो नाव मतुसेल पाड़्या। मतुसेल पयदा हय गुयु, ने अळी हनोक बी तीन सोव साल लग भगवान पुठ्ये रय्न जीयु, तीनी टेमे हनोकेन साहरे तेरी बायरीन बेसका पुर्या पारी हया। असु करीन हनोक तीन सोव साठ ने पांच साल लग जीवतेलु रह्यु। हनोक भगवान पुठ्ये-पुठ्ये चालतेलु, ने अळी भगवान तीनाक गायब करीन जीवतेलु हाकली ली गुयु।2
जत्यार मतुसेलेन उमर एक सोव ने अस्सी ने सात सालेन हतली, तत्यार तेरे साहरे तेरी बायरीन एक पुर्यु हयु, चे तीना पुर्यान नाव लेमेक पाड़्या। लेमेक पयदा हय गुयु, ने अळी मतुसेल्यु सात सोव बय्यालीस साल लग जीवतेलु रह्यु, ने तीनी टेमे तेरे साहरे तेरी बायरीन अळी बी पुर्या पारी हया। ने असु करीन मतुसेल्यान उमर नव सोव ने एक कम सत्तर साल लग जीवतेलु रह्यु, ने अळी चु मर गुयु।
जत्यार लेमेकेन उमर अठ्ठारे कम दुय सोव साल हतली, तत्यार तेरु एक पुर्यु हयु। हयु असु कयन तेरो नाव नुह पाड़्यु, “यहोवा भगवान जु धरती काजे सराप देदलु छे, तेरे बारामां जु पुर्यु हामरा काम मां, ने तीना काठला काम मां जो हामु करजे तीना काम काजे हामु सांती देसु।” ने नुह पयदा हय गुयु, ने अळी चु लेमेक पांच कम सोव साल जीवतेलु रह्यु, ने तीनी टेमे तेरा बेसका पुर्या पारी हया। ने असु करीन लेमेक सात सोव ने तीन कम अस्सी साल जीवतेलु रह्यु, ने अळी चु मर गुयु।
ने नुह पांच सोव सालेन हयु; ने नुह सी सेम ने हाम हया, ने येपेतेन पयदावारी हयी।
Source notes (2)
- Footnote एक माणसेन नाव हतलो
- Cross-reference ईब्रानीयो 11:5
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.