Bhilali Bible
उबजाणनी किताप 26
इसाक गरार मां रवे
देस मां काळ पड़्यु। अब्राहमेन दाहड़ा पड़लु तेर सी अलग हतलु। तेरेमां इसाक गरारेन पलीस्तीन राजु अबीमेलेक धड़े गुयु। चां यहोवा भगवान तीनाक उजेंतु हयन कह्यु, “मीसर मां जा; जो देस तुसेक बताड़ीस चां रया करजी। तु ईनात देस मां रव, ने मे तार साते रवीस, ने तुसेक संयबरकत आपीस; ने ज आखो देस तुसेक ने तारा अवल्यात काजे आपीस; ने जु सगुन मे तारा बास अब्राहम सी खादलु, तीनाक मे पुरो करीस। ने मे तारा अवल्यात काजे सरगेन तारान तसा गीणाये नी ततरा करीस; ने मे तारा अवल्यात काजे ज आखो देस आप दीस, ने धरतीन आखा जात्या तारा अवल्यातेन वजे सी तुसेक संयबरकत वाळु मानसे। काहाकी अब्राहम मारी मान्यु, ने ज बी तीनाक सुपलु तीनाक ने मारी हुकुम काजे, रीती-भाती ने नीयम काजे पाळ्यु।”
तसु करीन इसाक गरार मात रहणे लाग ज्यु। जत्यार तीना जागा मां रहणे वाळा तेरी घरवाळीन बारामां पुछ्या, तत्यार चु असु वीच्यारीन कह्यु की कदी मे तीनीक मारी घरवाळी कयस ती ते जां रहणे वाळा माणसे रीबका ची बेसकी वारु देखाये, ती चे मेसेक मार नाखसे, तसु करीन जपाप आप्यु, की “हयी ते मारी बहणीस छे।”1 जत्यार तीनाक चां रवतेला बेसका दाहड़ा हय ज्या, तत्यार एक दाहड़े पलीस्तीन राजु अबीमेलेक खीड़कीम रय्न झाकीन असु देख्यु की इसाक आपसी घरवाळी रीबका भेळे सुयन परम करतेलु। अबीमेलेक इसाक काजे बुलायु ने तीनाक कह्यु, छाचलीन हयी तारी घरवाळी छे। तु असु काहा कहलु, “हयी मारी बहणीस छे?”
इसाक जपाप आप्यु, मे सुची रहलु की कदी मे हयी मारी घरवाळी छे करीन कहीस ती तेर वजे सी मे माराय जायस।
अबीमेलेक कह्यु, तु हामरे साते असु ज काय कर्यु? मारा माणसे मायन काहनु बी ईनी साते सुय जातो ने तु हामुक पाप मां फसाड़तु। अबीमेलेक आपसा माणसे काजे समजाड़्यु; जु काहनुक ईना माणुस काजे ने तेरी घरवाळी काजे छीमसे, तीनाक मार नाकसुन।
इसाक तीना देस मां वेर्यु ने तीनेत साल सोव गुणा फळ फळ्यो, काहाकी मालीक तीनाक संयबरकत आप्यु। ने असुत संयबरकत जड़तु रह्यु, तसु करीन चु मात-भर बण ज्यु। तेर धड़े गाडरा-बुकड़ा, गावड़ी-बेल, ने बेसका पावर्या-पावरनी हतली। तेरेमां पलीस्ती माणसे इसाक सी रीस करने बाजी ज्या। तेरेमां जतरा कुवा तेरु बास अब्राहमेन पावर्या अब्राहमेन जीवते खुदला, तीनु कुवाक पलीस्ती माणसे धुळा करीन बुरवी देदा।
तत्यार अबीमेलेक इसाक सी कह्यु, हामरे धड़े सी जाती रव, “काहाकी तु हामरे सी अदु ताकुत वाळु हय ज्यु।” तेरेमां इसाक चां सी जाती र्यु, ने गरारेन बयड़ा मां तम्बु उबु करीन चां रहणे लाग्यु। तत्यार जे कुवा तेरु बास अब्राहमेन वाराम खुदला हतला, ने अब्राहमेन मरनेन पछेन पलीस्ती माणसे बुरवी देदला, तीनुक फीर सी उकराड़्यु; ने तींद्रा चेत नाव पाड़्यु,जे तेरु बास पाड़लु।
अळतेन इसाक्यान पावर्या बयड़ा मां कुवु खुदते-खुदते पाणीन झीर नीकळ्यु। तत्यार गरारेन गुवाळ्या इसाक्यान गुवाळ्या सी झगड़ु कर्या ने कह्या, “ज पाणी हामरो छे।” तेरेमां चु तीना कुवान नाव एसेक पाड़्यु; काहाकी चे तीनाक लीन लड़ायतेला।
अळतेन चे दीसरु कुवु खुद्या, ने चे तीनाक कुवाक लीन बी लड़ाय कर्या; तेरेमां तेरो नाव सीतना पाड़्यु। तत्यार इसाक चां सी बाहर नीकळीन एक अळी कुवु खुदाड़्यु, ने तेर वाटे चे लड़ाय नी कर्या; तेरेमां चु तेरो नाव असु कय्न रहोबोत पाड़्यु, “हंय यहोवा हामरे वाटे बेसकु जागु आप देदलु छे, ने हामु ईना देस मां संयबरकत हात करसुन।”
चां सी चु बेरसेबा गुयु। ने तीनेत रात्ये यहोवा तीनाक उजेंतु हयन कह्यु, “मे अब्राहमेन जु तारु बास छे तेरु भगवान छे; मां बीहे, काहाकी मे तारे साते छे, ने मारु सेवक अब्राहमेन वजे सी तुसे संयबरकत आपीस, ने तारा अवल्यात काजे वदाड़ीस।” तत्यार चु चां एक चड़ावान जागु बणायु, ने यहोवा भगवान सी दुवा कर्यु, ने चांत तम्बु ताणीन रहणे लाग्यु; ने चां इसाकेन पावर्या एक कुवु खुद्या।
इसाक ने अबीमेलेकेन ईचमां वायदु
तत्यार अबीमेलेक आपसा दुस्तीदार अहुजत ने आपसा सीपायड़ान डाहला पीकोल काजे साते लीन गरार सी इसाक काजे देखणे आयु।2 इसाक तीनुक कह्यु, “तुहुंं मार सी रीस करीन तींद्रे ईचमां सी नीकाळ देदला, हंय मार धड़े काहा आय र्या?”
चे कह्या, “हामु जाण ज्या की यहोवा तारे साते रहे; तेरेमां हामु सुच्या की तु ते यहोवा भगवान भीणी सी सयाळु छे, हेरेसी आपणु सगुन खायन, ईनी वात मां तार सी वादु करजे, की जसा हामु तारो नुकसान नी कर्या, बाकुन तारी भलाय करला, ने तुसेक काजे वारु खुसी-खुसी सी मकली देदा, तसु तु हामरे पर कुहराय घुण करे बाकुन यहोवा भगवान तुसेक संयबरकत आपलु छे।” तत्यार चु तींद्रे वाटे वारु खाणों बणायु ने तीनुक खादा-पीदा। संदारे चे आखा संदारे उठीन भेळा हयन सगुन खादा; तत्यार इसाक तीनुक वळायु, ने चे चां सी वारु जाती र्या।
तीनेत दाहड़े इसाकेन पावर्या आवीन आपसा खुदला तीना कुवान बारामां कह्या, “हामुक पाणीन एक अळी झीर जड़्लु छे।” तत्यार हयु तेरो नाव सीबा पाड़्यु; तेरेमां तीना सहरेन नाव आज लग बेरसेबा पड़्यो।
एसावेन पारका देसेन बायरा
जत्यार एसाव चाळीस सालेन हयु, तत्यार एसाव हीत्ती जातीन दुय पुरे सी ईयाव कर्यु; यहुदीत ने बासमत। यहुदीतेन बासेन नाव बेरी ने बासमतेन बासेन नाव एलोन हतलो। ने ईनु उहड़ीसेन वजे सी इसाक ने रीबकान मन मां काठो लाग्यो।
Source notes (2)
- Cross-reference उबजाणनी किताप 12:13; 20:2
- Cross-reference उबजाणनी किताप 21:22
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.