सभोपदेसक 1

जीवाय फालतु छे

1जु दावुदेन पुर्‌यु सीकाड़न्‌यान बुल छे, जु यरुसलेमेन राजु हतलु।

2सीकाड़न्‌यु असु कह्‌यु, फालतुत फालतु छे, “फालतुत फालतु! आखो कांय फालतुत छे।” 3माणसे काजे आपणा तीना आखा काठला काम काजे करीन काय हात कर लेय, जो दाहड़ान नेचे मेहनत करे। 4एक पीड़ी जाय ने दुसरी पीड़ी आवे, बाकुन धरती जलम तसीत बणीन रवे। 5दाहड़ु उंगे ने डुबे बी, ने आपसु दींखुर सी उंगे तींखुरुत पछु जाती रवे। 6वाहळी दखणाव भीणी जाय, ने अखण भीणी फीर जाय, ची हींडती-फीरती रवे, ने आपसान च्‌यारे मेर फीरीन पछी आय जाय। 7आखी नदी दर्‌याम जाय्‌न भेसकाय जाय, तेबी दर्‌यो भराये नी; तीना जागाम सी नदी नीकळे, तींखुरुत चे फीर जाय। 8आखी वात मेहनत सी भरली छे; माणुस ईनी वातेन बारामां वात नी कर सके; नी ते डुळा देखणे सी उप्‌ठा हय जाय, ने नी कान्‌टा सामळने सी भराय जाय। 9जो कांय हवलो, चो अळी पछो हवसे, ने जो कांय बणी गुयो, चोन पछो बणावासे; ने आखी धरती पर काय बी नवलो नी हय। 10काय असी वात छे, तेरे बारामां माणसे कय सके की देखु जी नवली छे? जो जां पेहलुत सी छे, ने घणो पेहेल सी छे, ने जो हामरा टेम सी पेहलुत सी जां हतलो। 11पेहला माणसे काजे कुय बी नी हेर करतेला, जां तक की आवणे वाळी पीड़ी काजे बी तीनु माणसेन साहरे बी हेर नी करे, जे तीनुक हेर करतेला।

सीकाड़न्‌यान अक्‌कल फालतुत छे

12मे सीकाड़ने वाळु यरुसलेम मां इस्‌राएलेन राजु हतलु। 13मे मारु मन लागाड़्‌यु की जों काय सरग तळे करे, तेरी सातायली वात अगळ सी सुची सुचीन मालुम करो;

जो मटा दुखेन काम छे चो भगवान माणसे वाटे ठेहरावलु छे, की चो काम करता रहे। 14मे तीनु आखा काम काजे देख्‌यु, जे दाहड़ा तळे करे; चे आखा फालतु ने मानु वाहळा काजे धरनु छे। 15जों वाकलो छे चों सुदो नी हय सके, ने जों हय नी, चों गिन्‌तीम नी आय सके।

16मे मन मां कह्‌यु, “देख, जतरा यरुसलेमेन सहर मां मार सी पेहेल राज करतेला, तींद्‌रे मां मे अदु अक्‌कल वाळु हय गुयु, ने मेसेक घणी अक्‌कल ने समजणेन माहती हय गुय।” 17मे मारु मन लागाड़्‌यु की अक्‌कलेन ढाकायली वात जाणो ने कम अक्‌कल ने गांडाय जाणों। तत्‌यार मेसेक मालुम पड़्‌यो की जो बी वाहळाक धरनेन तसो छे। 18काहाकी अदुस अक्‌कल सी अदुस पछतावु बी हवे, ने जे आपसान अक्‌कल बड़ावे चु आपसान दुख बी बड़ावे।