Bhilali Bible
दानीयल 8
दानीयलेन साहरे गाडरा ने एक बुकड़ान सपनो
राजा बेलसस्सर देसेन तीसरे साल मां तीना पेहला सपनान ने पछेन एक अळी मेसेक दानीयल काजे सपनान साहरे देखाय देदी। जत्यार मे एलाम नावेन जागा मां, सुसन नावेन सहर मां रवतेलु, तत्यार मे एक सपनो देख्यु की मे एक उले नदीन धड़का पर हतलु। अळतेन मे उपर भाळीन देख्यु, तीनी नदीन अगळ दुय सींगड़ावाळु एक गाडरु उबु हय रयु, तेरा दुय सींगड़ा मटला छे, बाकुन तींद्रे मां सी एक बेसको मटो छे, ने जो मटलो छे, चो दीसरा पछळ नीकळ्यो। मे तीना गाडरा काजे देख्यु की चु बुडवणु ने धुराव ने दखणाव भीणी सी सींगड़ो मारतेलु, ने काहनु बी जानवर तीना गाडरा अगळ उबो नी हय सके, ने नी तेर हात सी काहनुक नी बचाड़ी सके; ने चु आपसीत मरजीन अनसारे काम करीन अगु बड़तु जातलु।
मे वीच्यार करने बाजी रह्लु, ती अळी काय देख्यु की एक बुकड़ो बुडवणो भीणी सी नीकळीन आखी धरती पर असु फीर्यु की चालनेन टेमे जागा पर पाय बी नी छीमाया, ने तीना बुकड़ान डुळान ईचमां एक देखणे लायक सींगड़ो हतलो। चो तीना दुय सींगड़ा वाळा गाडरा धड़े जाय्न, तीनाक मे नदी अगळ उबो हवलो देख्यु, तेरे पर रीसवाय्न आपसी आखी ताकत सी चीसटी गुयो। अळतेन मे देख्यु की, चु बुकड़ु, रीसवाय्न सींगड़ा वाळा गाडरा धड़े दवड़ीन आवीन लड़ाय करने बाजी गुयु, ने तीनाक बेसकु जुर्ये घुदलाय्न तेरा दुयु सींगड़ा काजे भांज देदु, ने तीना सींगड़ा वाळा गाडराक तेर साते लड़ाय करने करीन नी बणे। तत्यार बुकड़ु तीना सींगड़ा वाळा गाडरा काजे जागा पर भुयमां हीट पाड़्यु, ने भुयमां रंदळी देदु, ने सक्ती सी तीनु सींगड़ा वाळा गाडराक छुड़ावणे वाळा कुय नी जड़्या।
तत्यार बुकड़ु बेसकु मटाय करने बाजी गुयु, ने तत्यार ताकतवाळु हयु, ने तत्यार आपसो मटलो सींगड़ो टुटी गुयो, ने तेर बदलाम देखणे वाटे चार सींगड़ा नीकळीन चारु खुणाम वदणे बाजी गुया। अळी तीना बुकड़ाम सी एक नान्लोस सींगड़ो नीकळ्यो, जो दखणाव सी ने उगवणो सी ने वादु करलो देस भीणी सी बेसको वद गुयो। चु अतरु ताकतवाळु हय गुयु की सरगेन सेना सी लड़ाय कर्यु, ने तींद्रे मां सी सरगेन आखा तारान तीन हीस्सा माय्न एक हीस्सु तारा काजे आबड़ीन धरती पर नाखीन रंदळी देदु।1 जां तक की चु तीना सरगेन सेनान डाहला मुख्या लक पुग गुयु, ने तीनुक बादा देणु बंद कराय देदा, ने तेरा चुखला जागाक उदारी देदा। ने माणसेन पापेन वजे सी खास होमबादा पुठे सीपायड़ा बी तेर साते कर देद्ला छे, ने चो सींगड़ो छाचाय काजे धुळा मां भेसकी देदा, ने चु काम करते-करते बेसकु अगु बड़ गुयु।
तत्यार मे एक सरगेवाळा चाकर्याक बुलते सामळ्यु, अळी एक चुखलु माणुस ने तेरेसी पेहेल बुलने वाळा सी पुछ्यु, “दाहड़ीन आकठान बादा ने उजाड़ने वाळा पापेन बारामां मे जो काय दरसन देखलु छे, चु कां तक बड़तु रवसे; मतलब चुखला जागाक ने सेना दुयु काजे वेला पाड़से ने काहा तक जो हवतो रवसे?”
तत्यार चु मेसेक कह्यु, “जत्यार तक सांतो ने संदारे दुय हजार ने तीन सोव कावा तक नी हवे, चां लग चो हवतो रवसे, ने तत्यार टेम पुरी हय जासे ने चुखली जागाक पुरी काजे चुखी करनेन टेम आवसे।”
सरगेन काहवाळ्यु जीब्राएलेन साहरे सपनान मतलब बताड़नु
जी वात मे दरसन मां देख्यु, मे दानीयल हीनाक समजणेन कुसीत कर्यु; तेरेमां माणसे साय देखायणे वाळो उचकाणुन आयन मार अगळ उबो हयु ने देखाव पड़्यु। तत्यार मेसेक उले नदीन ईचमां सी एक माणसेन आवाज सामळाय देदी, जो आयड़ीन कवतेलु, “ए जीब्राएल, हीनु माणसेक तेरी देखली वातेक समजाड़ दे।” तत्यार मे जां उबु हय रह्लु, चां चु मारे धड़े आयु, ने मे तीनाक आवते देखीन घाबराय गुयु, ने मुंहडान भुरसे हीट पड़्यु, तत्यार चु मेसेक कह्यु,
ए माणसेन अवल्यात तीनु देखली सपनान वात काजे समजी ले, काहाकी तींद्रो मतलब आकरी दाहड़ाम फळ लावसे। जत्यार चु वात कर रवलु; मे बेहुस हय्न धरती पर हीट पड़्यु बाकुन हयु मेसे धर लेदु ने मेसे मारा पाय पर उबु कर्यु। तत्यार चु मेसेक कह्यु, रीस करनेन टेमे आकरी दाहड़ाम जो काय हवसे, चो मे तुसेक बताड़ीस। काहाकी आकरी दाहड़ाम नक्खी करली टेम मां चो आखो पुरो हवसे।
जे दुय सींगड़ावाळो गाडरो तु देखलु छे, तेरो मतलब मादीयों ने फारसीन राज2 मां सी छे। ने जु बुकड़ु तु देख्यु चु बुकड़ु युनान राज मां सी छे, ने तेरा डुळाम ईचमां सी जो मटलो सींगड़ो नीकळ्यो चु पेहला राजाक नक्खी कर्यु। चो सींगड़ो जो टुटी गुयलो, ने तेरी आवजीम जे चार सींगड़ा नीकळ्या, तेरो मतलब जो छे, की तीना देसेम सी चार राज बणसे, बाकुन तेरी ताकत तीना पेहला राजा सी कम रवसे।
जत्यार तीनु राजेन आकरी टेम धड़े आय रवसे ने चे अतरा पापी हय जासे की हीनुक डंड आपणु चाहजे तत्यार चां एक हेट्यु; पापी ने धुकु देण्यु राजु हवसे। ने तेरी ताकत बेसकी मटी रवसे, बाकुन तीना मटला राजान तसी नी रह्वे, ने चु घाबराड़ नाखे असी रीती सी माणसे काजे खत्तम कर देसे, ने अगु बड़तु जाय्न काम करतु जासे, ने ताकत वाळा काजे ने चुखला माणसेन टुळा काजे सारी देसे। चु सफल हवणे वाटे धुकु करनेन काम करसे, ने चु मन मां मटाय करीन बे धड़क रयन बेसका माणसे काजे नास करसे। चु आखा राजान वीरुद बी उबु हवसे, बाकुन आकरी मां चु काहनाकेन हात सी बीना मार खाय्न टुट जासे। सांती ने संदारेन बारामां जो तु देख्यु ने समजु, चो छाचलो छे, बाकुन जो कांय तु सपना मां देख्यु, तीना दरसन काजे साताड़ीन राख, काहाकी चो बेसका दाहड़ान पछेन फळ लावसे।
तत्यार मारेम सी दानीयलेन ताकत जाती रय, ने थुड़ाक दाहड़ा लक मे मांदु रयु, ने तत्यार उठीन अळी मे राजान काम-धंदु करने बाजी गुयु, बाकुन जो काय मे देखलु तीनाक देखीन मे देखतुत रय गुयु, काहाकी तीनाक कुय समजावणे वाळु नी हतलु।
Source notes (2)
- Cross-reference उजेंता बुले 12:4
- Footnote राजा
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.