Bhilali Bible
दानीयल 6
दानीयल काजे नाहारेन गुफा मां नाखणु
दारा काजे जो वारु लाग्यो की आपणा देस उपर एक सोव ने बीस असा मुख्या बणाया। चे आखा देस पर हक राखे। ने तींद्रे उपर चु तीन मुख्या बणावलु, तींद्रेम सी दानीयल एक हतलु, हेरेसी बणावलु की चे तीनु मुख्या सी हीसाब कर्या करे, ने हेरसी राजान काही नुकसान नी हवणु चाहजे। जत्यार जो देख्या की दानीयल मां जीव आत्मा रह्वे, तत्यार तीनु काजे तींद्रा मुख्या ने आफसरेन हक सी अदुस आव-भाव जड़ी, बाकुन राजु बी चाहतेलु की तीनाक आखा राज पर ठेहरायु। तत्यार मुख्या ने आफसर्या मुखीन कामेन राजेन बारामां दानीयलेन वीरुद गुनु हेरने बाजी गुया; बाकुन चु भुरसा लायक हतलु, ने तेरा कामेन बारामां काय बी भुल ने गलती नी नीकळी, ने चे असी काहनीक गुना ने गलती नी देखी सक्या। तत्यार चे माणसे कवणे बाजी गुया की, “हामु तीना दानीयलेन भगवानेन कायदा काजे छुड़ीन, अळी काहनान बारामां तेर भीणी काय बी गुनु नी हामुक जड़्यु।”
तत्यार चे मुख्या ने मुख्या भीणी मामार आया, ने तीनुक कह्या, ए राजा दारा, तु जलम जीवतेलु रहे। राजेन आखा मुख्या, ने सीपायड़ान, राज करन्यान मुख्या, नीयाव करनेवाळा, ने राज करनेवाळा बी भेळा हय्न मान्या की, राजु असी हुकुम आपे ने असी मटी कड़ी हुकुम नीकाळे, की तीस दाहड़ा लग जो काहनुक, ए राजा, तुसेक छुड़ीन अळी दीसरु काहनुक माणुस नीते देवता सी दुवा करे, तीनाक नाहरेन टुळा मां नाख देय। हेरेसी हंय ए राजा, असु हुकुम आप दे, ने हीनी चिट्ठी पर साईन कर दे, तेरेसी जी वात, मादीयों ने फारसीन नक्खी करला कायदान साहरे बदलनु नी सके। तत्यार दारु राजु तीना हुकुम काजे लिखाड़ीन तेरे पर साय्न कर देदु। जत्यार दानीयल काजे मालुम हयो की तीनी चिट्ठी पर साय्न करलो छे, तत्यार चु आपसा घर मां गुयु, तीना घरेन उपरली मंजीलेन खीड़की यरुसलेम सहर भीणी उघड़ी रवतेली। ने आपसान रीतीन अनसारे चु भगवान धड़े दीसु तीन कावा मांडा टेकीन दुवा करतेलु ने बेसकु वारु छे कवतेलु, असुत तत्यार बी करतु रयु।
तत्यार चे माणसे मामार जुर सी आयन दानीयल काजे आपसा भगवान अगळ लीलघायता जाय्न ने भगवान अगळ मदत मांगतेला देख्या। तत्यार चे गुनु लागाड़ने राजा धड़े गुया, ने चे कह्या, ए राजा, काय तु असा हुकुमेन चिट्ठी पर साय्न करलु छे की तीस दाहड़ा लग जु काहनुक बी तुसेक छुड़ीन, काहनाक माणसे नीते देवता काजे वांदसे, तीनाक नाहरेन डहरा मां नाख देसे?
राजु जपाप आप्यु, “ने छाचलीन, मादी ने फारसी माणसेन नी टळने वाळु हुकुम नीकाळ्यु की जी वात काठी छे।”
तत्यार चे राजा काजे कह्या, “यहुदी केदी मां सी जु दानीयल छे, चु ए राजा, नी ते तार भीणी धीयान देदु, ने नी तार साईन करला हुकुमेन चिट्ठी भीणी; धीयान देदु, चु एक दाहड़ा मां तीन कावा दुवा कर्या करे।”
जी वात सामळीन, राजु बेसकु घाबराय गुयु, ने दानीयल काजे वाचाड़नेन कुसीत करने बाजी गुयु, ने दाहड़ु बुडणे लक तीनाक वाचाड़नेन वीच्यार करतु रयु। तत्यार चे माणसे राजा धड़े जुर सी मामार आयन कह्णे बाजी गुया, “ए राजा, जो जाणी ले की मादी ने फारसी माणसे मां जो नेम-कायदु छे, की जे नी करनेन हुकुम ने राजा ठेहरावे, चु बदली नी सके।”
तत्यार राजु हुकुम आप्यु, ने दानीयल काजे लायन नाहारेन दर मां नाख देद्ला छे। तीनी टेमे राजु ने दानीयल काजे पुछ्या, “तारु भगवान, तेरी तु दाहड़ीन भक्ती कर्या करे, हयुत तुसेक वाचाड़से!” तत्यार एक दगड़ु लायन तीना डहरान मुंहडा पर मेक देदा, ने राजु तीना दगड़ा पर आपसी मुंदी सी, ने आपसा मुख्या मुंद्या सी छाप लगाड़ देदु, की दानीयलेन बारामां काही बदली नी सके।
दानीयल काजे नाहार सी बचाड़नु
तत्यार राजु आपसा बंगला मां जाती रयु, ने तीनी राते खाणो बी नी खादु ने आखी रात सुय रयु, ने तेरे धड़े काय बी मजा करने काय चीज नी हतली, ने तीनाक आखी रात नींद बी नी आवी।
जत्यार संदारे एगुत दाहड़ु उंगतेत राजु उठ्यु ने नाहारेन डहरा भीणी मामार जाती रयु। जत्यार राजु नाहारेन डहरा धड़े गुयु, तत्यार दुख भर्या बुल सी आयड़ने बाजी गुयु, ने दानीयल काजे कह्यु, “ए दानीयल, ए जीवतेला भगवानेन पावर्या काय तारु भगवान तेरी तु दाहड़ीन भक्ती करे, तुसेक नाहार सी वाचाड़ी सक्यु काय?”
तत्यार दानीयल राजा काजे कह्यु, “ए राजा, तु जलम जीवतेलु रह्वे! मारु भगवान आपसा सरगेवाळा काहवाळ्या काजे मकलीन नाहारेन मुंहडा काजे असु बंद करीन मेक्यु की, चे मारो काय बी नी नुकसाण करी सक्या, तेरो मतलब जो छे, की मे तेरे अगळ बीन-गुनाळु नीकळ्यु। ने ए राजा, तार भीणी बी मे काय भुल नी कर्यु।”
तत्यार राजु बेसकु खुस हयन, दानीयल काजे डहराम सी बाहर नीकाळनेन हुकुम आप्यु, तत्यारुत दानीयल काजे डहरा मां सी नीकाळ लेदा, ने तेरे पर काय बी नुकसाणेन सहलाणी नी देखाव पड़ी, काहाकी चु दानीयल आपसा भगवान पर भुरसु करतेलु। तत्यार राजु हुकुम आप्यु की, जे माणसे दानीयलेन चुगली कर्या, चे आपणा-आपणा बायरा ने पुर्या-पारी आखा काजे लीन आवु, ने नाहारेन डहरा मां नाख देवु, ने चे डहरान कुर तक बी नी पुग्या ने नाहार तीनु काजे एकदम सी आखा हाटका सुदे तीनु काजे खाय गुया।
तत्यार राजु दारा आखी धरती पर रह्णे वाळा राज-राजेन आखा माणसे, ने भाती-भातीन बुली बुलने वाळा धड़े जो लिख्या, तुहुंं सुख सांती सी रवु! मे जो हुकुम आपो की जां-जां मारा राजेन हक छे,
चांहान माणसे दानीयलेन भगवान अगळ थुर-थुर कापे,
काहाकी जीवतु ने जलम लग रवणे वाळु भगवान हयुत छे;
तेरो राज खत्तम नी हवणे वाळो,
ने तेरु हक कदी नी टळसे।
जु दानीयल काजे नाहार सी वाचाड़लु छे, जुत तुहुंंक ने मेसेक वाचाड़न्यु,
ने छुड़ावणे वाळु छे,
ने सरगे मां ने हीनी धरती पर सहलाणी,
ने मटा काम उजेंता करनेवाळा छे।
तेरेसी दानीयल, दारा ने कुर्सु फारसी, दुयुन राज मां सुख-सांती ने आराम सी रयु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.