Bhilali Bible
दानीयल 1
दानीयल ने तेरा दुस्तीदार
(दानीयल 1:1—6:28)
नबुकदनेस्सरेन राजान दरबार मां जुवान अदमी
यहुदान राजु यहोयाकीमेन राजेन तीसरे साल मां बेबीलोन राजा, नबुकदनेस्सर, राजा ने यरुसलेम सहर पर, उपर चहड़ीन तीनाक घेरवी लेदु।1 यहोवा भगवान हीना राजा यहोयाकीम काजे धरने ने मंदीरेन थुड़ाक ठाहरा काजे धरने देदु ने चु थुड़ाक केद्या काजे आपणे साते बेबीलोन मां आपणा देवतान मंदीर मां ली गुयु, ने धरीन लावला ठाहरा काजे मंदीरेन भंडार घर मां मेक देदु।
तत्यार राजु आपसा खास मुख्या असपनज काजे हुकुम आप्यु की, तु ईस्राएली राज घराणा ने मटली कुळीन थुड़ाक माणसे काजे मारी चाकरी करने करीन ली आव;2 जे असा जुवान्या हवणु चाहजे तींद्रेम कांय बी खुड़ नी हवणु चाहजे, घाटाळा हवणु चाहजे, आखी वात सीकणेन ताकत हवणु चाहजे, वारु माहती राखण्या हवणु चाहजे, बाकुन समजणे वाळा हवणु चाहजे। ने राजान बंगला मां सेवा करे असा हवणु चाहजे, चु तीनुक बुलाय लायु, ने मुख्या काजे हुकुम आप्यु की तुहुं हीनुक बाबुल मां रवण्यान बुली ने आखी भातीन लिखा पुड़ी करन्यु सीकाड़्यु। ने राजु हुकुम आप देदु की, तीनुक खाणे ने पीणे वाटे अंगुरेन रस मां सी तीनुक दाहड़ीन खाणे पीणे वाटे देणु चाहजे। तेरेसी तीन साल लग तीनुक सीकाड़तु रवे, ती पछेन चे राजा अगळ हजुर हवे। तींद्रेम यहुदान अवल्यातेम सी नेवाड़ला हतला, चे जे छे, दानीयल, हनन्याह, मीसाएल, ने अजर्याह नावेन यहुदी माणसे हतला। ने खास मुख्या तींद्रो दीसरो नाव पाड़्या, मतलब दानीयलेन नाव चु बेलतसस्सर, हनन्याह नाव सदरक, मीसाएल नाव मेसक, ने अजर्याह नाव अबेदनगो पाड़्या।
बाकुन दानीयल आपसा मन मां मान लेदु की चु नी राजान खाणो खाय ने नी अंगुरेन रस पीन ईटळे; तेरेमां चु खास मुख्या असपनज सी लीलघायु की चु ईटाळे नी। भगवान मुख्या पुजारान मन मां दानीयल वाटे गीण-दया भर देदु।3 ने खास मुख्या दानीयल काजे कह्यु, “मे मारा मालीक राजा सी बीह्यो, काहाकी हामरो खाणो-पीणो मारु मालीक राजु नक्खी करलु, कांखुर मायन असो नी हवे की चु तारो मुंहडो तार भेळे जुवान्या सी उतारलु ने नाराज देखे, ने मारो मुणको राजु काट नाखसे।”
तत्यार दानीयल तीना मुख्या असपनज काजे तीना मुखी दानीयल, हनन्याह ने, मीसाएल, ने अजर्याह गुवाळी करने करीन ठेरावलु कह्यु, “मे तुसेक लीलघायन कहों की, तारा पावर्यान दस दाहड़ा लग पारख कर, की चु हामुक खाणे करीन भाजी-पालु ने पीणे करीन पाणी आप्या कर।” अळतेन दस दाहड़ा वीतणेन हामरा जी मुंहडा ने जुवान्या राजान खाणो खातला छे, तींद्रा मुंहडाक देखीन, ने जसा तुसेक देखाय देय, तींद्रे अनसारे आपसा पावर्या सी वेहवार करजी।
तींद्री जी दुवा चु मान लेदु, ने दस दाहड़ा तक तीनुक पारेखतु रयु। दस दाहड़ा वीत गुया ने तींद्रा मुंहडाक राजान खाणो खाणेवाळा आखा जुवान्या सी बेसका वारु ने मातला देखाय देय। तत्यार चु मुख्यु तींद्रो खाणो ने तींद्रो पीणेन पाणी वाटे नक्खी करलो अंगुरेन रस दुयु हापकीन, तीनुक भाजी-पालु देणे बाजी गुया।
ने भगवान तीनु चारु जुवान्या काजे आखा सीके ने आखी भातीन सीके मां अक्कल वाळा ने अक्कलेन सीक आप्यु; ने दानीयल आखी भातीन सातायली वात ने सपनान मतलब बताड़न्यु हय गुयु।
तत्यार जतरा दाहड़ा नक्खी करला ततरा दाहड़ा वीत गुया ने अळी राजु नबुकदनेस्सर तीनुक माहें लावणेन हुकुम आप्यु, ने खास मुख्यु असपनज तीनुक राजा अगळ ली गुयु। ने राजु तींद्रे सी वात वीच्यार करने बाजी गुयु, ने दानीयल, हनन्याह, मीसाएल, ने अजर्याह भीणी तीनु आखा मां सी काहनुक नी नक्खी कर्यु, हेरेसी चे राजा भीणी हजुर रवणे बाजी गुया। ने अक्कल आखी भातीन समजेन बारामां जो काय राजु तींद्रे सी पुछतेलु तींद्रे मां आखा देसेन रासी देखणे वाळा ने जादु टुना सी दस गुणा अक्कल वाळा मानायतेला। ने दानीयल धनवान दरबार मां तत्यार लग रयु, जत्यार लग फारसेन राज करन्यु कुस्रु बेबीलोन पर जीत हात नी कर लेदु।
Source notes (3)
- Cross-reference 2 राजा 24:1; 2 ईतीहास 36:5-7
- Cross-reference 2 राजा 20:17
- Cross-reference उबजाणनी किताप 39:21
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.