भगवानेन छाचला बुल
रोमी 8
चुखली-आत्मान साहरे जीवन
हेरेसी हय जे ईसु मसी मां छे, तींद्रे पर गुनान डंडेन हुकुम नी हय। काहाकी चे डीलेन अनसारे नी बाकुन आत्मान अनसारे चाले। काहाकी जीवनेन आत्मान कायदु ईसु मसी मां पाप भीणी सी ने मुतेन कायदा मां सी छुड़ाय देदलु छे। काहाकी ज काम कायदु डीलेन वजे सी हय नी कर सक्यु, तीना काजे भगवान पुरो कर्यु, मतलब आपणा पुर्या काजे पापेन डीलेन तसु ने पापेन बादान सीका मां मकल्यु, डील मां पाप पर डंडेन हुकुम आप्यु। हेरेसी मुसान साहरे लिखला कायदान रीती काजे आपणे मां सी जे डीलेन अनसारे नी बाकुन आत्मान अनसारे चाले, ची पुरी करसे। काहाकी डीलेन अनसारे चालन्यु माणुस डीलेन वात पर मन लागाड़े; बाकुन चुखला आत्मान अनसारे जीवण्यु माणुस आत्मा वात पर मन लागाड़े। डील पर मन लागाड़नु ते मुत छे, बाकुन आत्मा पर मन लागाड़नु जीवन ने सांती छे; काहाकी डील पर मन लागाड़नु ते भगवान सी नाव-बद्दी राखणु छे, काहाकी नीते चु भगवानेन कायदान कब्जा मां छे ने नी हय सके; ने जे माणसे डीलेन अनसारे जीवन जीवे, चे भगवान काजे खुस नी कर सके।
बाकुन जत्यार भगवानेन आत्मा तुंद्रे मां बसली छे, ती तुहुं डीलेन अनसारे चालु बाकुन आत्मान हक मां चालन्या बणु। कदी काहनाक मां मसीन आत्मा नी हय ती चु मसी मां नी हय। कदी मसी तुंद्रे मां छे, ती डील पापेन वजे सी मरलो छे, बाकुन आत्मा धरमेन वजे सी जीवतेलु छे। कदी हेरीत आत्मा ज ईसु काजे मरलाम सी जीवाड़्यु, तुंद्रे मां बसलु छे; ती जु मसी काजे मरला मां सी जीवाड़्यु1, चु तुंद्रो मरन्या डील काजे बी आपणी आत्मान साहरे ज तुंद्रे मां बसलु छे, च जीवाड़से।
हेरेसी ए भायसे, आपणु डीलेन करजा वाळा2 नी हय की हामु डीलेन अनसारे जीवन नी जीवणु चाहजे, काहाकी कदी तुहुं डीलेन अनसारे जीवन जीवसु ती मरी जासु, कदी आत्मा सी डीलेन हर काजे मारसु ती जीवतेला रवसु। हेरेसी जतरा माणसे भगवान आत्मान साहरे चालसे, चे भगवानेन पुर्या3 छे। काहाकी तुहुं काजे गुलामी कराड़ने वाळी आत्मा नी जड़ी की तुहुं अळी बीहणे बाजी जावु, बाकुन खुळे-लेणी4 आत्मा जड़ली छे, तेरी सी आपणु भगवान काजे ए बास, कह्वीन आयड़जे। आत्मा आपसीत हामरी आत्मा साते गवाय देय, की आपणु भगवानेन अवल्यात छे; ने कदी अवल्यात छे ती जागरीन हकदर्या बी छे, बाकुन भगवानेन जागरी ने मसी साते ने तेरी जागरीन हकदर्या छे, जत्यार आपणु मसी साते दुख झेलसुन ती तेरे साते सेक-सींगार मां हय्न जासु।
आवणे वाळा टेम मां उजेंतो हवण्यु सेक-सींगार
काहाकी मे समजो की ईनी टेमे दुख ने वेला आवणे वाळी टेमे हामरे पर उजेंता हवणे वाळा सेक-सींगार अगळ, फीका छे। काहाकी जी कळी बेसकी मटी आस करीन भगवानेन पुर्यान उजेंता हवणेन वाट देख5 रय। काहाकी कळी आपणी मरजी सी नी बाकुन गुलाम बणावणे वाळा भीणी सी, बेकार मां गुलाम ने ईनी आस सी करली छे। की जी कळी बी आपसीत खत्तम कराड़ने वाळी गुलामी मां सी छुटकारु लीन, भगवानेन अवल्यातेन सेक-सींगारेन छुटकारु बी हात करसे। काहाकी आपणु काजे मालम छे की आखी कळी हय लग कासे ने वेला करीन फपड़ी रय; ने कळी अतरीत वेला करीन नी फपड़ी रय बाकुन आपणु बी वेला कर रया जीनु काजे आत्मान फळ जड़लो छे, जे आपसात कास र्या; ने खुळे लेदला पुर्या बन्नेन, मतलब आपणा डीलेन छुटकारान वाट देख र्या। ईनी आसेन साहरे आपणु छुटकारु हवलु छे; बाकुन जीनी चीजेन आपणु आस करजे, ने ची चीज देखणे मां आवे ती ची आस नी रय, काहाकी जीनी चीज काजे कुय देखणे बाजी र्यो हय ती चु तीनी चीजेन आस काहा करसे? बाकुन जीनी चीज काजे हामु नी देखजे, कदी हेरीत आस राखजे, ती दम धरीन वाट बी देखजे।
ईनी रीत सी आत्मा बी आपणी लुल्गाय मां सात देय; काहाकी आपणु काजे नी मालम की दुवा काहनी रीत सी करनु चाहजे, बाकुन आत्मा आपसीत उसकी-उसकीन, जी आपणी समज सी बाहर हय, हामरे वाटे भगवान सी लीलघाय करे; ने आपणा मन काजे पारखणे वाळु जाणे की आत्मान मरजी काय छे; काहाकी चु चुखला माणसे वाटे भगवानेन मरजीन अनसारे लीलघाय करे।
आपणु काजे मालम छे की जे माणसे भगवान सी परम करे, तींद्रे वाटे आखी वात मेळीन भलाय काजे उबजाड़े; मतलब हींद्रे वाटे जे भगवानेन अनसारे बुलावला छे। जीनुक भगवान पेहलुत सी नेवाड़ी की हीनुक पेहलुत सी आपणा पुर्यान रुप मां ठेरावे काहाकी बेसका भायस मां चु आखा सी मट्लु भायस बण सके। अळतेन तीनु काजे भगवान पेहलुत सी ठेहरावलु छे, तीनु काजे बुलायु बी; ने तीनु काजे बुलायु, तीनु काजे वारलु ठेहरायु, तीनु काजे वारलु ठेरायु तीनु काजे सेक-सींगार बी आप्यु।
भगवानेन परम
अळतेन आपणु एक वातेन बारामां काय कहंजे? कदी भगवान हामरे भीणी छे, ती हामरे वीरुद कुण रवसे? तेरेसी भगवान आपणा खुदेन पुर्या काजे बी नी छुड़्यु, ने आपणे वाटे मरणे करीन आप देदु, ती तेरे साते आपणु काजे अळी आखो काय नी आपे? भगवानेन नेवाड़ला पर गुनु कुण लागाड़से? भगवानुत हीनु काजे नी-गुनाळा ठेहरावसे! पछेन कुण छे जु डंडेन हुकुम आपसे? मसी ईसु छे चु मर गुयु मतलब मरलाम सी जीवतु बी हय गुयु, ने भगवानेन जेवड़े आन्गे छे, ने हामरे वाटे दुवा बी करे। कुण आपणु काजे मसीन परम सी आन्गे करसे? काय दुख, नीते वेला, नीते काड़की, नीते काळ; नीते उघाल्ला नीते आफत, नीते तलवार? जसों खरला सास्तुर मां लिखलो छे,
“तारे वाटे हामु दाहड़ीन मुतेन हात मां आपाय जाजे;
हामु ते तीनु गाडरान तसा गीणाय जाजे।”
बाकुन ईनुक आखी वात मां हामु भगवानेन साहरे जु आपणे सी परम कर्यु, जीत सी बी अघु छेकीन छे। काहाकी मे छाचलीन जाणी लेदु की नी मुत, नी जीवन, नी सरग वाळा काहवाळ्या, नी हकदार, नी हय्न टेम, नी आवणे वाळी टेम, नी ताकत, नी उचाय, नी उंडाय, ने नी कुय अळी कळी आपणु काजे भगवानेन परम सी जे आपणा मालीक ईसु मसी मां छे, आन्गे नी कर सके।
Source notes (5)
- Footnote जिलाया
- Footnote करजा वाळा कर्जदार
- Footnote भगवानेन पुर्या परमेश्वर के पुत्र
- Footnote लेपालकपन
- Footnote वाट देख प्रतीक्षा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.