भगवानेन छाचला बुल
रोमी 7
ईयावेन जीवनेन दाखलु
ए भायसे, मे मुसान लिखला कायदा काजे जाणन्या काजे कहं, की जत्यार लगुन माणुस जीवतेलु रवे, तत्यार लगुन तेरे पर मुसान लिखला कायदान कब्जु रवे। काहाकी ईयाव करली बायरी मुसान साहरे लिखला कायदान अनसारे धेणी जत्यार लगुन जीवतेलु रवे, तत्यार लगुन ईयावेन1 नेम मां बांदायली रवे। बाकुन जत्यार धेणी मर जाय ती ची आपणा धेणीन हक मां सी छुट जाय। तेरेमां कदी चु अदमी 2जीवतेलु रवे ने अळी ची दीसरु अदमी कर लेय, ती छीनाळी कहंवायसे; बाकुन कदी तेरु धेणी मर जाय, ती ची ईयावेन कायदा सी छुट जाय, जां लग की ची कदी दीसरु अदमी बी कर लेय, तेबी छीनाळी नी कह्वाये। असात ए मारा भायस्यो ने बहणीस्या, तुहुं बी ईसु मसीन डीलेन वाटे मुसान कायदान वाटे मरला तसा हय गुयला छे, ने भगवान वाटे फळ लावणे करीन तुहुं तीना दीसरान बण गुयला छे, चु मरलाम सी जीवतु हय्न बठु हय गुयलु छे। काहाकी जत्यार आपणु डीलेन अनसारे जीवतेला ती पापेन हर कायदान वीरुद मां आपणा जीवे मां काम करतेली, ने आपणा डील पर कब्जु कर रवली। तेरेसी आपणु दाहड़ीन मुत भीणी जातला। बाकुन तेरा कब्जा मां आपणु हतला, तेरे वाटे आपणु मर गुयला छे, हय आपणु पाप काजे उजेंती करन्या मुसान साहरे लिखला कायदा सी छुट गुया, जे मुसान कायदा ते जुन्डली रीत छे, आपणु ईनी जुन्डली रीतीन अनसारे नी, बाकुन चुखला आत्मान नवली रीतीन अनसारे भगवानेन सेवा करजे।
मुसान साहरे लिखलु कायदु ने पाप
काय हेरो मतलब ज्य छे की कायदु पाप छे? कदी नी तेबी कायदान साहरेत पापेन पतु चाल्यु कदी कायदु नी कवतु लालुच घुण करे ती मे ज्य नी समजतु की लालुच काय छे। बाकुन पाप मुखु देखीन कायदान हुकुमेन साहरे मारा जीवे मां आखी भातीन लालुच उबजाड़्यु काहाकी पेहले मुसान कायदा पाखुर पाप मरलु हतलु। मे ते मुसान कायदु जड़ने सी पेहले जीवतेलु बाकुन जत्यार मुसान कायदान हुकुम आयु, ती पाप जीवतु हय गुयु, ने मे मर गुयु। ने असु करीन जु कायदान हुकुम मारे धड़े जीवाय आपण्यु हतलु; हयुत कायदु हुकुम मारे धड़े मरनेन वजे बण गुय। काहाकी पाप मुखु देखीन कायदान हुकुमेन साहरे मेसेक भंगलाड़ देदु ने हीना कायदान हुकुमेन साहरे मेसेक मार बी नाख्यु।
तेरेमां मुसान कायदु ते चुखलु छे, ने हुकुम बी चुखलु छे, वारु छे। ती काय जु मुसान कायदु मारे वाटे वारु हतलु, चु मारे वाटे मरनेन वजे बण गुयु काय? कदी नी। बाकुन पाप तीना वारलु चीजेन साहरे मारे वाटे मुत काजे उबजाड़ने वाळु बण गुयु, तेरे सी पाप ते पापुत छे करीन जादास उजेंतु हय गुयु तेरेमां ईनु हुकुम सी पाप जादात पापी हय गुयु।
माणसेन वात-वात मां झगड़ु
आपणुक मालम छे की मुसान कायदु ते जीव-आत्मा वाटे फायदु आपे असु छे बाकुन, ने डीलेन बणलु माणुस छे, जु पापेन गुलामी करने पापेन हातेम वेचायलु छे। ने मारा डील मां मे ज करो, चत मेसेक मालम नी हय, काहाकी ज करनेन मारी हर छे, च मे नी करो, बाकुन तेरे सी मे छीट करो चत काम कर्या करो। ने कदी मेसे ज नी गमे चत करो ती मे जी वात मान लम की मुसान कायदु बेसकु वारु छे। ती असो गलत करन्यु मे नी हय, बाकुन पाप छे जु मारा डीलेम बस र्यु। काहाकी मेसेक मालम छे की मारेम मतलब मारा डील3 मां काहनी बी वात वारु नी हय, वारलु करनेन मारी हर ते छे, बाकुन भलो काम मारे सी नी बणे। काहाकी ज वारलु काम करनेन हर4 करे, च ते नी करु, बाकुन जी कुहराय मे नी करने हींडे, चीत कुहराय मे कर्या करो। बाकुन कदी मे चत करो, ज करनेन मे हर नी करो, ती च करने वाळु मे नी हय, बाकुन पाप छे जु मार डील मां बस र्यु।
अतरा मां मे मारा डील मां जु मुसान साहरे लिखला कायदान देखु, की मे जी भलाय करनेन हर कर र्यु, ती कुहराय मार धड़े आवे। काहाकी मे मारा जीव मां ते मुसान साहरे लिखला भगवानेन कायदा सी बेसकु खुस रवे। बाकुन मेसेक मारा डील मां एक दीसरु भात्यु कायदु देखाव पड़ र्यु, जु मारी अकलेन कायदा साते लड़ाय करे, ने मेसेक पापेन कायदान कब्जा मां करने हींडे जु मारा डीलेम छे। मे बेसकु दुखी माणुस छे! ईना मुतेन हक मां रवणेवाळा डील सी मेसेक कुण छुड़ावसे मे आपणा मालीक ईसु मसीन साहरे मे भगवान काजे तु बेसकु वारु छे करीन कह्वो!
असु करीन मे आपसुत ते अक्कल वाटे भगवानेन कायदाक पाळ, बाकुन डीलेन नीयमेन अनसारे पापेन कायदान सेवा कर र्यु।
Source notes (4)
- Footnote विवाहित
- Footnote पुरुष
- Footnote शरीर
- Footnote ईच्छा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.