भगवानेन छाचला बुल
रोमी 12
मसी मां नवलु जीवन
तेरेमां ए भायस्यो ने बहणीस्या, भगवानेन दया हेर कराड़ीन लीलघाय करे की तुहुं तुंद्रा डील काजे जीवता जीव भेळे, ने चुखलो, ने भगवान काजे गमे असो बादान सारकु भेट चड़ावु। जीत तुंद्री जीव-आत्मा मां भगवानेन सेवा-भक्ती छे। तुहुं ईनी कळीन माणसेन तसा मां बणु; बाकुन तुहुंक नवली अक्कल जड़ गुय करीन आपसो वीच्यार ने वेहवार बदली लेवु, असो करसु ती तुहुं भगवानेन वारु, ने गमे तसी, ने पाक्की मरजी सय रीते पारखीन जाण जासु।
काहाकी मेसेक जड़ली गीण-दया ज तुंद्रे मांयन आखा काजे कहं की जसों आपसा काजे समजणु चाहजे तसात आपसा काजे समजु हेरे सी जादा मां समजु बाकुन हेरे वजे सी आपणी वीच्यार मां वारु जसु भगवान आखा काजे वाटु आप देदलु छे तेरेत अनसारे वारलु अकलेन अनुसार आपसा काजे समजु। काहाकी जसों आपणा डील मां बेसका डील छे, ने आखा डीलेन एक तसों काम नी हय, तसात आपणु बी बेसका हय्न बी ईसु मसी मां एकुत डील मां भेसकायन एक दीसरु डील छे। ने आपणु काजे भगवानेन अगे सी जड़ली गीण-दया अनसारे आंग्ये-आंग्ये वाटु जड़लु छे अतरे तीना काजे आवणे वाळी वात कहंणेन वाटु जड़लु छे जु भुरसान मापे आवणे वाळी वात कहंणु चाहजे; कदी सेवा चाकरी करनेन वाटु जड़लु हय ती तीनाक सेवा चाकरी करतु रहणु चाहजे, ने कदी काहनाक सीकाड़नेन वाटु जड़लु हय ती तीनाक सीकाड़तु रहणु चाहजे। कदी काहाना काजे सीकाड़ानेन वाटु जड़लु हय चु सीकाड़तु रहणु चाहजे; ने तीनाक भेट आपणेन वाटु जड़लु हय, चु भेट आपणो चाहजे ने तीनाक अगवाय करनेन वाटु जड़लु हय चु खुस हय्न अगवाय करतु रहणु चाहजे तीनाक दया करनेन वाटु जड़लु हय चु खुसी सी दया करतु रहणु चाहजे।
तुंद्रु परम खरलु हवणु चाहजे कुहराय सी छीट राखु; ने भलाय मां लागी रवु। भाय-भलाय परम सी एक दीसरा पर परम करु; एक दीसरान ईज्जत सी आव-भाव करने करीन आंबा-सांबा जावु। काठली मेहनत करु आळसी मां बणु; जत्यार बी मालीक ईसुन सेवा करु तत्यार जीव-आत्मा मां खुसी सी सेवा करु। आस मां खुस रवु; दुख मां काठु रवु; ने एक रंग्या दुवा करता रवु। चुखला माणसे काजे ज काय चाहजे तीनु काजे च आपीन तींद्री मदत करु; तींद्री मेजवानी करता रवु।
जे तुहुं काजे वेला पाड़ने वाळा; तीनु काजे तुहुं संयबरकत1 आपु। खुस हवण्या साते खुस हयु; ने रड़ने वाळा साते रड़ु। तुहुं एक वीच्यार मां हय्न मेळीन रवु; मटाय2 मां करु बाकुन नीचळा माणसे सात संगात करु; आपणा नींगा मां अक्कल वाळा मां बणु।
कुहरायन बदला मां कुहराय मां करु। आखान नींगा मां ज वारु छे चत करनेन वीच्यार करु। तत्रो बणे तत्रा आखा माणसे साते सांती मां रवु। ए लाटेक्ला, तुहुं बद्लु घुण लेता बाकुन भगवानेन रीस काजे मुखु आप्जु; काहाकी खरली सास्तुर मां लिखलो छे, बद्लु लेणु मारो काम छे, मालीक कहें मेत बद्लु लीस। बाकुन कदी तारु वेरी3 भुकलु हय ती तीनाक खावाड़ ने कदी पीसलु हय ती तीनाक पाणी पीयाड़; काहाकी असु करसी ती तु तेरा मुणका पर आकठान ईंगाळान ढीक लागाड़ीस। कुहराय देखीन हिम्मत मां हारु बाकुन वारलु काम वाटे कुहराय जीत लेवु।
Source notes (3)
- Footnote संयबरकत आशीष
- Footnote मटाय अभिमानी
- Footnote वेरी बैरी
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.