भगवानेन छाचला बुल
रोमी 13
सरकारेन हुकुम मानु
आखा माणसे काजे सरकारी आफसर्यान हक मां रहणु चाहजे, काहाकी सरकारेन हक भगवान भीणी सी छे; ने जे हक हय छे हीनुक भगवान नेवाड़लु छे। हेरेसी जु कुय सरकारी हकेन वीरुद करे, जु भगवानेन कायदान वीरुद करे, ने जे भगवानेन हुकुमेन वीरुद करे, तीनु काजे डंड जड़से। काहाकी हक करन्या वारलु कामे सी नी, बाकुन भुंडला कामे सी बीहणे वजे छे; हेरेसी कदी तुसे काजे हक करन्या नेता सी बीहे पाखुर रहणु हय, ती वारलु काम कर, ती हक करन्यु नेतु तुसे काजे बेसकु वारु कर्यु करीन कहंसे1; काहाकी राज करन्यु नेतु तारी भलाय वाटे भगवानेन चाकर्यु छे। बाकुन कदी तु कुहराय करे, ती बीहीन रवजी, काहाकी चु फालतु तलवार लीन उबु नी रवे; बाकुन चु भगवानेन चाकरी करन्यु छे काहाकी चु भगवानेन रीसेन अनसारे कुहर्या काजे डंड आपे। हेरेसी हक मां रहणु भगवानेन रीसेन मार्यु अतरुत नी, बाकुन बीहीन बी हक मां रहणु चाहजे बाकुन आपणो मन बी हक मां रहणु चाहजे।
हेरसी फाळु बी आपु काहाकी भगवानेन चाकर्या छे ने चे जलम ईनात काम मां लागला रवे। हेरेसी आखान हक काजे पुरो करे; तीना काजे फाळु आपणु चाहजे, तीना काजे फाळु आपु; तीना काजे वसोली चाहजे, तीना काजे वसोली आपु; तीना सी बीहणु चाहजे तेरे सी बीहु, तेरी ईज्जत करनु चाहजे, तेरी ईज्जत करु।
एक दीसरान तकलीप काजे सामळु
आंबा-सांबा परम करनु छुड़ीन दीसरी काहली बी वातेन करजा वाळा नी हवणु चाहजे; काहाकी जु दीसरा काजे परम करे, चु मुसान कायदा काजे पाळी लेदलु छे। काहाकी ज्य की “छीनाळो घुण करे, खुन घुण करे, चुरी घुण करे, लालुच घुण करे।” ने काहनु बी हुकुम हय तीना हुकुमेन जु जीत साहरु छे, “आपणे साते वाळा काजे आपणेन तसा परम करु।” परम धड़े वाळान काय बी कुहराय नी करे, हेरे सी परम करनु मुसान कायदा काजे पुरो करनु छे।
ने तुहुं टेम काजे उळखीन असात करु, तुहुं जाणु की नीद मां सी जागणेन टेम आय गुयली छे; काहाकी जीनी टेमे आपणु ईसु पर भुरसु करला, तीने टेमेन वीच्यार सी हय आपणु छुटकारु धड़ेत आय गुयलु छे। रात बेसकी हय गुयली छे, दाहड़ु उंगणेत वाळु छे; हेरेसी आपणु आंदारलान काम छुड़ीन आपणु वीजाळान हत्यार धर लेता। हेरेसी हामु असात वारु रीती सी रहणु चाहजे जसा दीसुन टेमे रवजे, बेसका जादा पाल्टी मां जाय्न पी खाय्न छाकी घुण जावु। लुच्चाय गुना छीनाळा मां घुण पड़ु। बाकुन मालीक ईसु मसी काजे पुथल्यान तसु पेहरी लेजु ने डीलेन पाप पुरो करनेन वीच्यार नी करनु चाहजे।
Source notes (1)
- Footnote वारु कर्यु करीन कहंसे सराहना
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.