भगवानेन छाचला बुल
उजेंता बुले 12
बायर ने अजगर
तत्यार सरग पर एक मट्ली सहलाणी देखाय देदी, मतलब एक बायर ची दाहड़ु पेहरली हतली, ने चांद तेरे पांय तळे हतलु, ने तेरे मुणका पर बारे तारान मुड़ हतलु; ने ची भार पाये हय, ने आयड़तेली; काहाकी तेरे फवरी हवणेन दुख लागलु हतलु; ने ची फवरी हवणेन दुख मां हतली।
एक अळी सहलाणी सरग मां देखाय देदी, एक मट्लु रातलु अजगर हतलु, तेरा सात मुणका ने दस सींगड़ा हतला, ने तेरा मुणका पर सात राज मुड़ हतलु। ने तेरी छेम्टी सरग सी तारान तीन हीस्सा काजे खेचीन धरती पर नाख देदु, ने चु अजगर तीनी बायरीन अगळ पुर्यो हतलो, चां हुबु हतलु, काहाकी जत्यार तेरो पुर्यो हवे ती तेरा पुर्या काजे घीटी जाय। ने ची पुर्याक पयदा करी जो लुहड़ान राजेन हक वाटे हयो, आखा जाती पर राज करनेत पर हतलु, ने तेरो पुर्यो भगवान धड़े, ने तेरा राजगादी धड़े हाकलीन मकली देदो। ने ची बायर पला जंगल मां ढासी गुई, जांहा भगवान भीणी सी तेरे वाटे एक जागु तीयार करलु हतलु की चां हयु एक हजार दुय सोव सांठ दाहड़ा लग पाळे।
तत्यार सरग पर लड़ाय हय, मीकायेल ने तेरे सरग वाळा काहवाळ्या अजगर सी लड़ाय करने नीकळ्या; ने अजगर ने तेरा काहवाळ्या तेरे सी लड़ाया, बाकुन जीतायो नी, ने सरग मां तींद्रे वाटे अळी जागु नी रयु। ने चु मट्लु अजगर मतलब हयुत पुराणु घड़सु, जु भुतड़ु कहवाये, ने आखा दुनीया काजे भटकाड़ने वालु छे, धरती पर नाख देदा; ने तेरा सरग वाळा काहवाळ्या तेरे पुठ्येत उराटी देदा।
तत्यार मे सरग सी असी अवाज आवतेली सामळ्यु, हय हामरा भगवानेन छुटकारु, ताकत, राज, ने तेरा मसीन हक उजेंतु हवलु छे; काहाकी हामरा भायस्ये पर गुनु लागाड़न्यु, जु रात दाहड़ु आपणा भगवान अगळ तीनु पर गुनु लागाड़्या करतेलु, उराटी देदा। ने चे गाडरान पीलान लुहीन वजे, ने तींद्री गवायन बुलेन वजे, तीना सी जीत्या, काहाकी चे आपसा जीव सी परमवाळु नी समज्या, जां लग की मरण बी सेण कर लेदा। “ईना वजे, ए आखा सरग, ने तींद्रेम रहणे वाळा खुस हवु; ए धरती, ने दरीया, तुंद्रे पर हाय! काहाकी भुतड़ु बेसकी रीसेन साते तुंद्रे धड़े उतरी आयु; काहाकी जाणे की तेरु थुड़ीक टेम अळी रवली छे।”
जत्यार अजगर देख्यु, की मेसेक धरती पर उराटी देदा, ती तीनी बायर काजे जी पुर्याक पयदा करली, तीनीक दम्यु। बाकुन तीनी बायर काजे घुवड़ान दुय पाखड़ा देदला छे, की घड़सा अगळ सी उडीन जंगल मां पला जागा पर जाती रहे, जांहा ची एक टेम, ने बेसका टेमे, ने आधी टेम लग पाळाय जाय। ने घड़सु तीनी बायरी पछळ आपसा मुंहडा सी नदी तसों पाणी उहुवाड़्यु की तीनीक ईनी नदी सी उहाड़ी दम। बाकुन धरती तीनी बायरीन मदत करी, ने आपसीन मुंहडो फाड़ीन तीनी नदी काजे जु अजगर आपसे मुंहडे सी उहाड़लु, पी गुय। तत्यार अजगर काजे बायरी पर रीस आय, ने तेरी बचली अवल्यात सी जे भगवानेन हुकुम काजे माने, ने ईसुन गवाय देणे करीन काठा छे, लड़ाय करने करीन गुयु। ने चु दरीयान रेतळा पर जाय्न हुबु हय गुयु।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.