उजेंता बुले 11

दुय गवा

1तत्‌यार मेसेक मापणे करीन एक सुटी देदु, ने काहनुक कह्‌यु, “उठ, भगवानेन मंदीर ने चड़ावान जागु, ने तींद्‌रेम भक्‌ती करने वाळाक नाप ले। 2बाकुन मंदीरेन बाहरलो आंगणो छुड़ दे; तीनाक मां नापे काहाकी चे दीसरी जाती काजे देदलो छे, ने चे चुखला सहर काजे बय्‌यालीस महना लग रंदळसे। 3ने मे मारा दुय गवा काजे जु हक दीस की गंटाट्‌या पांगरला एक हजार दुय सोव सांठ दाहड़ा लग भगवानेन खबर फेलाया करे।”

4जे चेत जेतुनेन दुय झाड़का ने दुय दिवा छे, जे धरतीन मालीक अगळ उबा रहे। 5ने कदी काहनुक तीनुक नुकसाण करने चाहसे, ती तींद्‌रे मुंहडा सी आकठो नीकळीन तींद्‌रा वेरी काजे नास करे, ने कदी काहनुक तीनुक नुकसाण करनु चाहसे, ती छाचली ईनीत रीती सी माराय जासे। 6तीनुक हक छे, की सरग काजे बंद करे, काहाकी तीनुक भगवानेन खबर फेलावणेन दाहड़ाम पाणी नी पड़े, ने तीनुक आखा पाणी पर बी हक छे, की तीना पाणीक लुही बणावे, ने जत्‌यार चाहे तत्‌यार धरती पर आखी भातीन गरा लावे।

7जत्‌यार चे आपसी गवाय दी देसे, ती चु जनवार्‌या जु उंडला कुंड मां सी नीकळसे, तींद्‌रे सी लड़ीन तीनुक जीतसे ने तीनुक मार नाखसे। 8ने तींद्‌रा धड़ तीना मटला सहरेन गळ्‌या मां पड़ला रवसे, जु आत्‌मान रीती सी सदोम ने मीसर कहवाये, जां तींद्‌रु मालीक बी कुरुस पर चड़ावलु हतलु। 9ने आखा माणसे, कुळी, बुली, ने जाती मां सी माणसे तींद्‌रा धड़ काजे साड़ी तीन दाहड़ा लग देखता रवसे, ने तींद्‌रा धड़ काजे गाड़नी नी देसे। 10ने धरती मां रहणे वाळा तींद्‌रे मरने सी खुस हवसे, ने एक दीसरा काजे नेवता मकलसे, काहाकी जे दुय अघली वात बताड़ने वाळा धरती मां रहणे वाळा काजे दमला छे। 11बाकुन साड़ी तीन दाहड़ान पछेन भगवान सी आवलु जीवनेन दम तेरेमां आय गुयु; ने चे आपसा पायेन भुरसे उबा हय गुया, ने तीनु देखणेवाळा पर मटलो बीहाणो भराय गुयो। 12ने तीनुक सरग सी एक मट्‌ली अवाज सामळाय, “जां उपर आवु!” असो सामळतात चे वादळा पर सवार हय्‌न आपसान वेरी काजे देखता-देखता सरग पर चहड़ी गुया। 13ने तीनीत घड़ी धरती बेसकी हालने लागी, ने सहरेन दस हीस्‌सा मायन एक हीस्‌सु उदरी गुयु; ने धरती हालने सी सात हजार माणसे मर गुया ने रवला सीयारी ली लेदा, ने सरगेन भगवानेन सेक-सींगार कर्‌या।

14सामळु दीसरी गरा वीत गुय; तत्‌यार, तीसरी गरा मामारुत आवणेवाळी छे।

सातवों फेप्‌यो

15जत्‌यार सातवु सरग वाळु काहवाळ्‌यु फेप्‌यो फुक्‌यु, ती सरग मां हेरे बारामां जुर-जुर आयड़ीन अवाज मां कहणे लाग्‌या, “दुनीयान राज हामरा मालीकेन ने तेरा मसीन हय गुयो ने हयु जलम राज करसे।” 16ने वीस ने चार मुख्‌या डाहला जे भगवान अगळ आपसा-आपसा राजगादी पर बठला हतला, मुंहडान भुरसे पड़ीन भगवान काजे आंधीन, 17असा कहणे लाग्‌या,

“ए आखाम सी ताकतवाळा मालीक भगवान, जु छे ने जु हतलु,

हामु बेसकु वारु छे करीन कवजे की,

तु आपसान मट्‌ली ताकत काजे काम मां लावीन राज करलु छे।

18नी-यहुदी रीस कर्‌या,

ने तेरी रीस आय पड़्‌यु ने पली टेम आय गुयली छे,

की मरला सरलान नीयाव हवे, ने तारु सेवक भगवानेन अघली वात बताड़ने वाळा,

ने चुखला माणसे काजे,

ने तीनु नानला मटान जे तारा नाव सी बीहे,

बदलु देसे।

ने धरतीन बीगाड़ने वाळा नास हवसे!”

19ने भगवानेन जु मंदीर सरग मां छे, उघाड़ी देदा, ने मंदीर मां भगवानेन बुलेन पेटी देखाय, वीजळ्‌या, अवाज, गाजण ने धरती हाली, ने बेसकु पाणी पड़्‌यु।