मरकुस 4

बीज एरन्‌‌‌यान दाखलु

(मत्‌‌ती 13:1-9; लुका 8:4-8)

1ईसु पछु दरीया धड़े माणसेक सीकाड़ने बाजी गुयु। अळी बेसका माणसे ईसु धड़े भेळा हया, की ईसु दरीया मां एक ढंड्‌याम जाय्‌न बठी गुयु ने आखा माणसे एक धड़े जागा पर दर्‌यान धड़के उबा रय गुया। 2ने ईसु दाखलु दीन तीनु काजे बेसकी वात सीकाड़्‌यु ने सीकाड़तु जाय्‌न कह्‌यु,

3“सामळु! एक जणु बीज एरने गुयु। 4एरनेन टेम मां थुड़ाक बीज वाटे धड़े पड़्‌या ने चिरला आवीन ईछीन खाय गुया। 5थुड़ाक बीज चापर्‌या मां पड़्‌या चां अदु धुळु नी जड़्‌यु, ने जादा धुळु नी जड़नेन वजे सी छाटा उन्‌‌‌गी गुया, 6ने जत्‌यार दाहड़ु उन्‌‌‌गीन तप लाग्‌यु तत्‌यार च धान उन्‌‌‌गीन चीमाय गुयो ने जड़ नी धरनेन वजे सी सुक गुयो। 7थुड़ाक बीज काटाळस्‌या झाड़का मां पड़्‌या ने चां मटा हय्‌न दड़पाय गुया ने चे फळ नी लाया। 8बाकुन थुड़ाक बीज वारलु जागा मां पड़्‌या ने चे उंग्‌या ने काहनाक मटा हय्‌न तीस गुणा ने काहनाक सांठ गुणा ने काहनाक सोव गुणा दाणा पाक्‌या।”

9तत्‌यार ईसु कह्‌यु, “कुणी धड़े कान्‌टा छे, चे सामळी लेय!”

ईसु दाखला मां काय सीकाड़े?

(मत्‌‌ती 13:10-17; लुका 8:9-10)

10जत्‌यार माणसे जाती रया ने ईसु एखलुत रय गुयु, ती तेरा बारे ईसुन चेला ने थुड़ाक दीसरा बी ईसु धड़े आवीन चे दाखलान मतलब पुछ्‌या। 11ईसु तीनुक कह्‌यु, तुहुं काजे भगवानेन राजेन वात समजणेन अक्‌कल छे, बाकुन बाहार वाळा वाटे, आखी वात दाखला मां सामळावसे, 12तेरेमां की,

चे देखे बाकुन देखता जाय्‌न,

बी नी उळख्‌या;

ने चे सामळे ने,

सामळता जाय्‌न बी नी समजी गुया।

कदी चे सामळता ती समजीन भगवान भीणी अळ जाता,

ती तींद्‌रा पाप माफ कर देतु।

बीज एरेन्‌‌‌यान दाखलान बारामां समजाड़्‌यु

(मत्‌‌ती 13:18-23; लुका 8:11-15)

13ईसु तीनुक कह्‌यु, “काय तुहुं काजे जु दाखलु नी समज मां नी पड़तु, ती रवला दाखला काजे कसा समज्‌सु? 14एरने वाळु बुले एरे। 15जे वाटे धड़े छे बुले एराये, चे जे छे की जत्‌यार चे सामळ्‌या, ती भुतड़ु तत्‌यारुत आय्‌न बुले काजे ज तेरेमां एराय्‌लो छे, चु तीनाक ईछी ली जाय। 16काहनाक माणसे ते चापर्‌या वाळा जागान तसा छे; चे भगवानेन बुल सामळीन खुसी-खुसी सी आवरी देय। 17बाकुन आपसान माहीं बुलेन वारु जड़ नी धरनेन वजे सी थुड़ाक दाहड़ा वाटे लग रवे; ने पछेन बुले माने ती तींद्‌रे पर मुसकील ने नाव-बद्‌दी आवे ती चे तत्‌यारुत भुरसु खुय देय। 18ने काहनाक माणसे असा छे की काटाळस्‌या झाड़ी मां एरला बीज छे, चे माणसे बुले काजे सामळ्‌या। 19ने चे जीवेन फीकुर करीन ने मात-भर बणनेन लालुच ने आखी भातीन चीजेन फीकुर मां भगवानेन बुले काजे दड़पी देय, ने चे दाणा नी पाके। 20ने काहनाक माणसे चे वारलु जागान तसा छे चां दाणान तसों भगवानेन बुल समाय जाय; जे भगवानेन बुल सामळे ने मानीन पाळे। ने चे दाणा पाके काहनाक तीस गुणा ने काहनाक सांठ गुणा, ने काहनाक सोव गुणा।”

दिवान दाखलु

(लुका 8:16-18)

21ईसु तीनु काजे कह्‌यु, “काय हामु दिवा काजे असा करीन लावजे की ठाहरा तळे नीते खाट्‌ली तळे मेक्‌जे? काय असा करीन नी लावे की, दीवाळ्‌या पर मेके।” 22ने काय बी चीज सातायलो नी हय, ची देखाय जासे। ने जी चीज ढाकायली छे, जी उघड़ी जासे। 23कदी काहनाक ने सामळनेन कान्‌टा हय, चे वारु सामळी लेय।

24पछेन अळी ईसु तीनुक कह्‌यु, “ज काय तुहुं सामळु तीनी वात पर मन लागाड़ीन वीच्‌यार करु। तीना नाप सी तुहुं नापसु तीनी नाप सी तुंद्‌रे वाटे बी नापायसे, तेरसी बी जादा तुंद्‌रे साते हवसे। 25काहाकी तेर धड़े ज काय छे, तीनाक अदुस आपसे; ने तींद्‌रे धड़े काय नी हय, तेरे धड़े सी ज काय ईतरोक रय र्‌यो, च बी मांग लेसे।”

उंगणे वाळा बीजेन दाखलु

26ईसु अळी एक दाखलु कह्‌यु, “भगवानेन राज असो छे, जसों की एक माणुस खेत मां बीज एरे। 27ने राते सुय गुयु, ने एगुत जागे, ने चे बीज कसा उंगीन मटा हया करीन पतु नी चाल्‌यु। 28धरती मां मेर आपसीत मटी हय्‌न पाकी जाय। पेहेल डीरी फुटे अळतेन उम्‌बी नीकळे ने उम्‌बी मां दाणा भराये। 29बाकुन जत्‌यार दाणा पाकी जाय तत्‌यार चु तत्‌यारुत दातळा सी काटणेन तीयारी कर लेय, काहाकी काटणेन टेम आय गुय।”

रायन दाणान दाखलु

(मत्‌‌ती 13:31,32,34; लुका 13:18,19)

30ईसु तीनुक कह्‌यु, “आपणु काहना हीसाब सी उळख्‌सुन की, भगवानेन राज कसों छे? ने काहना दाखला सी समज्‌सु? 31भगवानेन राज रायन दाणान तसों छे; जत्‌यार खेत मां एरे ती; चां दीसरा आखा बीजे सी नानला देखाये। 32बाकुन जत्‌यार चुपी देय, ती अदी जाय ने आखी मेर सी मटो हय जाय, ने तेरा डाळखा बेसका मटा हय जाय ने चां सरगेन चिरला बी पुत्‌रु बणायन आराम करे।”

33ईसु अळी बेसका दाखला दीन माणसेक बुले सामळाया करतेलु, जतरा सामळनेन मन हय, तत्‌रोत सामळावतेलु, 34ने दाखला पाखुर ईसु तीनु काजे काय बी नी सीकाड़तेलु बाकुन एखला मां तेरा चेला काजे दाखलान मतलब सीकाड़तेलु।

ईसु आंधी काजे मानाड़े

(मत्‌‌ती 8:23-27; लुका 8:22-25)

35तीनेत दाहड़े सांती वेळाय, ईसु चेला काजे कह्‌यु, “आवु, आपणु दरीयान पली धड़ जाता।” 36ने ईसुन चेला तीनी गड़दी सी अलग हय्‌न, चेला तीना ढंड्‌या मां चहड़ी गुया, जां ईसु ढंड्‌या मां पेहलुत सी बसी रवलु, ने चां तींद्‌रे पुठ्‌ये दीसरा ढंड्‌या बी हतला चे बी जाणे बाजी गुया। 37तत्‌यारुत दरीया मां मट्‌ली आंधी-हवा आवी ने झलक ढंड्‌ये बेसकी ठुकाय ने ढंड्‌या मां पाणी भरायतेलो। 38बाकुन ईसु ढंड्‌यान पछला खुणा मां ईसु ईसों मेलीन सुय रवलु। तत्‌यार चेला ईसु काजे उठाड़्‌या ने तीनाक कह्‌या “ए मास्‌तर, हामु ते मरने बाजी रया, तुसेक फीकुर नी हय काय?” 39तत्‌यार ईसु उठ्‌यु ने आंधी-हवा ने झलक काजे लड़ीन कह्‌यु, “हुगी रय जां।” ने आंधी-हवा ने झलक धीरी पड़ीन आखी हुगी रय गुय; 40ने ईसु चेलाक कह्‌यु, “तुहुं काहा बीही रया? तुहुं काजे हाल बी भुरसु नी हय काय?” 41चेला बेसका बीही गुया ने आंबा-सांबा कह्‌णे बाजी गुया, “जु कुण छे? की आंधी-हवा ने पाणीन झलक लग हेरी वात!”