भगवानेन छाचला बुल
मरकुस 5
ईसु भुतड़ा काजे एक माणुस मां सी नीकाळे
(मत्ती 8:28-34; लुका 8:26-39)
ईसु ने तेरा चेला दरीयान पली धड़ गीरासेन्यान ईलाका मां गुया, जत्यार ईसु ढंड्या मां सी उतर्यु; तत्यारुत भुतड़ा लागलो एक माणुस मसाण मां सी नीकळीन आयु। चु माणुस मसाण मां रवतेलु। ने माणसे तीनाक साकळ सी बांदणेन कुसीस कर्या बाकुन, चु कुय सी नी बांदाय तेलु, काहनाक1 तीनाक काय कतराक कावा हात मां साकळ ने पाय मां बी साकळ बांदी देदला, तेबी चु तुड़ी देदलु, ने चु साकळ काजे बटका-बटका कर देदलु, ने तीनाक कुय बी बदाड़ी नी सकतेला, काहाकी चु ताकत वाळु हतलु। चु रात-दाहड़ु मसाण2 ने बयड़ा मां आयड़तु फीरतेलु ने तेरेत दगड़ा दी दीन बेहुस हय जातलु।
चु माणुस ईसु काजे छेटे सी आवतेलु देखीन दवड़ीन ईसु अगळ ढंगु अळीन मांडान भुरसे आंध्यु। ने जुर सी आयड़ीन3 कह्यु “ए ईसु, आखा मां सी मुख्या भगवानेन पुर्या, मारे साते तारो काय काम छे? मेसे भगवानेन सगुन छे, की मेसेक डंड मां आपे।” काहाकी ईसु तीनाक कह्तेलु की, “ए भुतड़ा ईना माणुस मां सी नीकळी जां।”
ईसु तीना माणुस काजे पुछ्यु “तारो नाव काय छे?”
ने चु कह्यु, “मारो नाव ‘सेना’ छे; काहाकी हामु बेसका छे।” ने भुतड़ा ईसु सी वीन्ती कर्या, “हामु काजे ईना ईलाका मां सी बाहार मां मकले।”
चां एक बयड़ान कड़खे सुहर्यान एक मटु टुळु चरने बाजी रवलु। भुतड़ा अळी लीलघाय्न कह्यु, “हामु काजे पला सुहर्या मां मकली दे, तींद्रेम हामु रवसुन।” ईसु भुतड़ा काजे हुकुम आप्यु; ने चे भुतड़ा तेरे मां सी नीकळीन सुहर्या मां जाय्न भराय गुया ने चे सुहर्या दुयेक हजार हतला, चे आखा सुहर्या दवड़ीन दरीया मां कुद पड़्या ने पाणी मां डुबीन मर गुया।
ज देखीन गुवाळ्या दवड़ीन फळ्या ने गांव मां जाय्न ज काय हयो, तेरी खबर कर देदा, ने आखा माणसे ज काय हयो च देखणे आया। ने जत्यार दीसरा माणसे ईसु धड़े आया चां तीना माणुस काजे देख्या, तेरे पेहेल भुतड़ा लागी रवला। बाकुन चु वारु हय्न पुथल्या पेरीन बठी रवलु, तत्यार चे माणसे बीही गुया। भुतड़ा लागला माणसेन ने अळी सुहर्यान काय हयो करीन, चे देख्णे वाळा पुछ्या, ने सुहर्यान बारामां जाय्न दीसराक कय देदा।
तत्यार माणसे आवीन ईसु काजे लीलघाय्न कह्या की, हामरा ईलाकाम सी जाती रव।
तत्यार ईसु पछु जाणे करीन ढंड्या मां बसणे बाजी गुयु; तीनाक पेहेल भुतड़ा लागी रवला, चु माणुस ईसु काजे लीलघाय्न कह्यु, “मेसेक तारे पुठ्ये आवणी दे।”
बाकुन ईसु तीनाक कह्यु, “नी मारे पुठ्ये मां आवे, घर पछु जां ने मालीक तारे पर दया करीन तारे वाटे कतरु वारु काम कर्यु, च तारा घर वाळाक बताड़।”
चु चां सी तेरा दीकापुलीस जीलाम आखे जागे जाय्न परचार करने बाजी गुयु की ईसु मारे वाटे बेसको वारु काम कर्यु, ने माणसे तेरी वात काजे सामळीन देखतात रय गुया।
याईरेन पुरे ने पोगराळी दुख वाळी बायर
(मत्ती 9:18-26; लुका 8:40-56)
गीरासेनीया ईलाका मां सी ईसु पछु ढंड्या मां बठीन दरीयान पली धड़ गुयु। ती चां धड़के माणसेन गड़दी चारे मेर लाग गुय। याईर नावेन एक माणुस हतलु, चु तींद्रा भक्तीन घरेन मुख्या मायन एक हतलु, चु ईसुक देखीन पाये पड़्यु, ने चु ईसु सी लीलघाय्न कह्यु, “मारी नानली पुरे मरनेत पर छे। तु दया करीन मारे पुठ्ये चाल, ने तेरे पर हात मेल, ने ची वारु हय्न जीवतेली रवे!”
तत्यार ईसु तेरे पुठ्ये चाली पड़्यु। ने मट्ली गड़दी बी पुठ्येत गुय। ने तेरे पुठ्ये चालन्या माणसे चीपदाय्न ने धकलाय्न ईसु पर पड़तेला।
एक बायर हतली, तेरे बारे साल सी पोगराळान दुख लागलो हतलो। ची बेसकी परेसान हतली ने डाक्टर्या मां ईलाज कराड़ी-कराड़ीन आखा पयस्या सर गुयला, तेबी वारु नी हय। बाकुन जादास मांदी हय गुय। ची ईसुन बारामां ज सामळीन गड़दी मां तेरे पछळ सी आय, ने ईसुन पुथल्या काजे छीमी लेदी। काहाकी ची सुचतेली की, “कदी मे ईसुन पुथल्याक छीमी लीस, ती मे वारु हय जायस।”
असी करीन ची माणसेन टुळा मां धकलाय्न ईसुन पुथल्या काजे छीमी लेदी ने तत्यारुत तेरे लुही नीकळनु बंद हय गुयो, ने तेरा डील मां मालुम पड़ गुयो, की मे हीड़ा-पीड़ा मां सी छुटीन वारु हय गुय। ने तत्यारुत ईसुन डील मां मालुम पड़ गुयो, की मारे मां सी छुटकारु आपणेन ताकत नीकळी छे, ने ईसु पछु फीरीन गड़दी मायन माणसेक पुछ्यु, “मारो झगल्यो कुण छीम्यो?” तेरा चेला तीनाक कह्या, “जे माणसे ते चीपदाय्न ने धकलाय्न तारे पर पड़ रया ने तु काहा पुछी र्यु की; मेसेक कुण छीम्यो?”
तत्यार बी ईसु मेसेक कुण छीम्यो करीन देखणे चारे मेर भाळने बाजी गुयु। तत्यार ची बायर मारो बेसको भलो हवलो छे असी जाणीन ची बीहती ने कापती जाय्न ईसु धड़े आवी, ने ईसुन पाये पड़ी ने ज काय हयो च छाचलीन बताड़ देदी। ईसु तीनीक कह्यु, “मारी बेटी तु ते मारे पर भुरसु करी, तेरेमां तु हीड़ा-पीड़ा मां सी छुटीन वारु हय गुय। तु सुकेन जीवे जीवती रव।”
ईसु तीनीक कवणे बाजी रवलु, ती चां तीना याईरेनेन घर मां सी काहनाक आवीन मुख्या काजे कह्या, “तारी पुरे नी बची, ने मास्तर काजे काहा दमे।”
ईसु तींद्री वात4 काजे सामळ्यु बाकुन धीयान नी देदु ने मुख्या काजे कह्यु, “मां बीहे, बाकुन मारे पर भुरसु अतरुत राख।” ने ईसु दीसरा काजे चाहात रहणीदीन पतरस ने याकुप ने अळी याकुपेन भायस युहन्ना काजे अतरुत तेरे पुठ्ये आवणे देदु। ने ईसु तींद्रे पुठ्ये5 मुख्यान घर पुग्या; तत्यार घर मां बेसका माणसेक देख्यु ने रड़तेला ने आयड़ता सामळ्यु। तत्यार ईसु घर मां जाय्न तीनुक कह्यु, “तुहुं काहा रड़ीन ने कलपी र्या? पुरे मरी नी बाकुन, सुवणे बाजी रय।”
चे माणसे ईसुन वात सामळीन हीनाक हासणे बाजी गुया, बाकुन ईसु तीनु आखा काजे घर मां सी बाहर नीकाळ देदु ने पुरेन आयस-बास ने अळी तेरा तीन चेला काजे लीन पुरे हतली, चां गुया ने पुरे मरीन पड़ी रवली। ने ईसु पुरेन हात धरीन तीनीक कह्यु, “तलीता, कुमी!” तेरो मतलब छे, “पुरे मे तुसेक कहं की उठ!”
ने ची नानली पुरे तत्यारुत जीवती हय्न उठ गुय ने चालने फीरने लागी; ची पुरे बारे सालेन हतली। ने चे ज देखीन देखतात रय गुया। पछेन ईसु तीनुक हुकुम6 आपीन कह्यु, जी वात कुय काजे घुण कहें, “ने अळी असु बी कह्यु, की पुरे काजे काहींग खाणे आपु।”
Source notes (6)
- Footnote क्योंकि
- Footnote कब्र
- Footnote चिल्लाकर
- Footnote बात
- Footnote सात
- Footnote आज्ञा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.