मरकुस 11

यरुसलेम मां ईसु जाय

(मत्‌‌ती 12:1-11; लुका 19:28-40; युहन्‌ना 12:12-19)

1तसात ईसु ने चेला, ने पुठ्‌ये चालन्‌या माणसे यरुसलेम गांव धड़े जेतुन झाड़कान बयड़ा पर बेतफगे ने बेतन्‌या गांव धड़े आया, चां ईसु तेरा चेला मां सी दुय काजे मकल्‌यु, 2“तुहुं काजे पल्‌लो गांव देखाये चां जावु, ने चां जातान तुहुं काजे गदड़ीन पीलो बांदलो देखायसे; तेरे पर, हाल लग कुय नी बठ्‌यो, तीना काजे छुड़ीन ली आवु। 3कदी1 तुहुंक काहनाक पुछे की हीना काजे काय करने छुड़ी रया? ती तुहुं कवजु, मालीक काजे ज गदड़ो चाहजे ने मालीक हीना गदड़ा काजे छाटुस पछु दी मकलसे।”

4ने चे जाय्‌न च गदड़ीन पीलो वाटे धड़े आंगणा मां बांदायलो देखीन छुड़ने बाजी गुया। 5ने चां उबा हय रवला, चे काहनाक कह्‌णे बाजी गुया, “गदड़ीन पीला काजे छुड़ीन काय करने हींडी र्‌या?” 6जसु ईसु तीनुक कह्‌लु तसात चे तीनुक कय देदा; तत्‌यार चे गदड़ीन पीला काजे लीन जाणी देदा। 7ने चे गदड़ीन पीला काजे ईसु धड़े लाया ने चे तींद्‌रा पुथल्‌या गदड़ान पीला पर नाख देदा। ने ईसु तीना गदड़ीन पीला पर बठ गुयु। 8तत्‌यार बेसका माणसे तींद्‌रा पुथल्‌या ईसु अगळ-अगळ वाटे पर आथरी देदा ने दीसरा माणसे खेतेन सेडे सी पान्‌टा वाळा डाळखा काटी काटीन लाय्‌न आथरी देदा। 9चे बी ईसुन अगळ-अगळ ने पछळ-पछळ जातला चे आयड़ी-आयड़ीन कवतेला, “होसान्‌ना मतलब ए मालीक हामुक वाचाड़! बरकतवाळु छे चे, जे मालीकेन नावे सी आवे! 10आपणा बास दावुदेन राज चो आव्‌णे बाजी र्‌यो; बरकतवाळु छे! उंचा सरग मां भगवानेन बड़ाय हवे होसान्‌ना।”

11ने ईसु यरुसलेम मां पुगीन मंदीर मां गुयु, ने चारे मेर वाळी आखी चीज काजे देख्‌यु, काहाकी दाहड़ु डुबणे वाळु हतलु, तत्‌यार ईसु चेला पुठ्‌ये बेतन्‌या गांव मां गुयु।

ईसु अंजीरेन झाड़काक सराप देय

(मत्‌‌ती 21:18-19)

12दीसरे दाहड़े ईसु ने चेला बेतन्‌या सी नीकळीन गुया, ती ईसु काजे भुक लागी। 13ने चे छेटे रय्‌न एक अंजीरेन नीळ्‌ळा झाड़का काजे देखीन धड़े गुयु की काहींग चां खाणेन जड़ जाय, बाकुन पान्‌टाक छुड़ीन काय बी नी हतलो काहाकी फळ लागणेन टेम नी आय रवली। 14ईनी वात पर ईसु झाड़काक कह्‌यु, “हय सी तारा फळ कदी नी लागे ने कुय काजे बी खाणेन नी जड़े!”

ने चे सराप देतलान चेला सामळी रवला।

ईसु मंदीर मां सी लेण-देण करन्‌या काजे नीकाळ्‌यु

(मत्‌‌ती 21:12-17; लुका 19:45-48; युहन्‌ना 2:13-22)

15पछेन ईसु ने चेला यरुसलेम मां आया, ने ईसु मंदीर मां गुयु, ने चे लेण-देण कर तेला तीनु काजे बाहर नीकाळने लाग्‌यु, ने पयस्‌या अदलु-बदलु करन्‌याक ने पेरवा वेचणे वाळान चारला उथलाय दीन बाहार नीकाळ देदु। 16ने ईसु मंदीर मां आखा काजे ठाहरा लीन आवणु जाणु बंद कर देदु। 17ने सीकाड़तु जाय्‌न कह्‌यु, काय असो नी लिखलो हय की, मारो घर आखा देसेन माणसेन भक्‌तीन घर कवाय्‌से बाकुन तुहुं ते ईना घर काजे चुट्‌टान घर बणाय देदा!

18ज सामळीन यरुसलेम मंदीरेन डाहलु पुजारु ने यहुदी नीयमेन मास्‌तर्‌या हतला। अतरा मां चे ईसु काजे मारनेन मुखु हेरने लाग्‌या। काहाकी आखा माणसे ईसुन सीकाड़नेन वात सी देखतात रय जातला ने ईसु सी बीहतेला।

19ने सांती वेळाय ईसु ने तेरा चेला गांव छुड़ीन जात र्‌या।

सुकला अंजीरेन झाड़का सी काय सीकणु जड़े

(मत्‌‌ती 21:20-22)

20पछेन संदारे तीनीत वाटे सी जाणे बाजी रवला, चां चे अंजीरेन झाड़का काजे मुळे लग सुकलो देख्‌या। 21पतरस काजे ईसुन कह्‌ली वात हेर आवी, ने चु तीनाक कह्‌यु, “ए मास्‌तर2 देख। ज अंजीरेन झाड़को तीनाक तु सराप देदलु च सुकी गुयो।”

22ईसु तीनु काजे कह्‌यु, भगवान पर भुरसु राखु। 23मे तुंद्‌रे सी छाचलीन कहं, जु काहनुक ईना बयड़ा सी कहें की, तु उखळीन समुदर मां नाखाय जां, ने आपसान मन मां संका नी करु ने भुरसु राखे की, ज तु कहें च हय जासे ने तेरे वाटे चत हवसे। 24तेरेमां मे तुंद्‌रे सी कहं, “की ज काय तुहुं दुवा करीन मांगु ने भुरसु कर लेवु की हामुक जड़ गुयो ने तुंद्‌रे वाटे जड़ जासे। 25ने जत्‌यार बी तुहुं दुवा करने करीन उबा हवु, तत्‌यार कुय पर बी तुंद्‌रा मन मां रीस हय ती तीनाक माफ कर देवु; काहाकी तुंद्‌रु सरग वाळु बास जु सरग मां रवे, हयु बी तुंद्‌रु पापेन माफी आपसे।3 26ने कदी तुहुं दीसरान गुनु माफ नी करु, ती तुंद्‌रु बास4 सरग मां छे चु, तुंद्‌रा गुना काजे बी माफ नी करसे।”

ईसुन हकेन बारामां सवाल

(मत्‌‌ती 21:23-27; लुका 20:1-8)

27पछेन चे यरुसलेम मां आया, ने तत्‌यार ईसु मंदीर मां फीरतेलु चां मंदीरेन डाहला पुजारा ने नीयमेन मास्‌तर्‌या ने डाहला तेरे धड़े आया। 28ने चे तीनाक पुछ्‌या, जे काम तु काहना हक सी करे? जे काम करनेन हक तुसेक कुण आप्‌यो? 29ईसु तीनुक कह्‌यु, “मे बी तुंद्‌रे सी एक वात पुछो; मेसेक तुहुं जपाप आपु ती, मे बी तुहुं काजे बताड़ीस की मे जे काम कुणीन हक सी करो। 30युहन्‌ना काजे बपतीस्‌मा आपणेन हक भगवान भीणी सी जड़लो की माणसे भीणी सी? मेसेक बताड़ु।”

31ने चे ईनी वात पर वीच्‌यार करने बाजी गुया; कदी आपणु कवसुन भगवान आपलु, ती चु कवसे, तत्‌यार तुहुं युहन्‌ना पर भुरसु काहा नी कर्‌या? 32ने कदी आपणु कवसुन, माणसे हीनाक हक आपला छे, ती चां चे भेळा हय रवला माणसे सी बीहणु हतलो; काहाकी आखा माणसे युहन्‌ना काजे छाचलीन भगवानेन अघली वात बताड़ने वाळु मानतेला। 33तेरेमां चे ईसु काजे असा कह्‌या, “हामुक मालुम नी हय।”

ती ईसु तीनुक कह्‌यु, “मे बी तुहुंक नी बताड़तु की, ज काम कुणीन हक सी करो।”