भगवानेन छाचला बुल
मरकुस 12
ईसु अंगुरेन वाड़ीन दाखला साहरे सीकाड़े
(मत्ती 21:13-46; लुका 20:9-19)
पछेन ईसु दाखला मां तींद्रे सी वात करने लाग्यु, “एक माणुस खेत मां अंगुरेन वाड़ी लागाड़्यु ने खेतेन चारे मेर वाड़ी कर्यु ने अंगुरेन रस नीकाळने करीन एक हळाव बणायु, ने अंगुरेन खेत मां एक माळु बणायु ने काहनाक किरसाण काजे तेरी वाड़ी साजा मां आपीन, नांबे वाळा देस मां जाती रयु।” पछेन अंगुरेन लागणेन दाहड़ा आया, तीना खेतेन मालीक तेरा एक पावर्या काजे साजेल्यान चां अंगुरेन वाड़ी मां फळेन वाटु मांगणे मकल्यु। बाकुन चे पावर्या काजे धरीन ठुक्या ने तीनाक ठारलु पछु मकली देदा। ने चु खेतेन मालीक अळी दीसरा पावर्या काजे मकल्यु, ने चे तीना पावर्यान मुणको फुड़ देदा, ने तेरो नाव-बद्दी कर्या। पछेन अळी दीसरा काजे मकल्यु, ने तीनाक चे मार नाख्या, तत्यार चु अळी बेसका पावर्याक मकल्यु ने तींद्रे मां सी काहनाक काजे ठुक्या ने काहनाक काजे मार नाख्या। अळतेन एकुत रय रवलु ने चु तेरु लाटेक्लु पुर्यु हतलु; अतरा मां तीनाक बी तींद्रे धड़े ज सुचीन मकल्यु की मारा पुर्यान आव-भाव करसे करीन। बाकुन चे साजेल्या आपसात वात कर्या, जु ते तीना खेतेन हकदार छे, चालु हीना काजे बी मार नाख्ता तत्यार जी धन दवलत आपणी हय जासे ने चे तीनाक धरीन मार नाख्या ने अंगुरेन वाड़ी मां सी बाहार नाख देदा।
“तेरेमां अंगुरेन वाड़ीन मालीक काय करसे?” चु आवीन तीनु साजेल्या काजे मार नाखसे ने अंगुरेन वाड़ी दीसरा काजे आप देसे। काय तुहुं हाल लगुन चुखला सास्तुर मां नी भण्या काय?
तीना दगड़ा काजे खास मीस्तर्या फालतु समजीन बाहार नीकाळ देदा,
बाकुन हयुत दगड़ु खास दगड़ु बण गुयु;
ज ते मालीक भणी सी हयो; ने
ज ते हामरी नींगा मां बेसकु वारु छे!
तत्यार चे ईसुक धराड़ने हींडी रवला; काहाकी चे समजी गुयला की जु हामरी नाव-बद्दी मां जु दाखलु कह्लु छे। बाकुन चे माणसे सी बीहेतेला ने ईसु काजे छुड़ीन जाती र्या।
रोमी राजा काजे फाळु देणेन सवाल?
(मत्ती 22:15-22; लुका 20:20-26)
तत्यार यरुसलेम वाळा डाहला पुजारा ने यहुदी नीयमेन मास्तर्या ने डाहला, थुड़ाक फरीसी माणसे ने हेरोदेन पाल्टी मायन थुड़ाक काजे ईसु धड़े मकल्यु, काहाकी तीनाक सवाल पुछीन तीनाक वात मां रुक देय। चे आवीन ईसुक कह्या, “ए मास्तर हामु जाणजे की तु छाचलु छे, ने कुयन फीकुर नी करे, काहाकी तु माणसेन मुंहडा देखीन वात नी करे, बाकुन भगवानेन वाट संय देखाड़े। ती बताड़ रोमी राजा काजे फाळु आपणु वारु छे की नी छे? हामु फाळु आपजे की नी आपजे?” तींद्रा ढंगड़ा जाणीन ईसु तीनुक कह्यु, “मेसेक काहा पारखणे बाजी र्या? एक चांदीन सीक्कु मारे धड़े लावु, ने मे तीना रुप्याक देखीस ने तुहुंक बताड़ीस।”
ने चे एक रुप्यु लावीन ईसुक आप्या, “ने ईसु तीनुक सीक्कु देखाड़ीन कह्यु,
“सीक्का पर कुणीन नाव ने छाप छे?” चे कह्या रोमी राजान।
ईसु तीनुक कह्यु, “ज केसर राजान छे, च केसर राजा काजे आपु ज भगवानेन छे, च हक भगवान काजे आपु।”
ने चे तेरी वात सामळीन बेसका देखतात रय गुया।
मरला मां सी जीवता हवणेन बारामां सवाल
(मत्ती 22:23-33; लुका 20:27-40)
पछेन थुड़ाक सदुकी, कहें की माणसे मरलाम सी पछा जीवता नी हवे, चे ईसु धड़े आवीन पुछ्या, “ए मास्तर, मुसु हामरे वाटे असु नीयम लिखलु छे की, कदी काहनाक ने भायन अवल्यात नी हवी ने मर जाय, ने चां तेरु भायस रांडायली बायर साते ईयाव करीन आपसान भायस वाटे अवल्यात पयदा करनु चाहे। एक कावा असो हयो; सात भायस हतला, मट्लु भायस ईयाव करीन अवल्यात पाखुर मर गुयु। तत्यार दीसरु भायस तीनी रांडायली बायर साते ईयाव कर लेदु ने चु बी अवल्यात पाखुर मर गुयु। ने असुत तीसरु भायस बी कर्यु। असा करीन सातु भायस असात तेरे साते ईयाव कर्या, ने अवल्यात पाखुर मर गुया। पछेन आकरी कावा ची रांडायली बायर बी मर गुय। अळतेन चे आखा मरीन पछा जीवता हवसे तत्यार ची कुणीन बायर कवाय्से? काहाकी ची ते सातु भायसेन लाडी बन्ली हतली।”
ईसु तीनुक जपाप देदु, “काय तुहुं असा करीन भुल मां पड़ र्या की तुहुं नीते भगवानेन लिखली चुखला सास्तुर काजे जाणु नीते भगवानेन ताकत काजे नी उळखु। काहाकी जत्यार मरला माणसे पछा जीवता हवसे, तत्यार तींद्रेम ईयाव नी हवे, सरग मां सरग वाळान काहवाळ्या तसा रवसे। मरलान पछा जीव उठणेन बारामां काय तुहुं मुसान किताप मां काटाळा झाड़कान बारामां लिखलो हतलो च नी भण्या काय, चां भगवान मुसा काजे कह्लु की, मे अब्राहमेन भगवान ने इसाकेन भगवान ने याकुपेन भगवान छे? भगवान मरलान नी, जीवतान भगवान छे; तुहुं ते मट्ली भुल मां पड़ी र्या।”
आखा सी मट्ली हुकुम
(मत्ती 22:34-40; लुका 10:25-28)
यहुदी नीयमेन मास्तर्या मां सी एक आयु ने तीनु काजे वीच्यार करतेलान सामळ्यु ने असु देख्यु की, ईसु सदुकी काजे वारु ढंग सी जपाप देदु, तत्यार नीयमेन मास्तर्यु ईसु धड़े आय्न पुछ्यु की, “आखा मां सी मट्ली हुकुम काहनी छे?” ईसु तीनाक कह्यु, आखा हुकुम मां सी ज हुकुम1 मटलो छे, ए ईस्रायल, सामळु! आपणु मालीक भगवान एकुत मालीक छे। ने तु आपसा मालीक भगवान सी तारा आखा मन सी, ने तारा जीव सी ने तारी आखी अक्कल सी, ने तारी आखी ताकत सी परम कर। ने दीसरु हुकुम असु छे, की तुहुं तुंद्रे आड़े-धड़े रहणे वाळा सी तारेन तसु परम कर। दीसरा हुकुम अळी ईनु दुय हुकुम सी मटी नी हय।
चे यहुदी नीयमेन मास्तर्या ईसु काजे कह्या, “ए मास्तर! जे आखो हुकुम संय छे। तु छाचलीन कह्यु, की मालीक अतरुत भगवान छे, ने तीनाक छुड़ीन कुय भगवान नी हय। ने तीनाक आखा मन सी ने आखी अक्कल सी, ने आखा जीव, ने आखी ताकुतेन साते आपसान भगवान सी परम राख्जी, जे हुकुम, आखा काय बी जनवार्या काजे भगवान अगळ चड़ावणे सी ने अळी काहींग बादा चड़ावणे सी जादा वारु छे।”
जत्यार ईसु देख्यु की चु समजीन जपाप देदु, ती ईसु तीनाक कह्यु, “तु भगवानेन राज सी छेटे नी हय।”
ने अळतेन ईसु काजे पारखणे करीन कुयन बी पुछणेन हिम्मत नी आय।
मसीन बारामां सवाल
(मत्ती 22:41-46; लुका 20:41-44)
पछेन ईसु मंदीर मां सीकाड़तु जाय्न असु पुछ्यु, यहुदी नीयमेन मास्तर्या काहा कहें की मसी दावुदेन अवल्यात छे? दावुद आपसुत चुखली-आत्मा सी भरायन कह्लु, की मालीक,
मारा मालीक मसी सी कह्यु, तु मारे जेवड़्ये आंगे बठ,
जत्यार लग की मे तारा वेरी काजे,
तारा पाय तळे नी कर दम।
दावुद ते आपसुत मसी काजे मालीक कहें पछेन मसी दावुदेन अवल्यात कसु हय सक्से? ने ईसुन जी वात, माणसेन मट्लु टुळु खुस हय्न सामळी रवला।
ईसु कहें की यहुदी नीयमेन मास्तर्या सी चेतीन रवु
(मत्ती 23:1-36; लुका 20:45-47)
चु सीकाड़तु जाय्न कह्यु, “यहुदी नीयमेन मास्तर्या सी चेतीन रवु, चे ते पाय मां सी नांबला पुथल्या2 पेरीन फीरे, ने हाट मां, वारु छे की, पुछीन तींद्री आव-भाव करनु पटे। ने तींद्रा भक्तीन घर मां खास जागा पर बसणु ने तीहवार मां पाहनत्यान तसा खास जागा मां बठणु वारु गमे। चे रांडायला बायरान घर धुकु दीन तींद्रा धन काजे ठगीन हापकी लेय, ने दीसरा काजे देखाड़ने करीन बेसकी वार दुवा करता रवे। बाकुन तीनु माणसे काजे डंड जादा जड़से।”
गरीब रांडायलीन दान
(लुका 21:1-4)
ईसु मंदीरेन दान पेटीन सांबु बठीन देखी रवलु, की दान पेटी मां कसा पयस्या भर र्या, ने बेसका लकपती पेटी मां बेसका पयस्या नाख्या। अतरा मां एक गरीब रांडायली बायर दुय टका दान करी, तेरी कीमत बेसकी कम हतली। तत्यार ईसु तेरा चेला काजे धड़े बुलायन तींद्रे सी कह्यु, “मे छाचलीन कहं की, मंदीरेन पेटी मां दान करने वाळा सी, जी गरीब रांडायली बायर आखा सी जादा दान करली छे। काहाकी आखा तींद्रा माल धन मां सी दान कर्या, बाकुन जी रांडायली बायर गरीब हय्न बी आपसीन आखो कमायलो धन ने जीवन दान कर देदी।”
Source notes (2)
- Footnote आज्ञाओं
- Footnote पुथल्या
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.