भगवानेन छाचला बुल
लुका 2
ईसुन पयदा हवणु
(मत्ती 1:18-25)
तीनु दाहड़ाम रोमी राजा ओगस्तुस केसर एक असु राज हुकुम नीकाळ्यु, की ए मारा राजेन आखा कळीन माणसे! तुहुं मारा सरकारी किताप मां आपणो नाव लिखाड़ने करीन आपणा-आपणा सहर मां जावु। जी पेहली कावा माणसेन गिन्ती हतली, तीनी टेमे क्वीरीन्युस सीरीया देस मां राजा हतलु। आखा माणसे नाव लिखाड़ने करीन आपणा-आपणा सहर मां गुया।
बेतलहम सहरेन राजा दावुदेन खानदानीन हतलु। ने युसुफ, जु राजा दावुदेन अवल्यात मायन हतलु, चु हय नासरत सहरेम रहतेलु। ने युसुफ गलील जीलान नासरत सहरेम सी यहुदा जीलान बेतलहम सहर मां नाव लिखाड़ने करीन गुया। ने मरीयम बी तेरे पुठ्ये चां नाव लिखाड़ने गुय ने तेरी मांगणी ईना युसुफ साते हय रवली, ने ईनी मरीयमेन पुर्यो हवणे वाळो हतलो। जत्यार युसुफ ने मरीयम बेतलहम सहर मां हतला, ती मरीयमेन फवरी हयणेन टेम आय लागी। चां धरम साळाम मां बी तींद्रे वाटे जागा नी जड़ी। ने ची एक ढुरेन वाड़ा मां जाती रय। मरीयम चां पेहेल मेहेल फवरी हवी, ने तेरु एक पुर्यु हयु, ने ची तीना पुर्या काजे पुथल्या मां वेलटीन ढुरेक चारु नाखण्या एक गवाण मां सुवाड़ देदी।
गुवाळ्याक ईसुन पयदा हवणेन खबर जड़े
तीना ईलाकाम राते थुड़ाक गाडरा-गुवाळ्या बयड़े आपसा गाडरान राखवाळी करने बाजी रवला। भगवानेन्चां सी एक सरग वाळु काहवाळ्यु तींद्रेन्चां आवीन उबु हय गुयु, ने भगवानेन सेक-सींगार, तींद्रे चारेमेर बी धपणे बाजी गुयो, ने चे बीहीन सीयारी ली लेदा। बाकुन सरग वाळु काहवाळ्यु तीनुक कह्यु, “बीहु मां; सामळु, मे तुहुं काजे बेसकी खुसीन एक खुस-खबर सामळावो, जी आखा माणसे वाटे रवसे। काहाकी आज तुंद्रु छुड़ावणे वाळु दावुदेन सहर बेतलहम मां, पयदा हवलु छे, हयुत मालीक ने मसी छे। तीना पुर्याक उळख्णेन सहलाणी जी छे, की तुहुं तीनाक पुथल्या मां वेटळायलु ने ढुरेक चारु नाखण्या गवाण मां पड़ रवलु देख्सु।”
ने उचकाणुत तीना सरग वाळा काहवाळ्या पुठ्ये सरग वाळा काहवाळ्यान टुळु असा कह्ता जाय्न भगवानेन गुण गावतेलु देखाय देदु:
“आखाम उचा सरगे मां भगवानेन सेक-सींगार हवे,
ने धरती पर रवण्या तीनु माणसेक सांती जड़से, तींद्रे सी भगवान खुस छे।”
जत्यार सरग वाळा काहवाळ्या पछा सरगे जात रया, ती गुवाळ्या आंबा-सांबा कह्या, “चालु आपणु बेतलहम सहर जाजे, ने मालीक जी वात आपणुक कह्लु छे, चां देख्सु।”
ने चे मामार बेतलहम सहर भीणी चाल पड़्या, ने चां ढुरेन वाड़ा मां जाय्न मरीयम ने युसुफ काजे देख्या, ने पुर्याक गवाण मां सुवाड़ रवला देख्या। जत्यार गाडरान गुवाळ्या ईसुक देख्या, तत्यार चे गुवाळ्या मरीयम ने युसुफ काजे, पुर्यान बारामां ज सरग वाळा काहवाळ्या कह्ला च कय देदा। गुवाळ्या तीनुक पुर्यान बारामां जी खबर पुगाड़्या ची खबर सामळीन दीसरा आखा माणसे चकराय गुया। बाकुन मरीयम जी आखी वात हेर करीन ईनी वातेन बारामां वीच्यार करतीत रय। गुवाळ्या काजे सरग वाळा काहवाळ्या जसों कह्ला, तसोन तसों देखीन ने सामळीन चे बयड़ा मां गाडरान्चां पछा भगवानेन गुणे गावता जाय्न जात र्या।
मरीयमेन पुर्यान नाव पाड़नु
सात दाहड़ा हय गुया, ने आठवे दाहड़े पुर्याक चुखो करनेन टेम आयो। ईसु मरीयमेन कुख मां नी आयु ने पेहलेत सरग वाळु काहवाळ्यु मरीयम काजे ज कह्लु, तेरो नाव ईसु पाड़जी। ने चे आवीन रीत भात कर्या, ने पुर्यान नाव ईसु पाड़्या।1
ईसु काजे मंदीर मां लावीन भगवानेन हातेम सुपरुत करनेन रीती भाती
तेरेत अनसारे पुर्याक चुखो करनेन दाहड़ा पुरा हय गुया, ती युसुफ ने मरीयम, पुर्या ईसु काजे यरुसलेम सहरेन मंदीर मां, मालीक भगवान काजे आपणे करीन तेरे अगळ ली गुया।2 मुसान साहरे ईस्रायेली जातीन माणसेक आपला मालीक-भगवानेन कायदा मां असो बी लिखलो छे: “माणसे ने जनवार्या डीट, पेहल पयदा हवला अदमी, मालीक भगवान वाटे चुखलो मानायसे।”3 मालीक भगवानेन कायदा मां असो बी लिखलो छे, “पेरवान एक जुड़ो, नी ते पेरवान दुय पीला मारीन बादा चड़ावणु चाहजे।4” ने चे बादा चड़ावणे करीन तीयारी बी कर्या।
ईसु ज-ज करने वाळु छे चो आखो सीमोन कह्वे
तीनी टेमे सीमोन नावेन एक धरमी ने भक्ती करन्यु अदमी, यरुसलेम मां रवतेलु। ने चु ईस्रायेली माणसेन सांतीन वाट देख रवलु। ने तेरे पर चुखली-आत्मा छावाय रवतेलु, ने चुखली-आत्मा तेरे अगळ जी वात उजेंती करलु “मालीक भगवान अघु सी आवणेवाळा मसी काजे देखे नी चां लग तु नी मरे।” ईसुन आसी बास्या पुर्या ईसु धड़े भगवानेन कायदान रीती पुरी करने-करीन, मंदीर मां लाया। तत्यार सीमोन तीनात चुखली-आत्मान वाटे मंदीर मां आयु। ती सीमोन ईसु काजे आपसा हातेम धर लेदु, ने भगवानेन गुण गावतु जाय्न कह्यु:
ए मालीक हय जु तारु चाकर्यु छे;
सुक-सांती भेळ ईनी कळीम सी अळाय दे।
“मालीक भगवान! मारा डुळा तारा छुटकारा काजे देख लेदला छे,
ईनाक तु आखा देसेन माणसे अगळ तीयार करलु छे।5
जु नी-यहुदी माणसे वाटे, छाचाय काजे उजेंतो करन्यो वीजाळो छे,
ने जु तारा असामी ईस्रायेली माणसे वाटे सेक-सींगार छे।6”
पुर्यान बारामां जी कह्वली वात सामळीन ईसुन आसी बास्या चकराय्न वीच्यार मां पड़ गुया। सीमोन, ईसुन माय बास बरकत आप्यु, ने चु ईसुन माय मरीयम काजे ज कह्यु, “देख ईना पुर्याक, ईस्रायेली जाती मां बेसका माणसे भगवान अगा वळ जासे, ने बेसका माणसे भगवान काजे छुड़ देसे। ने जु एक असी सहलाणी छे तेरी माणसे वीरुद करसे।7 असा करीन बेसका माणसेन हीया मनेम भुंड्ला वीच्यारे उजेंता हय जासे, ने तुसे काजे असो लागसे की, तारा जीवेम लग तलवार भराय गुय।”
हन्ना भगवानेन बड़ाय करती जाय्न ईसुन बारामां दीसराक कह्वे
ने चां मंदीर मां हन्ना नावेन एक, भगवानेन अघी सी आवणे वाळी वात बताड़ने वाळी हतली। ची आसेर कुळीन हतली, ने तेरा बासेन नाव फनुयेल हतलो। ची बेसकी डाहवी हय गुयली। ने ईयाव करीन सात साल लग हेरा घरवाळा पुठ्ये रवली। ने तत्यार लग ची रांडायलीत रय। ने हय तेरी उमर आस्सी ने चार साल हय गुयली, ची मंदीर मात रहतेली। ने उपास ने दुवा करती जाय्न रात दाहड़ु भगवानेन सेवा भक्ती कर्या करतेली। जत्यार मरीयम ने युसुफ मंदीर मां हतला, तत्यार हन्ना चां आवीन भगवानेन गुण गावणे बाजी गुय। ने जे माणसे यरुसलेम सहरेन छुटकारान वाट देख रवला, तीनु आखा काजे तीना पुर्यान बारामां कह्णे बाजी गुय।
नासरत सहर भीणी पछा आवे
मालीक भगवानेन नेम-कायदान अनसारे युसुफ ने मरीयम, आखी रीती-भाती कर लेदा, ने अळी गलील जीलान आपसा नासरत सहर मां पछा जात र्या। पुर्यु मटु हवतु गुयो, ने ताकतवाळु हवतु गुयु ने अक्कल मां मटु हवतु गुयु; ने भगवानेन गीण-दया तीना पुर्या पर हतलो।
पुर्यु ईसु मंदीर मां
ईसुन माय बास हर साल फसह8 तीहवार वाळने यरुसलेम जाया करतेला।9 जत्यार ईसु बारे सालेन हयु, ती चु बी तींद्रे पुठ्ये तीहवार वाळनेन रीतीन अनसारे यरुसलेम सहर मां गुया। तीहवार वाळनेन दाहड़ा पुरा हय गुया, ने अळी ईसुन आसी बास्या पछा घर जाणे करीन यरुसलेम सी चाल पड़्या। ती चु पुर्यु ईसु यरुसलेम सहर मां रय गुयु; ने ज तेरा बास काजे ने माय काजे मालुम नी हतलो। चे ज समजीन वीच्यार कर्या की ईसु तीना माणसेन टुळा मां भेळु हसे, जे पछा घर आवणे बाजी रवला; चे पुरा एक दाहड़ान चाल, चाल लेदा, तत्यार चे ईसु काजे आपसा सगासाइ वाळा मां, ने दुस्तीदार्यान ईचमां हेरने बाजी गुया; बाकुन ईसु तीनुक नी जड़्यु; ती चे तीनाक हेरने करीन पछा यरुसलेम मां आया। ने तीन दाहड़ा हय गुया, ने अळी ईसु मंदीर मां जड़ गुयु; ईसु यहुदी-नीयम सीकाड़न्या पुठ्ये बस रवलु, ने तींद्री वात सामळने बाजी रवलु, ने तीनुक सवाल पुछणे बाजी रवलु देखाय देदु। तेरी अक्कल भरी वात सामळीन, चे आखा सामळन्या माणसे फीकुर मां पड़ गुया। ईसुन माय बास बी तीनाक चां देखीन चकराय गुया; तेरी माय तीनाक कह्यी, “ए बेटा! तारु बास ने मे, तार वाटे बेसका फीकुरेम पड़ गुयला; हामु तुसेक आखे जागे हेर्या! तु हामरे साते असु वेहवार काहा कर्यु?”
बाकुन ईसु तीनुक जपाप आप्यु, “तुहुं मेसेक काहा हेरतेला? तुहुंक मालुम नी हतलो काय? की मेसेक मारा बासेन घर मां रहणु जरुरी छे।” बाकुन ईसुन माय-बासेक ईसुन कह्वली वातेक नी समज्या।
तत्यार ईसु आपसा माय बास पुठ्ये आपसा नासरत सहर मां पछु आवती र्यु, ने चु आखी वातेम आसी-बासेन हुकुम मान्तु रयु; ने तींद्रा हक मां रयु; ने तेरी माय मरीयम ईनी आखी वात काजे हेर राखी, ने तेरे बारामां आपसा मनोम सुचती वीच्यारती रय। ने जसा साल वीत गुया, ईसु अक्कल मां, ने डीलो मां मटु हवतु गुयु, ने भगवान ने माणसे तीनाक बेसका परम करता रया।10
Source notes (10)
- Cross-reference उबजाणनी किताप 17:12; लेवयवेवस्था 12:3
- Cross-reference लेवयवेवस्था 12:6
- Cross-reference नीरगमन 13:2-12
- Cross-reference लेवयवेवस्था 12:8
- Cross-reference यसाया 40:5
- Cross-reference यसाया 42:6; 49:6
- Cross-reference यसाया 8:14,15
- Footnote ईना तीहवार काजे वीन-जेवण्या पीठान रुटा बणावणेन तीहवार बी कह्वे। ईस्रायेली माणसे ईना तीहवार काजे तीनी टेमे वाळ्ळा, जत्यार चे मीसर देसेन राजान गुलामी मां सी केनान देस भीणी आवला
- Cross-reference नीरगमन 12:24-27; वेवस्थावीवरन 16:1-8
- Cross-reference 1 समुवेल 2:26; नीतीवचन 3:4
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.