भगवानेन छाचला बुल
युहन्ना 21
पछु जीवतु हय्न ईसु, तीबीरीयास दर्या धड़े चेला काजे देखाव पड़े
तीबीरीयास दरीया धड़े ईसु अळी आपसा चेला काजे ईनी रीती अळी उजेंतु देखाव पड़्यु, एक दाहड़े, सीमोन पतरस, ने थोमा, चु दीद्मुस कह्वाये नतनएल चु गलील जीलान काना सहर वाळु हतलु ने जब्दीन दुय पुर्या ने ईसुन दुय दीसरा चेला, जे आखा भेळात हतला। सीमोन पतरस तीनु काजे कह्यु, “मे ते माछा1 मारने जाम। ने चे दीसरा चेला काजे कह्या।”
“हामु बी तारे पुठ्ये आवजे।” ने चे तेरे पुठ्ये चाल पड़्या, ने ढंड्या मां चहड़ीन बठ गुया, बाकुन तीने राते एक बी माछी हात नी लागी। संदारे हवतात ईसु दरीया धड़े आय्न उबु रय गुयु, बाकुन चेला काजे ईसु नी उळख्यु। तत्यार ईसु तीना चेला काजे कह्यु, “ए पुर्या! तुहुं काजे खाणे करीन एक बी माछी नी धराय काय?” चे चेला जपाप आप्या, “एक बी नी धराय!”
तत्यार ईसु तीनु काजे कह्यु, “ढंड्यान जेवड़्ये आंग्ये जाळ नाखु ने तुहुंक माछा हात लागसे।” चे जाळ नाख्या ने अतरा माछा जाळेम आया की तीनुक जाळ नी हाकलाय।
तत्यार चु चेलु, जु ईसुन लाटेकलु चेलु, “कह्वायतेलु, पतरस काजे कह्यु, जु ते आपणु मालीक ईसुत छे।” जत्यार सीमोन पतरस सामळ्यु की जु आपणु मालीक ईसुत छे ती चु नांगरलु हतलु करीन आपसो झगल्यो पेहरी लेदु ने ईसुक भेळु हवणे करीन दरीया मां मामार कुद पड़्यु। बाकुन दीसरा चेला, माछा भरायली जाळ काजे हाकलता जाय्न ढंड्या काजे दरीया धड़े लाया। काहाकी चे दरीया धड़े सी जादा छेटा नी हतला। चे दरीया धड़े सी दुयेक सोव हात छेटा हतला।
जत्यार चे ढंड्याम सी उतरीन धड़े भुयमां आया, ती तीनुक चां रुटा ने धपतेला कुयलान ईंगाळा पर माछा मेकला देखाव पड़्या। ईसु तीनु काजे कह्यु, “तुहुं हींताळ जे माछा धरला छे, तीनु मायन थुड़ाक ली आवु।”
सीमोन पतरस पछु ढंड्या मां गुयु, ने जाळ धड़े हाकली लायु। तीनु जाळेम डेड़ सोव ने तीन मटला माछा पड़ला हतला, ने अतरा माछा जाळेम पड़्या तेबी जाळ नी फाटी। ईसु तीनु काजे कह्यु, “आवु, ईतरोक खाय लेवु।” चेला जाण लेदा की जु मालीक ईसुत छे। ने “तु कुण छे।” करीन ईसु काजे पुछणे, तीनु मायन कुय काजे बी हिम्मत नी कर्या। ईसु धड़े आयु, ने खाणे करीन चु रुटु हातेम लीन तीनुक आप्यु, ने ईनी रीते माछा आप्यु।
असु करीन मर्या-सर्याम सी जीवतु हय्न ईसु तीसरी कावा आपसा खास चेला अगळ उजेंतु देखाव पड़लु।
ईसु पतरस काजे, हय अळी पछु परम सी बुलावे
खायलीन नवराय्न ईसु, सीमोन पतरस काजे पुछ्यु, “ए सीमोन, युहन्नान पुर्या! तु छाचलीन, हींद्रे सी जादा मेसेक परम करे काय?” पतरस ईसुक कह्यु, हव, “मालीक! तु जाणे की मे तारे सी परम करो।”
ईसु सीमोन पतरस काजे कह्यु, “मारा गाडरा चार।” ईसु दीसरी कावा अळी सीमोन पतरस काजे कह्यु, “ए सीमोन, युहन्नान पुर्या! तु छाचलीन मारे सी परम करे काय?” पतरस ईसु काजे जपाप आप्यु,
“हव, मालीक! तु जाणे की मे तारे सी परम करो।”
ईसु पतरस काजे कह्यु, “मारा गाडरान गुवाळी2 कर।” ईसु अळी तीसरी कावा, पतरस काजे कह्यु, “ए सीमोन, युहन्नान पुर्या! तु छाचलीन मेसेक परम करे काय?”
ईसु पतरस काजे तीसरी कावा ज पुछ्यु की तु छाचलीन मारे सी परम करे काय? करीन तीनाक बेसको दुख लाग्यो। ने पतरस ईसु काजे कह्यु, “मालीक! तुसेक आखी वात मालम छे, तु जाणे की मे तारे सी छाचलीन परम करो।”
ईसु पतरस काजे कह्यु, “मारा गाडरा काजे चार।” मे तुसेक छाचलीन कहो की जत्यार तु जुवान हतलु, ती आपसान कमर बांदीन जाहां बी चाहतेलु चां फीरतेलु, बाकुन जत्यार डुकरु हवसी ती आपसा हात फेलावसी ने दीसरा तारी कमर बांदीन जाहां तु नी चाहसी चां तुसे ली जासे। हयु ईनी वात सी सहलाणी देदु, की पतरस कसु मरनेन सी भगवानेन सेक-सींगार करसे। ने तत्यार हयु तीनाक कह्यु, “मार कह्याम चाल।”
पतरस ईसु काजे युहन्नान बारामां पुछे
पतरस पछु फीरीन ईसुन तीना दीसरा चेला काजे पछळ-पछळ आवतेलु देख्यु, चु ईसुन लाटेकलु चेलु कहंवायतेलु। हयु चु की चु हतलु, जु तीहवारेन दाहड़े सांती वेळाय खाणेन टेमे ईसुन छाती भीणी वळीन, “ए मालीक! तुसेक धरावण्यु कुण छे?” करीन पुछलु। अळतेन पतरस तीना चेलाक देखीन ईसु काजे पुछ्यु, “मालीक! एरे पर काय वीतणे वाळो छे?” ईसु कह्यु, “कदी मेसेक पछु आवता लग हयु जीवतेलु रय जाय, ती ईनी वात सी तारो काय लेण देणु छे? तु ते मरता लग मारा कह्याम चालतु रव।”
ने ईसु पर भुरसु करन्या भायसे मां जी हुकवाय फीर गुय की हयु चेलु नी मरे, “बाकुन ईसु असु नी कह्यु की हयु नी मरे बाकुन ज कहंलु की कदी मेसेक पछु आवता लग हयु जीवतेलु रय जाय ती, ईनी वात तारो काय लेण देन छे?”
आकरी वात
हयु चु की चु चेलु छे, जु ईनी वातेन गवा देणे करीन जी किताप लिखलु छे। हामु जाणजे की हेरी गवाय छाचली छे।
ईसु अळी बी बेसका काम कर्यु, कदी एकेक करीन तीनु कामेन बारामां लिखता ती, ती मे समजो की जे किताप लिखायता, चे किताप अतरा जादा हय जाता की ईनी कळी मां बी नी समाय्ता।
Source notes (2)
- Footnote मछली
- Footnote राखवाळी
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.