भगवानेन छाचला बुल
युहन्ना 17
ईसु आपसा वाटे दुवा करे
जी वात कयदीन ईसु सरग भीणी भाळीन कह्यु, “ए मारा भगवान बास! तारा पुर्यान मरनेन घड़ी आय गुयली छे। ने तारा पुर्यान सेक-सींगार उजेंतु कर तेरे सी तारु पुर्यु बी तारु सेक-सींगार उजेंतु कर देय। तु ते तारा पुर्या काजे आखा माणसे पर हक आपलु छे, की तीना हक सी चु आखा माणसेन ईचमां तारु सेक-सींगार उजेंतु करे ने तींद्रेम सी जत्यार बी माणसे तु तेरा हाते सुपलु छे, तीनु आखा काजे चु अमर जीवाय आप देय। एकुत छाचलु भगवान तुत छे, ने मे ईसु तारे सी मकेल्लु छुड़ावन्यु मसी छे, तुसेक ने मेसेक जाणीन मान्ने सीत माणसेक अमर जीवाय जड़से। ज काम तु मेसेक करने करीन आपलु हतलु, च काम करीन धरती पर तारो सेक-सींगार काजे उजेंतु करलु छे। ए भगवान! कळी नी घड़ाय ने पेहलुन, मे तारे पुठ्ये हतलु, ने मे नी तारेन तसु सेक-सींगार मां हतलु हय मेसेक तीना सेक-सींगार मां पछु भेसकी ले।”
ईसु आपसा चेला वाटे दुवा करे
तीनु माणसे काजे तु ईनी कळीम सी नेवाड़ीन मेसेक सुपलु चे तींद्रे अगळ मे तारो नाव उजेंतु कर देदलु छे, छाचलीन चे माणसे तारात हतला, ने तु तीनु काजे मार हातेम सुप देदु, ने चे तारा बुल काजे मानीन पाळ र्या। हय चे जाण गुया की ज काय तु मेसेक देदलु छे, च आखो तारो छे। काहाकी ज बुले तु मेसेक देदलु, ने चे बुले तीनुक बी सामळाय देदु, ने चे मान लेदा ने छाची-छाची जाण लेदा की मे तारे सी आय र्यु ने भुरसु कर लेदा की तुत मेसे काजे मकल्यु।
हींद्रे वाटे मे जी दुवा करो ची दुवा तु सामळी ले, मे कळीन माणसे वाटे दुवा नी करतु, बाकुन तींद्रे वाटे करो जीनुक तु मारे हातेम सुपलु छे काहाकी चे तारात छे। छाचलीन ज काय मारो छे च तारो छे, ने ज तारो छे च मारो छे। ने हींद्रे सी मारु सेक-सींगार उजेंतु हवलु छे। “मे ईनी कळीक छुड़ीन तारेन चां आवणे हींड रयु, बाकुन हय जे चेला कळीत मां रवसे।” ए चुखला भगवान बास! तु ज नाव मेसेक आपलु छे तीने नावे हींद्री राखवाळी करो, तेरेसी चे आपणेन तसा एक हय जाय। जत्यार लग मे हींद्रे साते हतलु, तत्यार लग तारा नाव सी हींद्री पुरी राखवाळी करतु रयु। तींद्रे मायन कुय बी ठायकुत नी सर्यु बाकुन एकुत जणु ठायकुत सर गुयु, जु सरने वाळु हतलु। खरला-सास्तुर मां लिखली वात पुरी हवणु चाहजे करीन असो हयो। हय मे तारेन चां आवणे हींडी र्यु ने मे जी दुवा ईनी कळीम रय्न करने बाजी र्यु, तेरसी जी खुसी मारेम छे, ची खुसी जे चेला पुरी की पुरी हात करे। मे तारी बुल हीनुक कय देदलु छे ने भगवानेन काम रुकण्या काजे ईनी कळीन माणसे हीनु काजे भुंडा कर्या काहाकी जसु मे ईनी कळीन माणसे साते संगात नी करो, तसात चे चेला बी ईनी कळीन माणसे साते सात संगात नी करे। मे जी दुवा नी करतु की तु हीनु काजे कळी मां सी ली जाती रहे, बाकुन ज कहो की हीनु काजे भुंडात कामे सी बचाड़ीन राख। जसु मे ईनी कळीन नी हय तसात चे बी ईनी कळीन नी हय। ए भगवान बास तारा बुल चुखला छे ईना छाचला बुल सी ईनुक तारी सेवा वाटे चुखा करीन तीयार कर। जसु तु मेसेक ईनी कळीन चाकरीन हक आपीन मकेल्लु छे, तसुत मे बी ईनुक ईनी कळीन चाकरीन हक आपीन मकेल्लु छे। ने हींद्रा फायदा वाटे मे मारु जीव आपीन आपसाक नेवाड़ीन चुखु करो, काहाकी चे बी तारा छाचला बुले सी तारी सेवा वाटे नेवाड़ीन चुखा हय्न तीयार हय जाय।
“मे हींद्रे वाटे अतरुत दुवा नी करतु, बाकुन तींद्रे वाटे बी दुवा कर र्यु, जे आवणे वाळा दाहड़ाम हींद्री वात सामळीन मार पर भुरसु करसे। मे तींद्रे वाटे असी दुवा करो की चे आखा एक मन हय्न एक सारका हय जाय करीन। ए भगवान बास! जसु तु मारेम छे, ने मे तारेम छे, तसात चे बी आपणेम भेसकायन एक सारका हय जाय काहाकी ईनी कळीन माणसे तीनुक देखीन असु भुरसु कर लेय की ईसुत भगवानेन मकेलन्यु छुड़ावन्यु मसी छे। ने जु सेक-सींगार तु मेसेक आप्यु, चु सेक-सींगार मे तीनुक आप देदलु छे, काहाकी चे आखा एक मन हय्न एक सारका हय जाय जसा आपणु एक सारका छे। मे तींद्रेम रवु, ने तु मारेम रहे ने चे आखा ने आखा एक सारका हय जाय ने ईनी कळीन माणसे ज जाण लेय की ईसु भगवानेन मकेल्लु मसी छे, ने जसु तु मार सी परम कर्यु तसु तु बी तीनुक परम करे।”
“ए भगवान बास! जी कळी नी घड़ाय ने पेहलुत मारे सी परम राखलु छे, ने सेक-सींगार आपलु छे। जे माणसे तु मेसेक आपलु छे, चे बी मे जां रहो चां रहणु चाहजे काहाकी चे बी मारु सेक-सींगार देखे। ए धरमी भगवान बास! ईनी कळीन माणसे तुसे नी जाणता बाकुन मे तुसेक जाणो ने मारा चेला जाण लेदला छे, ईसु भगवानेन मकेल्लु मसी छे। मे तारो नाव ईनुक बताड़ देदु ने बताड़तु रय्स, काहाकी जसु तु मेसेक मारे सी परम करलु, चु परम हींद्रेम रव ने मे हींद्रेम रहो।”
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.