भगवानेन छाचला बुल
ईफीसी 6:10
Verse 10 is marked below, with the whole chapter around it. Read from the start
पुर्या-पारी ने आस्या बास्या साते एक दीसरान हक मां रहणेत वात
ए पुर्या-पारी, मालीक ईसु पर भुरसु करता जाय्न आस्या बास्यान हुकुम मानु, काहाकी ज तालेत छे। “ने भगवानेन बुल बी असा कहें” तारा बाबान ने तारी आयसीन ईज्जत करीन अबरु राख्जी जी पेहली हुकुम छे, तेर भेळे वायदु बी छे। “असु करसी ती तारो भलो हवसे, ने तु धरती पर बेसका दाहड़ा लग जीवतेलु रवसी।”1
ए आस्या बास्या तुहुं आपणा-आपणा पुर्या-पारी काजे मालीक भगवानेन सीकाड़ने सी वारु टेवाड़ता जाय्न, तीनुक पाळु पुसु। बाकुन सुदारनेन टेमे तीनुक फालतु घुण कीचवाड़ता।23
मालीक ने गुलाम पावर्यु
ए गुलाम पावर्या, जसा तुहुं ईसु मसीन हुकुम मन मां मानु, तसात जे धरती पर वाळा तुंद्रा मालीक छे, तींद्रे सी बी बीहता ने कापता जाय्न गमते रवते तींद्रु हुकुम मानु। काहनाक माणसेक खुस करने वाळान तसा देखाड़ने वाटे करीन सेवा चाकरी करनेन ढंगड़ा मां करु, बाकुन ईसु मसीन गुलाम पावर्यान तसा खरले मने भगवानेन ईनी मरजीन अनसारे हर घड़ी तींद्री सेवा करु। ने माणसेन सेवा चाकरी कर र्या, असा समजीन सेवा चाकरी मां करु, बाकुन मालीक ईसु मसीन सेवा चाकरी कर र्या, समजीन वारला मन सी तींद्री सेवा चाकरी करु। हेर करु की वारलु काम करन्याक ईनाम आपण्यु भगवान मालीक छे, भले चु काम करन्यु गुलाम पावर्यु हय, भले चु आजाद, मालीक हय।
ए गुलाम पावर्यान मालीक्या, ईनेत रीते तुहुं बी तुंद्रा गुलाम पावर्या साते भुळा रहु। कुय काजे बीहाड़ु मां, काहाकी तुहुं काजे मालम छे, की तींद्रु ने तुंद्रु दुयुन एकुत मालीक भगवान सरग मां छे। हीसाब लेणेन घड़ी, चु ते काहनाक बी छाटीन, नानला मटान नेवाड़ु नी करे।45
आत्मान लड़ायन हत्यार
हेरेसी मालीक ईसु मां तेरी ताकत सी तुहुं बी ताकतवाळा बणु। ठगण्या भुतड़ान कदर सी बचणे ने तेरे साते गड़दीने करीन भगवानेन आखा हत्यार काजे हात कर लेवु, जे सीपायड़ान आखा हत्यारेन तसा छे। काहाकी आपणी लड़ाय डील ने लुही साते नी हय, बाकुन तीनु राज करन्या ने हक जमाड़न्या साते छे, जे भुतड़ान जमेन मेळा छे, जे वाहळाम रवीन ईनी आंदारली कळीन माणसेक पाप कराड़्ने करीन पटाड़ीन राज करे। ने काठला दाहड़ा मां बी काठा रवीन, आखी वातेम जीत हात करीन टेकला रहणे करीन भगवानेन आखा हत्यार पुठ्ये ली लेवु।
काहाकी छाचली सी आपणी कमर बांदीन, ने धरमेन कामेन टुपु पेहरीन,6 ने पाय मां हेळ-मेळ कराड़नेन खुस-खबरेन तीयारीन खासड़ा पेहेरीन,78 ने ईनु आखा साते भुरसान ढाळ लीन काठ रहु, काहाकी तुहुं तीना वेरीन आखा धपतेला बीलखा काजे उल्वी देवु। ने छुटकारान टुपु, ने आत्मान तलवार, ज भगवानेन बुल छे, ली लेवु।910 ने चुखली-आत्मान अगवाय सी हर घड़ी ने आखी भात्ये भगवान सी लीलघाय्ता ने दुवा करता रहु, ने भगवानेन आखा चुखला माणसे वाटे बी जागला रवीन एक मन्या हय्न लीलघाय्ता ने दुवा करता रहु। ने मारे वाटे बी की मेसेक बुलनेन घड़ी असा वारु बुले देणु चाहजे, की मे हिम्मतेन साते खुस-खबरेन मतलब काजे बताड़ सको, जसु मे साकळ सी फांदायलु राजान राजु छे, ने असु बी की मे तीनी वात मां जसो मेसेक चाहजे, तसु हिम्मत सी बुलो।
आकरी बुले
तुखीकुस, जु लाटेक्लु भायस ने मालीक ईसु मां भुरसा लायक सेवक छे, हयु तुहुंक बताड़से की तुहुं बी मारी हाल जाणु की मे कसु रव। तीनाक मे तुंद्रे धड़े असु करीन मकल्यु, की तुहुं हामरा हाल काजे जाणु, ने हयु तुंद्रा मन मां सांती देय।
ए भायस्यो ने बहणस्या, मे भगवान सी लीलघाय्न असु कहो, की भगवान बास सी ने मालीक ईसु मसी सी तुहुं आखा काजे सुक-सांती जड़ती रहे, ने तुहुं भुरसा मां ने एक दीसरान परम मां बड़ता जावु। ने जे आपणा मालीक ईसु मसी काजे अमर परम करे, तीनु आखा काजे भगवानेन गीण-दया जलम जड़ती रहे।
Source notes (10)
- Cross-reference नीरगमन 20:12
- Cross-reference नीतीवचन 3:11-12; 15:18; 22:6
- Cross-reference कुलुसी 3:2
- Cross-reference 2 ईतीहास 19:7
- Cross-reference लुका 6:31
- Cross-reference यसाया 11:5; 59:17
- Cross-reference यसाया 52:7
- Cross-reference नहुम 1:15
- Cross-reference यसाया 49:2; 59:17
- Cross-reference ईब्रानी 4:12
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.