भगवानेन छाचला बुल
फीलीपी 1
जी चिट्ठी ईसु मसीन गुलाम पावर्यु पोलुस ने तीमुथीयुस लिखला छे। जी चिट्ठी 1फीलीपी सहर मां रहण्या,
ने ईसु मसी काजे मान्या भगवानेन आखा चुखला माणसेक, मंडळीन मुख्या ने मंडळीन खास पावर्या काजे लिख रया।
आपणा भगवान बासेन ने मालीक ईसु मसीन गीण-दया ने सुक-सांती तुहुं आखा काजे जड़ती रहणु चाहजे।
पोलुस फीलीपीन मंडळी वाळा वाटे भगवान काजे बेसकु वारु कहें ने दुवा करे
मे जत्यार बी तुहुंक हेर करो, तत्यार तुंद्रा बारामां आपणा भगवान काजे बेसकु वारु कह्वो; ने जत्यार बी मे दुवा करो, ती खुस हय्न जलम तुंद्रे आखा वाटे दुवा करो। काहाकी तुहुं पेहले दाहड़े सी लागाड़ीन आज लग खुस-खबर सामळावणे करीन तुहुं मारी सात देदा। ने मेसेक ईनी वात पर पाक्कु भुरसु छे की, जु भगवान तुंद्रे ईचमां वारलु काम सुरु करलु छे, हयुत तीना कामेक ईसु मसीक पछु आवता लग पुरो करसे। तुंद्रे बारामां असोत वीच्यार करनु मारे वाटे वारु छे, काहाकी पेहले बी ने हय बी मे जेल मां छे, तेबी आखा अगळ खुस-खबरेन छाचाय काजे गवा-पुरावाक लीन सामळावणेन काम मां तुहुं आखा मारा साजल्या बणता आय रया। ज काम मेसेक भगवानेन गीण-दया सी जड़लो छे। ने तुहुं मारा मन मां वसी गुयला छे। भगवान ईनी वातेन गवा छे की, मे ईसु मसीन परम सी तुहुं आखाक भेळु हवणे करीन तुंद्री बेसकी हेर करो।
मे तुंद्रे वाटे भगवान धड़े असी दुवा करो की, तुंद्रु परम, छाचली अक्कल ने समज सी अदु-अदुस बड़तु जाय; ने तुहुं भलाय ने कुहराय्न फरक पाड़ीन आखाम सी वारु वात जाणीन, तीनीक मान लेवु; काहाकी ईसु मसीक पछा आवणे लग पुरा-पुरा खरला ने नी-गुनाळा बणीन रहु। ने ईसु मसीन साहरे जड़न्या वारलु गुण काजे आपसा जीवो मां वारु उतारीन तीनु गुणेक कामे लावु, तेरेसी भगवानेन नावेन बड़ाय हवती जाय ने तेरात गुण गावायता रवे।
पोलुसेन जेल मां जाणे सी खुस-खबरेन, परचार चारे मेर हवे
ए मारा भायस बहणस्या, तुहुंक ज मालुम हवणु चाहजे की, जो काय मारे साते हयो, तेरेसी ईसुन खुस-खबरेन खबर, आड़े-धड़े बी पुग गुय। जां लग की, कीला मां केसर राजान राजा ने तेरी राखवाळी करन्या सीपायड़ाक ने दीसरा आखा माणसेक बी ज मालुम हय गुयो, की हयु पोलुस, ईसु मसीन परचार कर र्यु करीन, तीनाक 2जेलेम कुंड देदा। ने मे जेलेम कुंडाय रयु करीन, बेसका माणसे ईसुक मान्या ईसु मां हिम्मत करीन, अळी बी अदुस भगवानेन बुले बे फीकर्या हय्न, बीहे बीगुर सामळावणे बाजी गुया।
काहनाक ते कुहराये ने टठाये ईसु मसीन परचार करे, बाकुन काहनाक ते वारलु वीच्यार लीन ईसु मसीन परचार करे। जे माणसे ते परम सी परचार करे, काहाकी चे जाणे की भगवानेन खुस-खबरेन राखवाळी करने करीन पोलुस काजे राख रया। बाकुन काहनाक दीसरा माणसे ते, वारलु वीच्यार नी, बाकुन पोलुस काजे जेल मां अदुस वेला हवणु चाहजे करीन कुहराये ईसुन परचार करे।
बाकुन हेरेसी काय फरक नी पड़े। वारलु वात ते जी छे की, भले कुहराये, भले छाचाये, ईसु मसीन परचार ते हय र्यो ने माणसे ईसुन खुस-खबर सामळावणे बाजी र्या तेरेसी मे खुस छे; ने खुस बी रय्स। काहाकी मेसेक मालुम छे की, तुंद्री दुवान साहरे, ने ईसु मसीन जीव-आत्मान मदत सी, मारु छुटकारु हवसे। ने मारा मन मां जी मरजी ने आस छे, की मे काहनी बी वातेम नी लाजवायो; बाकुन मेसेक पाक्कु भुरसु छे की, मारी जीवाय सी ईसु मसी काजे ईज्जत जड़ने बाजी रय, असीत अघी बी जड़से, भले मे जीवतेलु रहो, नी ते मर जाम। काहाकी मे ईसु मसी वाटे मरने बी ने जीवणे बी तीयार छे; मार वाटे जीवतु रहणु ते ईसु मसी छे, ने मरनु फायदु छे। बाकुन मार वाटे ते, डीलो मां जीवतेलु रहणु, खुस-खबर सामळावणेन काम वाटे नफु लावणी वात छे; बाकुन मे काहनी वातेक नेवाड़ो, जीवणु की मरनु? मेसेक समज मां नी आवतो। मे ईनी दुय वातेन ईचमां पड़ रयु काय करो ने काय नी? मारी हेर ते जी छे की मे मर जाम, ने जाय्न ईसु मसी पुठ्ये रव, काहाकी ज ते छाचली बेसको वारु छे। बाकुन तुंद्रेन तसों मेसेक डीलो मां जीवलु रहणु, मरने सी बी अदु जरुड़ी छे। ने मेसेक पाक्कु भुरसु छे की, मे जीवतु रय्स, ने तुहुं आखा पुठ्ये रय्स, ती तुहुं आखा भुरसा मां पक्का हवता जासु ने ईसु मां खुस रवसु। असु करीन मे तुंद्रेन्चां पछु आय्न रय्स ती, जी बड़ाय तुहुं मारा बारामां कर रया, ची बड़ाय अळी अदुस ईसु मसी मां अदी जासे।
हय बस अतरोत करु की, तुंद्रु वेहवार ईसु मसीन खुस-खबर कह्वे तसोत रवे, तेरेसी भले मे आय्न तुहुंक देखो, ने नी ते नी आवाये, तेबी मे तुंद्रे बारामां असोत सामळो की, तुहुं आखा एक जसा बणीन टीकला रय रया, ने काहनी बी वातेन, वीरुद करन्या सी नी बीहता ने खुस-खबरेन भुरसान राखवाळी करने करीन एक मन्या, भेळा हय्न काठी मेहनत कर रया। असा करसुन ती, वीरुद करन्या तुंद्री जी हिम्मत देख्से, ने तींद्रे धड़े जी हिम्मत ते तींद्रो बरबाद हवणेन चुखु-झण पुरावु छे। ने जीत हिम्मत तुंद्रे धड़े तुंद्रा छुटकारान चुखु झण पुरावु बी छे, ने तुंद्रे सी भगवानेन जीत मरजी छे। काहाकी तुहुंक भगवानेन गीण-दयान वाटु हेरेन करीन जड़लु छे की, तुहुं ईसु मसी पर भुरसु करु; ने भुरसा सी तेरे वाटे ने तेरी खुस-खबर वाटे दुख झेलीन वेला करनेन बी खास हक देदलु छे। ने दुख झेलने मां तुहुं एखला नी हय; पेहले तुहुं मेसेक बी खुस-खबर वाटे असु दुख झेलतु देख रया, ने हय बी असा सामळु, की मे खुस-खबर वाटे वेला कर रयु।
Source notes (2)
- Footnote फिलिप्पी
- Footnote केद
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.