भगवानेन छाचला बुल
ईफीसी 2
पापेम मरला माणसेक ईसु सी नवलो जीवन जड़े
एक टेम हतली जत्यार तुहुं माणसे हीनु अपराद ने पापे वाटे आत्मान रुप मां मरला हतला। पेहले तुहुं ईनी कळीन दीसरा माणसेन तसा गलत जीवन जीवतेला, ने चु भुतड़ु सीकाड़तेलु तीनी वात काजे मानीन जीवतेला, जु वाहळा मां रहण्या कुहर्या भुतड़ान मुखीन छे। हय जुत भुतड़ु भगवानेन हुकुम नी माने तीनु माणसे पर हक जमाड़ीन राज कर रयु। आपणु बी पेहले भगवानेन हुकुम नी माने तींद्रेन तसा डीलेन ने मनेन भुंड्ली हेर करीन जीवतेला। ने दीसरा माणसेन चाल-चालनेन तसात आपणु भगवानेक रीस लाग्यो तसा जीया, ने हामरे पर भगवानेन डंड आवण्यो हतलो।
बाकुन भगवान हयु बेसकु दयाळु छे, आपसा बेसका परम सी आपणु काजे परम कर्यु। आपणु पेहले पापेत मां मरला हतला, बाकुन भगवान आपणु काजे ईसु मसी भेळ जीवेम जीव वाळीन जीवता कर्यु; भगवानेन गीण-दया सीत आपणुक पापेन डंडेम सी छुटकारु जड़लु छे, ने भगवान आपणु काजे ईसु मसी मां तेर भेळु जीवाड़्यु ने सरगेन राजगादी पर ईसु पुठ्ये बठाड़ देदु। भगवान आपसी गीण-दया आवणेवाळी कळ वाटे जलमेन भलाय आखाक देखाड़ने करीन आपणु काजे परम करे, सरगेन राजगादी पर ईसु मसी पुठ्ये बठणेन हक आपे। काहाकी ईसु पर भुरसु करने सी तेरी गीण-दया सी पापेन डंड सी आपणुक छुटकारु जड़लु छे। आपणु, जु छुटकारु आपणे जुरे हात नी कर्या, बाकुन जु छुटकारु भगवान भीणी सी फुकट मांत आपलु दान छे। ने कुय बी माणुस मटाय नी करनु चाहजे, करीन जु छुटकारु आपणा भला कामे सी नी जड़्यु। काहाकी आपणु ते भगवान सीत ईसु मसी मां एक नवला सीका मां घड़ायला छे; ने चु, आपणु काजे तीना भला कामे काजे करता जाय्न जीवणे करीन घड़्लु छे, तीनु भला कामे काजे चु पेहले सीत पाक्की करलु छे।
आपणु आखा ईसु मां एक छे
ने तुहुं जे पयदावारीत सी नी-यहुदी छे, ईनी वातेक हेर करु, जे यहुदी माणसे डील मां पेहेरवटेन अगली फतरी काटाड़ रया, चे तुहुं काजे नी फतरी काटा नी-यहुदी कय्न छीट राखतेला। तीनी टेमे तुहुं ईसु मसी सी छेटे हतला, ने ईस्रायेली जातीन माणसे मां भेसकायला नी हतला, ने भगवानेन बुली करला वायदान साजल्या नी हतला। हेरेसी ईनी कळी मां भगवान बीगुर ने आस करे बीगुर जीवन जीवतेला। आस करीन तुहुं मसी ईसु सी ने हामरे, सी बेसका छेटे हतला, बाकुन हय ईसु मसीन लुही सी ईसु मां मेळीन तुहुं भगवान साते ने हामरे साते आय लागला छे। काहाकी हयुत हामरु मेळ कराड़न्यु छे, जु दुयु यहुदी ने नी-यहुदी काजे एक कर देदु, ने अलग करने वाळा भीतड़ा काजे जो ईचमां हतलो तीना काजे उदारी देदु। 1 ने आपणा डील सी दुसमनी मतलब तीना यहुदी नीयम तेरी हुकुम नीयमेन रीती मां हतली, तीनीक मीटाड़ी देदु काहाकी दुयुम सी आपणे मां एक नवली जाती बणायन मेळ कराड़ देय। छाचलीन ईसु दुय टुळान लड़ाय काजे कुरुस पर दुसमनी सार देदु ने असुत यहुदी माणसे काजे ने नी-यहुदी माणसे काजे एक डील बणायन भगवान सी मीलाड़ देदु। ने चु आय्न तुहुं काजे जे छेटे हतला, ने तीनु काजे जे साते हतला, दुय टुळा काजे भगवान सी मेळ कराड़नेन खुस-खबर सामळायु। असु करीन की आपणु दुय टुळा, यहुदी ने नी-यहुदी माणसे ईसु मां भुरसु करीन भगवानेन आपला आपसा चुखला-जीव-आत्मान मदत सी भगवान बासेन्चां पुग जाजे।
ने हय तुहुं पेहलेन तसा दीसरा ने अन्जाण्या नी हय, बाकुन भगवानेन चुखला माणसे पुठ्ये भेसकायन उळखाय्ता हय्न आखी वातेम साजल्या बण गुया। ने खरान हय तुहुं भगवानेन घराणाम मां भेसकाय गुयला छे। ने ईसुन नेवताळा ने भगवानेन अघली वात बताड़ने वाळा माणसे ईना घराणा वाटे घरेन नेहान पाया साय छे, ने ईसु मसीत ईना नेहान खुणान दगड़ा साय छे।23 ने तेरेमां आखो काय एकतु हय्न मालीक मां एक चुखलु मंदीर बणतु जाय। तेरेमां तुहुं बी आत्मा सी भगवानेन रहणेन घर हवणे करीन भेळात बणता जाय।
Source notes (3)
- Footnote गलाती 3:28 नेवताळान 2:39
- Cross-reference 1 कुरींथी 12:28
- Cross-reference यसाया 28:16
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.