भगवानेन छाचला बुल
नेवताळा 22
“ए भायस्यो ने आखा डाहला बास, मेसेक वाचाड़ने करीन मे जो काय तुंद्रे अगळ कय रयु च सामळु।”
जत्यार माणसे पोलुस काजे ईब्रानी बुली मां बुलतेलु सामळीन अळी हुगा रय गुया। ती पोलुस तीनुक कह्यु,
मे ते एक यहुदी माणुस छे, ने मे कीलक्या तरसुस सहरेम पयदा हवलु। ने मे तरसुस मां मारा आसी-बास्या मेसेक पाळ्या-पुस्या ने मटु कर्या। ने तरसुस मांत गमलीयेल मास्तर मेसे काजे आपणा आड़ा-बुड़ान कायदा पुरान-पुरा सीकाड़्यु; ने मे भगवानेन कायदा पाळने मां तुंद्रेन तसुत हवस्यु ने उतवाळ्यु हतलु। जसा आज तुहुं आखा हवस्या ने उतवाळ्या छे। चे माणसे हीनी वाटेन अनसारे चाल रवला मे अदमीक ने बायरा काजे धरी-धरीन बांदीन जेल मां नाखी देदलु। ने बेसकु वेला पाड़्यु ने माराड़ी बी नाख्यु। मे ज बी कर्यु तीनी वातेन गवा आखा मंदीरेन डाहला पुजारा छे। पुजारा ने आखी बसकेन माणसे मारी ईनी वातेन गवा छे। मे माणसे काजे जेल बुजीन वेला पाड़ने, करीन मे भायस्योन नावे तींद्रे धड़े वेला पाड़नेन चिट्ठी लिखाड़ीन दमीस्क जाणे बाजी रवलु, की जे वां छे तीनुक बी सजा आपाड़ने करीन बांदीन यरुसलेम लावु।
पोलुस खुदेन बदलनेन बारामां बताड़े
(नेवताळा 9:1-19; 26:12-18)
जत्यार मे चालतु-चालतु दमीस्क धड़े पुग्यु, ती असो हयो की मांजणीक दाहड़े सरगे सी उचकाणुन वीजाळो मारे चारेमेर चमक्यो। ने मे भुयमां हीट पड़्यु, ने मेसेक एक बुल सामळायु, ए सावुल, ए सावुल, तु मेसेक काहा वेला पाड़े? मे जपाप आप्यु, “ए मालीक! तु कुण छे?” चु मेसेक कह्यु, “मे ईसु नासरी छे। तीनाक तु वेला पाड़े।” मारा साती वीजाळाक ते देख्या ने वात करन्यान बुल घुगवान तसा सामळ्या तेबी चे सामेळ्ळा ने तेबी चे बुल नी समज्या। तत्यार मे कह्यु, ए मालीक! मे काय करो? मालीक मेसेक कह्यु, उठीन दमीस्क जाती रव; ने ज काय तारे करने वाटे ठेहरावलो छे च आखो चां देखाड़ दीस। जत्यार च वीजाळो तेज हतलो ती मेसेक काय बी देखाय नी देदो, ती मारा सातीन हात धरीन दमीस्क मां आयु।
ने चां भगवानेन कायदाक पाळन्यु ईसुन एक भगत हतलु। तेरो नाव हनन्या हतलो। चु चां रहणे वाळा आखा यहुदी माणसे मां आव-भाव वाळु हतलु। हीयुत हनन्या नावेन मारेन्चां आवलु ने चु मारे धड़े आयु ने मारे साते उबु हय्न कह्यु, “ए भाय सावुल! अळी पछु देखणे बाजी जां।” ने मे तत्यारुत देखणे बाजी गुयु। तत्यार चु कह्यु, हामरा डाह-डाहान भगवान तुसेक ठेहरावला छे की तु तेरी मरजी काजे जाणे, ने तीना धरमी काजे देखीन तेरी उजेंती वात सामळावे। काहाकी तु ज देखलु छे ने सामळ्ळु छे तीनी वातेन गवा रवसी। हय तु काहा वार लागाड़े, उठ ने बपतीस्मा ले ने तेरो नाव लीन तारा पाप काजे धुय दे।
दीसरी जातीन माणसे मां परचार करनेन बुलावु
जत्यार मे पछु यरुसलेम मां आयु ने मंदीर मां भगवान सी दुवा करने बाजी रवलु, ती चुखला जीव-आत्मान कब्जा मां हय गुयु ने मेसेक काय बी मालुम नी रह्यो। ने मे मालीक काजे देख्यु ने चु मेसेक ज कवणे बाजी रवलु, उतवाळ करीन यरुसलेम सी मामार बाहर नीकळी जां, काहाकी चे मारा बारामां तारी गवाय नी माने। मे मालीक काजे कह्यु, ए मालीक! कांखुर मायन हया सामळीन मान लेसे, काहाकी हीनुत ते मालुम छे की पेहेल मे तारे भुरसु करन्याक धरीन जेल मां कुंडतेला, ने जागे-जागे यहुदी माणसेन साहरे बणावला भक्तीन घर डीट तीनुक ठुकाड़तेलु। ने जत्यार तारी गवाय देण्या स्तीफनुसेन लुही उहवतेलो ती तत्यार मे बी तीनी वातेम राजी हतलु ने चां लागु उबु हय रवलु। ने जे माणसे स्तीफनुस काजे मारने बाजी रवला तींद्रा पुथल्यान राखवाळी करने बाजी रवलु। ने चु मेसेक कह्यु, तु जात रव, काहाकी मे तुसेक नी-यहुदी मां मारी गवा देणे करीन नांबे-नांबे मकलीस।
माणसे पोलुसेन जी वात जां लग ते सामळता रया; तत्यार जुर सी आयड़्या, “हीनाक मार नाखु। हीना काजे धरती पर जादा दाहड़ा जीवतेलु रहणु वारु नी हय।” जत्यार चे आयड़ता जाय्न आपसा पुथल्या नीकाळीन उराटतेला, ने वाहळा मां धुळु उडाड़ तेला, ती सीपायड़ान मेळान सुबेदार हुकुम आप्यु, “हीनाक कीला मां ली जावु, ने सपाटा दीन पारखु, तेरे सी जो मालम पड़से की माणसे हेरी वीरुद मां असा काहा आयड़ी रया।” बाकुन जत्यार चे चापकाटणे करीन तीनाक चामड़ान पट्टा सी बांदी रवला, ती पोलुस तेरे साते उबु हय रवला सुबेदार काजे पुछ्यु, “काय ज सय छे की तुहुं एक रोमी माणुस काजे, ने चु बीना गुना वाळा काजे सपाटा दी रया?” ती सुबेदार ज सामळीन सीपायड़ान डाहला मुखी सुबेदार काजे धड़े जाय्न कह्यु, “तु असो काहा करने बाजी रयु? तुसेक मालुम नी हय काय की जु ते रोमी माणुस छे।”
ज सामळीन सीपायड़ान डाहलु मुखी सुबेदार पोलुस धड़े आवीन पुछ्यु, “मेसेक देखाड़, काय तु रोमी माणुस छे काय?” पोलुस कह्यु, “हव!”
ज सामळीन डाहलु मुखी सुबेदार कह्यु, “रोमी राजेम रहणेन हक हात करने करीन मेसेक बेसका पयस्या आपणु पड़्यो।”
पोलुस कह्यु, “मे ते पयदा हयु ती सीत रोमी राजेम छे।”
ज सामळीन चे माणसे पोलुस काजे सपाटा दीन पारखणे हींडी रवला, चे तत्यारुत पोलुस धड़े सी पछा हय गुया; ने सीपायड़ान डाहलु मुखी सुबेदार बी असु जाण लेदु की जु रोमी माणुस छे ने हयु पोलुस काजे धरीन बांदाड़लु छे, करीन बीही गुयु।
मटला माणसेन बसक अगळ पोलुस
दीसरे दाहड़े सीपायड़ान डाहलु मुखी सुबेदार पोलुसेन हातकड़ी छुड़ देदु ने मंदीरेन डाहला पुजाराक ने आखी मट्ली बसक काजे भेळा करु करीन सीपायड़ाक हुकुम आप्यु। ने आखा भेळा हय गुया ने अळतेन चु पोलुस काजे तींद्रे धड़े नेचु ली जाय्न तींद्रे अगळ उबु कर देदु। काहाकी यहुदी माणसे हेरु वाक काहा नीकाळ रया जी वात चु मालम करने हींडी रवलु।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.