भगवानेन छाचला बुल
नेवताळा 21
पोलुस यरुसलेम मां जाय
जत्यार हामु तींद्रे सी अलग हय्न समुदर मां हामरो ढंड्यो छुड़ लेदा, ने सुदी सट वाटे कुस मां आया ने दीसरे दाहड़े रुदुस मां ने चां सी पतरा मां आया। ने पतरा सी हामु एक ढंड्याम बसीन चाल पड़्या, चु फीनीके जाणे बाजी रवलु। जत्यार सायपर्स देखायु ती हामु हीनुक डाखर्ये हात भीणी छुड़्या ने सीरीया भीणी जाय्न सुर मां उतर्या काहाकी चां ढंड्याम सी माल उतारनु हतलो। ईसु पर भुरसु करन्या भेळा हय गुया, ती हामु चां सात दाहड़ा लग रया चे आत्मान सीकाड़ला हतला पोलुस सी कह्या की यरुसलेम मां पाय घुण मेले। बाकुन चे दाहड़ा पुरा हय गुया, ती हामु चां सी चाल देदा ने आखा बायरा ने पुर्या भेळा हामुक सहरेन बाहार लग पुगाड़्या ने हामु दर्या धड़े मांडा टेकीन दुवा कर्या। तत्यार एक दीसरा सी आवजु ने आवसुन कय्न हामु ते ढंड्या पर चहड़्या ने चे आपसे-आपसे घर जात र्या।
तत्यार हामु सुर सी पाणी मां हामरी चाल पुरी करीन पतुलीम्या मां पुग्या ने भायसे काजे आवजु ने आवसुन कय्न तींद्रे साते एक दाहड़ु रया। दीसरे दाहड़े हामु चां सी चालीन केसर्या मां आया ने फीलीप्पुस खुस-खबरेन परचार करन्यान घर मां जु सात मां सी एक हतलु जाय्न हेरेन चां रया। हेरी चार कुवारी पुरे हतली जी भगवानेन अघे सी वात देखाड़नेन वाटु जड़लु हतलु। जत्यार हामु चां बेसका दाहड़ा रय लेदा ती अगबुस नावेन एक भगवानेन अघी सी आवणे वाळी वात बताड़न्या माणुस यहुदीया सी आयु। हामरे धड़े आवीन पोलुसेन फेटको लेदु ने हेरा हात पाय बांदीन कह्यु चुखली-आत्मा ज्य कह्वे की तीना माणसेन ज्य फेटको छे तीना काजे यरुसलेम मां यहुदी माणसे हीनीत रीत सी बांदसे ने नी-यहुदी हात मां आप देसे।
जत्यार हामु जी वात सामळ्या ती हामु ने चांहान माणसे हेरेसी दुवा कर्या की पोलुस यरुसलेम मां नी जाणु चाहजे। बाकुन पोलुस जपाप आप्यु तुहुं काय कय र्या की रड़ी रड़ीन मारा मन काजे मां तुड़ु मेसे मालीक ईसुन नाव वाटे यरुसलेम मां नी बाकुन बांदाय जाणे वाटे बाकुन मरने वाटे बी तीयार छे।
जत्यार चु नी मान्यु ती हामु ज्य कय्न हुगा हय गुया की मालीकेन मरजी पुरी हवे।
तीनु दाहड़ान पछे हामु तीयारी कर्या ने यरुसलेम भीणी चाल देदा। केसर्या सी बी थुड़ाक चेला हामरे साते आय गुया। ने हामु काजे मनासोन नावेन सायपर्स मां एक पेहला चेलान चां ली आया की हामु हेरेन चां रय रवजे।
पोलुस याकुप सी भेळु हवे
जत्यार हामु यरुसलेम मां पुग्या ती ईसु पर भुरसु करन्या भायस खुस हय्न हामु काजे भेळा हया ने आव-भाव कर्या। दीसरे दाहड़े पोलुस हामरे पुठ्ये याकुप काजे भेळु हवणे गुया, चां आखा डाहा-बुड़ा भेळा हय रवला। तत्यार चु पोलुस हीनु काजे आवजु ने आवीस कय्न जे काम भगवान हेरी चाकरीन साहरे नी-यहुदी मां करलु एक-एक करीन आखी वात बताड़्यु। चे ज्य सामळीन भगवानेन बड़ाय कर्या अळतेन हीनाक कह्या ए भाय पोलुस देखे की यहुदी मां सी काय हजार माणसे भुरसु कर्या ने आखा मुसान साहरे लिखला कायदाक वाचाड़न्या बी छे। ईसुक तारे बारामां सीकाड़ गुयलो छे की तु नी-यहुदी मां रवण्या यहुदी माणसे काजे मुसा सी छेटा हय जावु करीन सीकाड़े ने कह्वे की नी आपणा पुर्यान चामड़ी काटाड़ु ने नी रीती रीवाज पर चालु। ती हय काय करनु चाहजे? माणसे जरुर सामळसे की तु आवलु छे। हेरेसी ज्य हामु तारे सी कवजे चो कर हामरेन चां जां चार माणसे छे चे मान्ता लेदला छे। हीनुक लीन तींद्रे साते आपसा काजे चुखु कर ने तींद्रे वाटे खरचु आप की चे मुणका काजे बुड़ावे तत्यार आखा जाणी लेसे की जी वाते हीनुक तारे बारामां देखाड़ली छे तींद्रे मां सी थुड़ीक छाचाय नी हय बाकुन तु आपसु बी मुसान साहरे लिखला कायदा काजे मानीन हेरे अनसारे चाले। बाकुन हीयु नी-यहुदीन बारामां चे भुरसु करला छे हामु असा वीच्यार करीन चिट्ठी मकेला छे की चे तुहुं मुरती पर चड़ावला सीकार सी ने लुही सी ने गळु दड़पीन मारला सीकार सी ने छीनाळा सी बचीन रहु।
तत्यार पोलुस तीनु माणसे काजे लीन ने दीसरे दाहड़े तींद्रे साते चुखु हय्न मंदीर मां गुयु ने चां बताड़ देदु की चुखु हवणेन दाहड़े मतलब तींद्रे मां सी एक-एक जणा वाटे चड़ावु चड़ावे जांहा लग की दाहड़ा पुरा नी हवसे।
मंदीर मां पोलुस धराय जाय
जत्यार चे सात दाहड़ा पुरा हवणे वाळा हतला ती आसीयान यहुदीया पोलुस काजे मंदीर मां आखा माणसे कीचवाड़्या ने असा आयड़ी-आयड़ीन हीनाक धर लेदा। ए ईस्रायली मदत करु जु हयुत माणुस छे जु माणसे ने मुसान साहरे लिखला कायदा ने हीना जागान वीरुद मां एक-एक जागा आखा माणसे काजे सीकाड़े जां लग की नी-यहुदी काजे बी मंदीर मां लावीन जु हीना चुखला जागा काजे वीटाळ देदु। चे तेरसी पेहल ईफीसुस वाळा तरुफीमुस काजे हेरे साते सहर मां देखलु ने समजाड़ला की पोलुस हीनाक मंदीर मां ली आवे।
तत्यार आखा सहर मां माणसे हाय-हाय कर्या ने माणसे दवड़ीन भेळा हया ने पोलुस काजे धरीन मंदीरेन बाहार घीसड़ीन लाया ने तत्यारुत बारनो बंद कर देदा। चे पोलुस काजे मार नाखणे हींडी रवला। तीनेत टेमे सीपायड़ान मुख्यु सुबेदार काजे काहनुस जी खबर पुग्याड़्यु की, की आखा यरुसलेमेन सहरेन माणसे पोलुस भीणी जाय रया। चु सुबेदार तत्यारुत सीपायड़ा ने सीपायड़ान दीसरा मुख्या काजे तेरे पुठ्ये लीन पोलुस काजे मारने हींडतेला तीनु यहुदी माणसे भीणी गुया। चे यहुदी सीपायड़ान मुख्या सुबेदार काजे ने सीपायड़ान दीसरा मुख्या काजे देख्या ती चे पोलुस काजे ठुकणे बंद कर देदा। तत्यार सीपायड़ान मुख्या सुबेदार आवीन पोलुस काजे धर लेदु ने दीसरा सीपायड़ान मुख्या काजे कह्यु की “हेरे हातकड़्या लागाड़ देदु।” अळतेन चु सीपायड़ान मुख्या सुबेदार गड़दीम वाळा माणसेक पुछ्यु, “जु कुण छे ने जु काय गुनु करलु छे?” गड़दीम वाळा माणसे मां काहनुस काहींग कय रवलु ने काहनुस काहींग कय रवलु। काहाकी तीना सुबेदार काजे ज मालुम नी पड़्यो की संय वात काय छे। तेरेमां चु सुबेदार दीसरा सीपायड़ान मुखी काजे हुकुम आप्यु की “हीना काजे कीला मां ली जावु।” माणसेन गड़दी बेसकी हतली ने गड़दीम वाळा माणसे धकलावतेला तेरेमां कीलान फटक्यान चां जातात पोलुस काजे हाकलीन ली जाणु पड़्यो। काहाकी माणसेन गड़दी ज आयड़तात हेरे पछळ पड़ी रवला की, “हीनाक मार नाखु!”
जत्यार सीपायड़ा पोलुस काजे कीला मां ली जाणे वाळा हतला, ती पोलुस सुबेदार काजे कह्यु, “काय मेसेक हुकुम छे काय मे तुसेक काय कहं?” सुबेदार पोलुस काजे जपाप आप्यु, “तुसे युनानी बुली आवड़े काय? काय तु चु मीसरी ते नी हय, चु थुड़ाक दाहड़ा पेहल लड़ाय करलु, ने चु च्यार हजार माणसे काजे बयड़ा मां ली गुयलु?”
पोलुस कह्यु, मे ते कीलक्यान तरसुस सहर मां रहण्यु यहुदी माणुस छे। चु तेरे सी लीलघाय्न कह्यु, “तु मेसेक हीनु गड़दीन माणसे साते वात करने दे।”
जत्यार चु हुकुम आप्यु, “पोलुस फटक्या पर उबु रय्न हाते सी ईसारु कर्यु। जत्यार आखा माणसे हुगा रय गुया। ती चु ईब्रानी बुली मां ज कहणे बाजी गुयु:
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.