भगवानेन छाचला बुल
2 थीसलुनीकी 2
ईसुन पछु आवणेन पेहेल कळीम वीतणे वाळी वात
ए भायस्यो ने बहणस्या, हय हामु आपणा मालीक ईसु मसीन पछु आवणेन बारामां, ने तीने टेमे आपणुक, तेरे अगळ भेळा हवणेन बारामां असा लीलघाय्न कवजे; मालीक ईसुन चु दाहड़ु आय गुयु करीन कुय बी तुहुंक कवसे, तत्यार तुहुं घाबरायजु घुण, नी ते तीनी वात पर तत्यारुत भुरसु करीन खडळ-वडळ1 घुण हय जावु, भले चु कहण्यु असु दावु करसे की जी वात ते चुखलु जीव-आत्मा मेसेक कहलु, नी ते पोल्लु ईसुन पावर्यु असु कय र्यु, नी ते चिट्ठी मां असोत लिखलो छे, तेबी तींद्री घुण सामळता। कसा बी काहनाक ने वात मां आय्न ठगायजु घुण, काहाकी जत्यार लग भगवानेन वीरुद नी करे, ने तींद्रु डाहलु जु पापेम पुसायलु माणुस उजेंतु नी हवे, तेरो नास हवणे वाळोत छे, ती लग ईसुन आवणेन दाहड़ु नी आवे। पापेम पुसायलु चु माणुस भगवानेन वेरी बणसे ने चु मटाय करीन देवता कहवायण्या आखा सी ने पुजायणी आखी देवधाणी सी मेत मटु छे करीन हक जमाड़से। ने मेत भगवान छे असु दावु करीन भगवानेन मंदीर मां बसीन राज करने बाजी जासे।
जत्यार मे तुंद्रे पुठ्ये हतलु, तत्यार मे तुहुं काजे जीत वात कह्या करतेलु ची वात तुहुंक हेर2 नी हय काय? ने तुहुंक ते, जी वात मालुमुत छे की, पापेम पुसायला तीना माणसेक हय कुणीन जुर रुक र्यु; ने टाकले टेमे चु उजेंतु हवसे। मे जी वात असु करीन कय र्यु, काहाकी भुतड़ान गरबड़ी करनी सातायली ताकत हय बी काम करने बाजी रय। बाकुन हय जु रुकणे बाजी र्यु, चु रुकणे वाळु टाकले टेमे छेटु हवणे लग, पापेम पुसायला माणुस काजे उजेंतु हवणे सी रुकी रवसे। जत्यार लग रुकणे वाळु छेटु हय जासे, ती नेम नी मान्यु पापेम पुसायलु चु माणुस उजेंतु हवसे। बाकुन जत्यार मालीक ईसु आपसे दाहड़े, आपसान सेक-सींगार भेळु उजेंतु हवसे, तीने टेमे चु तीना काजे आपसे फुकेत मार नाखसे ने तत्यारुत चु गरबड़ी करन्यु सर जासे। तीना गरबड़ी करन्या, भुतड़ान3 कामे लीन आवसे, जसु भुतड़ु लुच्चु छे, चु बी लुच्चु रवसे ने आखी भातीन ताकत सी भरायलु रवसे ने कदी देख्या नी, तीनु कामेन सहलाणी देखाड़से, ने नास हवणे वाळा वाटे जे धरमेन काम नी करे चे आखी भातीन धुकान साते आवसे, काहाकी चे छाचली वात सी परम नी कर्या तेरेसी तींद्रु छुटकारु हवे। तेरेमां भगवान तींद्रे मां एक भटकाय देणेवाळी ताकत मकलसे काहाकी चे झुटी वात पर भुरसु करे। काहाकी जतरा माणसे छाचली वात पर भुरसु नी करे, ने जे धरमेन काम नी हय तीनु कामे सी खुस हवे, तीनु आखा काजे डंड जड़े।
तुहुं छुटकारा वाटे नेवाड़ला
ए भायस ने बहणस्या, तुहुं मालीक ईसुन लाटेक्ला छे। भगवानेन जीव-आत्मा सी चुखला बणीन, ने ईसुन खुस-खबरेन छाचली वात पर भुरसु करीन छुटकारु हात करनु चाहजे, करीन भगवान तुहुं काजे सुरु सीत नेवाड़ लेदु, ने हामु भगवान सी तुंद्रे वाटे हर घड़ी बेसका वारु कह्जे। ने हेरेन करीन हामु तुहुं काजे छुटकारान बारामां सीकाड़जे, ने तेरे सी भगवान तुहुं काजे बुलायु हेरेसी की, तुहुं बी हामरा मालीक ईसु मसीन सेक-सींगार, पुथल्यान तसु पेहेर लेवु। तेरेमां हामरा भायस ने बहणस्या, टणका रहु; जी-जी वात हामु तुंद्रेन्चां रय्न सीकाड़ला ने अळी चिट्ठीन अनसारे सीकाड़ला, तीनीत पाळनी पर टेकला रहु।
हामरु मालीक ईसु मसी तुत, ने हामरु बास भगवान, जु हामरे सी परम राख्यु ने गीण-दया सी जलमकी सांती ने मट्ली वारु आस आप्यु। तुंद्रा मन मां सांती देय ने तुहुं हरेक वारु काम ने बुले मां टणका करे।
Source notes (3)
- Footnote खडळ-वडळ अस्थिर
- Footnote हेर स्मरण
- Footnote शैतान भुतड़ु
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.