भगवानेन छाचला बुल
2 थीसलुनीकी 1
ए थीसलुनीकी सहर मां रवण्या ईसुन मंडळीन माणसे,
मे पोलुस, जी चिट्ठी, सीलवानुस ने तीमुथीयुस भेळु, तुहुं आखाक लिख र्यु, तुहुं ते आपणा भगवान बासेन ने मालीक ईसु मसीन भुरसे रय रया:
तुहुं आखा काजे आपणा भगवान बासेन ने मालीक ईसु मसीन गीण-दया ने सुक-सांती जड़ती रहणु चाहजे।
नीयावेन दाहड़ु
ए भायस्यो ने बहणस्या, ईसु पर तुंद्रु भुरसु बड़तुत जाय रयु, ने तुंद्रे मां परम बी बड़तुत जाय रयु, तेरेमां हामु, तुंद्रे वाटे आखे टेमे भगवान काजे बेसकु वारु कहणु चाहजे। तुहुं काजे माणसे, अळी-अळीन वेला पाड़ रया, तेबी ईनु आखा वेला ने दुख काजे तुहुं झेल रया, ने असा करीन तुंद्री गम खाणेन ताकत ने तुंद्रु भुरसु उजेंतु हय रयु, तेरेमां हामु जागे-जागे भगवानेन मंडळी मां तुंद्रे बारामां मटाय करजे।
जु भगवानेन छाचला नीयावेन दाहड़ाम धरमीन पुरावु छे, तीने दाहड़े चु आखा माणसेन नीयाव करसे। तुहुं ते हय भगवानेन राजेन वाटे दुख झेल रया, तेरेमां नीयावेन दाहड़े, भगवान तुहुंक असु कवसे तुहुं मारा राज मां भराये असा छे। काहाकी भगवान डंड आपसे की आपसे काहाकी तेरी नींगा मां असो करनु नीयावेन हीसाबे संय छे। बाकुन तुहुं जे हय वेला करने बाजी र्या, तुहुं काजे ने हामु काजे नीयावेन दाहड़े वेलान बदला मां सुक आपणे बी तेरी नींगाम नीयावेन हीसाबे ताले छे। तीने दाहड़े, मालीक ईसु आपसा ताकत सी भरला सरग काहवाळ्या पुठ्ये, सरग सी धपतेला आकठा भेळु उजेंतु उतरसे। ने जे भगवानेक नी जाणे ने हामरा मालीक ईसुन खुस-खबरेक नी माने तींद्रे सी बद्लु लेसे। चे मालीक अगळ सी ने तेरी ताकुतेन सेक-सींगार सी छेटा हय्न जलम डंड हात करसे। असो तीने दाहड़े हवसे, जत्यार चु, भगवान सी ठहरावले दाहड़े, सरग सी पछु आवसे। तत्यार आपणु जे तेरा चुखला माणसे छे, आपणे वाटे ईसु ज करलु तेरे बदले ईसुन बड़ाय करसु, ने ईसुक मान्या आपणु आखा तेरु सेक-सींगार देखीन देखतात रय्न तेरी बड़ाय करसु। तीनु भुरसु करन्या मां तुहुं बी रवसु, काहाकी तुहुं ईसुन तीनी गवाय पर भुरसु कर्या, तीनी गवाय काजे हामु देखाड़ला।
ने हामु तुंद्रे वाटे भगवान सी जलम असी दुवा करजे की ए हामरा भगवान, तु ईनु काजे जो चुखलो जीवन जीवणे करीन बुलावलु छे, असो जीवन जीवणे करीन जुर आप। ने जे ईसुन भुरसे ज काम करने बाजी र्या, तीनु कामेक तु पुरो कर, ने भलाय करनेन जी मरजी छे ची आखी तारी ताकत सी पुरी करनी दे। असा करीन आपणा भगवानेन ने मालीक ईसु मसीन गीण-दया सी तुहुं असा करसु ती, तुंद्रे अनसारे आपणा मालीक ईसु मसीन नावेन बड़ाय हवसे। ने तेरे साहरे तुंद्री बी बड़ाय हवसे।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.